[有沙入眼]是咁的，我覺得我住嗰度有啲唔妥: 194鎖匙

「合得好實⋯⋯開唔到。」我見月曦谷到塊面紅哂，就知佢無呃我。

「畀我試吓。」

我伸手，竟然好輕鬆就將貝殼揭開。

「點解你唔駛用力？」

「點解你用咁大力都開唔到？」



月曦不滿咁「嘁」咗我一聲。

貝殼入面放咗一串鎖匙。

圖環上套住咗兩條有啲鏽化嘅鎖匙，一條用嚟開鐵閘，一條用嚟開大門。

「鎖匙？」

「可能有用，拎咗先講。」我拎起串鎖匙，本來想放入褲袋，但諗諗吓，如果串鎖匙對登出有幫助的話，都係交畀月曦好啲。



「畀你袋住。」

「吓？」

「袋住啦。」月曦唔知我想點，但係都拎咗串鎖匙。

同一時間，深藍嘅海底染成一片血紅。

「警告！警告！」巨響喺耳中炸裂，令人頭痛。



「搞咩呀？」我望向珊瑚壁上嘅數字，仍然係「99」。

「實係我地拎走條鎖匙搞到咁啦！」月曦想放翻串鎖匙入隻蚌度，但我出手阻止咗佢：「擺翻好都無用，你幾時見過防盜系統會因為個賊將鑽石放翻喺原位就自動熄機架？」

「咁⋯⋯點呀？」

「系統咁大反應代表串鎖匙真係有用同好重要，你收好佢！」我將鎖匙推向佢，但佢又將鎖匙推翻畀我。

「唔呀！咁重要做咩要交畀我喎！」

「確定異常意識。」系統嘅聲音。異常？

「條鎖匙一定對登出有幫助，所以我先交畀你咋！」估唔到咁危急嘅情況之下，都仲要嘈交。

月曦仲想反駁，但係已經無時間。



「排除異常入侵意識。」