[有沙入眼]是咁的，我覺得我住嗰度有啲唔妥: 225植物人

留言信箱長長嘅尾音，猶如醫院嘅儀器宣告病人失去心跳。

月曦係唔得閒聽，定係特登唔聽我電話？

真係……連贖罪、補救同改過嘅機會都唔畀我？

點解咁絕情？我明明係你唯一嘅阿哥嚟架……

「我無你依個阿哥。」



我望住手機上，接通留言信箱嘅時間一秒一秒咁增加。最後，我㩒制切斷通話。

如果你見唔到的話，咁我所做嘅一切都會變得徒勞無功。我依一年嚟嘅努力到底係為咗咩野？

為咗錢呀，你自己最清楚啦。

唔止係錢……仲有我應承月曦嘅夢。

唔好傻啦，之前同月曦嘈交嘅時候，你腦入面只係得錢，夢想同親人根本就無任何份量，你自己唔係最清楚咩？



係……的確係咁。

所以唔好事到如今先話咩做嘅一切都係為月曦乜乜物物啦。你只係想要錢姐，你而家咪達成目標囉。

望吓你手上部IPHONE10，抬頭睇吓你住緊邊度？已經唔再係豆腐潤咁細嘅例得村單位，而係豪華嘅私人樓，淨係廁所都已經大過以前成間屋啦。

但係……

但係咩？



「買間大屋得自己一個人孤零零住又有咩用喎！」

我環視瑰麗堂皇嘅客廳，除咗我自己同自己講野之外，一個人都無。有間大屋，得一個人孤零零住，又有咩用？

所以你而家想否定金錢？真係好咩？你用阿婆同月曦換翻嚟嘅錢，一旦否定，咁你就要承認當初做咗一個錯嘅決定架喇喎。但就算認咗錯，都無可能重新嚟過架喇。

就算唔可以翻轉頭，做錯就係做錯。

認咗錯又點？你可以補救咩？

叮叮。

電話響起，打斷我嘅思路。

「請問你是月曦的哥哥嗎？」有人用月曦嘅手機搵我，邊個？



「是。」

對方確認我嘅身份之後就打電話過嚟，係一個男人。

「喂，你好……我係阿良，月曦嘅男朋友。你可唔可以而家嚟聖母醫院？」

「發生咩事？」

嗰年我廿五歲，月曦廿二歲大學畢業。佢同男朋友完SEM之後，因為無錢就喺香港周圍去，當係畢業旅行，點知喺海灘發生意外。當時佢地喺海入面，因為太大浪而沖開咗佢兩個，月曦面對咁嘅情況由於緊張而抽筋，飲咗幾啖海水之後就被巨浪淹沒。

「我已經即刻叫救命，然後搏命游過去想救佢。」

但浪太大，阻礙阿良前進，無辦法及時救到月曦。好彩救生員喺附近，但到救生員去到救起佢嘅時候，月曦已經處於昏迷狀態。人工呼吸無效，救生員繼續同佢做心肺復甦，直至救護車趕到，送佢去醫院。



月曦雖然保得住條命，但大腦一度缺氧，陷入唔會醒得翻嘅狀態。

醫生話要有月曦今世都會係植物人嘅心理準備，叫我唔好奢望佢有醒翻嘅可能性。

「點解唔一早通知我？」

「唔好意思，金小姐嘅聯絡資訊入面無寫低任何家屬嘅聯絡方法。」

於是搞到咁大件事，我都完全唔知情。

「我知佢有阿哥，但佢del咗你電話，所以一直通知唔到你。」

聽完醫生同阿良交代完件事，我只能夠錯愕咁企喺原地，望住病床上合埋眼嘅月曦。

唔怪得，月曦明明憧憬海洋，但到真係去到海底世界嘅時候，竟然流露出莫名其妙嘅恐懼。



只見佢面容蒼白，雖然維持住微薄嘅呼吸，但整體上同死屍無太大差別。

唔會醒嘅人，仲算唔算係人？

「妹……阿哥呀……你聽唔聽到我講野？阿哥嚟咗睇你……」