[有沙入眼]是咁的，我覺得我住嗰度有啲唔妥: 171微笑
阿婆開始攰，合埋眼，一秒，打開；合埋眼，兩秒，打開。
佢微笑，難得地，牽動眼角嘅魚眉紋，終於唔係淨係得個嘴笑，而係成個表情一齊笑。
好幸福嘅笑容。
「諗緊咩？笑得咁甜嘅？」
「我⋯⋯諗緊你BB嗰時⋯⋯」阿婆合埋眼，好似沈浸喺過去嘅旋律之中，為咗唔好影響樂音而將聲線收細。
連我都一早遺忘嘅某一日，喺露台畀阿婆抱住，靜靜入睡。
無憂無慮，純淨無暇嘅日常。
世界上最無情嘅事，就係我地都無可能記得自己最單純咁覺得快樂嘅兒時記憶。
但阿婆，代替我記住咗嗰段回憶。
「呀⋯⋯真係，仲想抱多你地一次。」而依段回憶，令而家嘅佢可以再一次幸福咁微笑。