一日又一日,見住阿婆嘅面容失去舊日嘅光澤,染成慘白嘅顏色。

阿婆明明連掙開眼皮嘅力都無,每次見到我同Lucy都仍然會用超越自己極限嘅力氣,撐起發紫嘅嘴角對我地微笑。

一日又一日,見住阿婆本來夾雜白髮嘅蓬鬆掃笆頭愈嚟愈稀薄。行過嘅路除咗有佢嘅足跡,仲有佢脫落嘅頭髮。

好似,已經變到唔再係我地阿婆咁。

「阿婆,我織咗頂冷帽畀你呀。」



「乖⋯⋯乖⋯⋯」

「戴咗之後個頭殻頂有無暖啲?」

「有⋯⋯有⋯⋯」阿婆想提起手摸吓Lucy塊面,但手舉到一半,就唔夠力。

正當無力嘅手要下墮嗰陣,Lucy雙手接住,然後自己挨塊面埋去。

「唔好喊⋯⋯唔好⋯⋯喊⋯⋯」