我「嘩」完之後,發現我可以喺海底發聲。

「好靚⋯⋯」月曦都忍唔住讚嘆,暫時忘記咗我捉住佢隻手嘅事。

海入面有五彩繽紛嘅珊瑚礁,數唔清有幾多嘅熱帶魚群,神仙魚呀小丑魚呀乜都有⋯⋯唔止!仲有紅衫、石班、蘇眉、雞泡魚、鯊魚、魷魚、龍蝦、海龜、蟹、鯨魚、水母、海豚⋯⋯雜七雜八撈埋一大堆嘅海洋生物。

我仲以為係條登出嘅秘道,點知唔係。點解跳出嚟之後,會跌入一個咁奇怪嘅海入面呢?

更奇怪嘅係,每一塊珊瑚同每一條魚,表面都有啲映像不停切換,好似有部投影機對住佢地播緊投影片一樣。



連水中不時浮動嘅氣泡,入面都有映像。我地眼所能及嘅範圍,已經好多海洋生物,但當向前游嘅時候,就會發現個海係無窮無盡,有更加多魚游嚟游去。

我嘗試去觀察唔識周圍游嘅珊瑚,發現入面播放嘅映象同我無關,而係其他陌生人嘅日常生活片段。

生活片段?

突然,片中嘅男人被一隻怪物咬走頭顱。

同一時間,月曦㩒住胸口大啖咁吸氣,表情好似就嚟窒息咁:「嗄⋯⋯嗄嗄⋯⋯」



「發生咩事?」我搖一搖佢搏頭,佢就清醒翻,呼吸慢慢順暢。

「唔⋯⋯唔關你事。」但我睇得出,月曦對依片海洋有莫名嘅恐懼。

佢順翻條氣,左右望一望,問:「依度,到底係咩地方?」

如果無估錯的話⋯⋯

「依度⋯⋯應該係主系統收集遊戲記錄嘅地方。」