[有沙入眼]是咁的，我覺得我住嗰度有啲唔妥: 159是咁的，我嘅職業係幫想自殺嘅人寫遺書
嗰段日子，真係好辛苦。我同Lucy都係。
翻學、翻工、去醫院、翻屋企食飯訓教。機械式嘅生活。
就算有dayoff，都要奉獻所有時間去翻工。我好記得當時唯一嘅娛樂，就係搭車嗰陣會上高登睇吓故。
叮叮。
手機響起。
「哥，睇依個。」有一日，印象中好似係二零一六年六月左右，Lucy就send咗條link畀我解悶。
嗰條link嘅名叫做：《是咁的，我嘅職業係幫想自殺嘅人寫遺書》。
「點解你會搵到個咁嘅post？」我有不詳嘅預感，當時我仲未知依個係一個故事。
Lucy無答我。
「你係咪喺網上search過自殺嗰啲野？」
「有。你都有啦。」
一時之間，我覺得無地自容。
因為生活好辛苦、好攰，所以有諗過自殺，亦有上網搵過有關自殺嘅資料。
啲人話兄妹之間會有啲心靈相通，睇嚟Lucy同我都諗過同樣嘅事。
「總之睇咗先啦，故嚟架咋。」
咁啱佢每一節都好短，於是我就用坐車嘅時間開始追依個故事。