[有沙入眼]是咁的，我覺得我住嗰度有啲唔妥: 197五分鐘
我同好多人一樣，第一次接觸鬼故事都係細個嘅時候聽大人口述。
阿婆講過一個鬼故事嚇我同月曦。
話說例得村入面有啲公共空間畀人打羽毛球或者乒乓波，我地住嗰層就設置咗一張石製波枱。阿婆覺得我同細妹處於成長階段需要運動吓，所以就買咗雜貨店嗰啲平價乒乓套裝畀我同月曦。
我同佢由細到大都無咩娛樂，第一次接觸到乒乓波之後，我地兩個都完完全全沉迷喺依項運動上面。
每日食完飯做完功課，就會同細妹出去打乒乓波。雖然技巧拙劣，但係打滴滴仔偶爾打到兩三個來回已經好開心。
我地打到近乎忘我嘅狀態，連時間流動都好似感知唔到，仲要唔識攰咁。往往玩到阿婆夜晚十二點走出嚟叫我地，兩條友都唔捨得翻入屋。
「打多五分鐘啦⋯⋯」
「阿妹攰喇喎。」
「唔攰呀。畀我地打多五分鐘啦～嚟啦～」月曦嗲人叻過我，每次都可以氹到阿婆話好。
當然，打多五分鐘之後我地自然仲想再打多五分鐘。
細個嗰陣好似覺得，玩嘅時間有多五分鐘，歡樂就可以無止境咁延續落去。