[有沙入眼]是咁的，我覺得我住嗰度有啲唔妥: 226遺棄

我捉起佢隻手，好冰，但仲有僅餘嘅溫度。我倚靠喺佢身邊，等佢回應，可惜佢無回應我嘅能力。

我點都無諗過一年後，自己細妹會變成咁嘅樣。

我想問佢仲憎唔憎我，憎又好唔憎又好，我以為點都會有個答覆，但現實係我永遠無可能知道月曦到底有無原諒我。

但由佢嘅緊急聯絡人無寫自己有阿哥，連我電話都無畀任何人知，可以推測到佢嘅心態。

就算自己發生咩事，都再同我無關係，所以亦唔需要留低任何可以聯絡我或者通知我嘅方法。



諗到依度，內心又出現被攪拌機攪碎嘅感覺。

突然，企喺背後一直唔出聲嘅阿良向我講︰「以後月曦就交翻畀你喇。」

我以為自己聽錯，瞳孔因怒火而收缩︰「你……咩意思？」

「意思就係，將月曦交翻畀你照顧。你係佢唯一嘅家屬。」

我放低月曦嘅手，起身，轉向阿良。



「你唔係諗住拍拍囉友走人吓話？係你搞成月曦咁樣，仲夠膽講交翻畀我講得咁口響？」

「你錯喇，係意外搞成佢咁樣，唔關我事。」

拳頭抖震。

「你唔會覺得搞成咁，你都有責任？你唔內疚咩？」

「有，但我已經盡咗自己嘅責任。我嘗試去救佢救唔到，而佢昏迷到依家都一直係由我照顧佢，要補償已經補償哂。我見到個未接來電，通知翻你嚟接手已經仁智義盡。」



我揪起佢嘅衫領︰「你咁都仲算係人嚟咩！？」

佢捉住我手腕︰「我同佢只係男女朋友嚟咋！又未結婚。佢搞成咁我都唔想架！唔通我仲陪佢過世呀？」

背後傳嚟心電圖嘅發聲節奏，有一剎那加快咗。

我太用力咬緊臼齒，令牙肉擠壓出血水。

口腔瀰漫腥味。

「就算同月曦結咗婚，你依種人仍然會選擇拋棄佢！唔好講到自己結咗婚就會成個人唔同哂咁！」

我想揮拳，但阿良捉我手腕嘅力度都好大，無辦法話打佢就打到佢。

「結咗婚就係無論貧苦疾病都要一生一世喺埋一齊！但我地只係男女朋友呀！我無責任照顧而家嘅月曦！有責任嗰個係你呀，你係佢阿哥呀！」拳頭同阿良嘅手鬥力，但佢佔上風。



不過就算我真係打佢一身，訴諸暴力抒情發咗自己嘅怒火，都無辦法駁斥佢所講嘅事實。

期望伴侶嘅不離不棄，只不過係人對愛情過於美好嘅幻想。

我等緊我嘅金仔。

阿妹，依個真係你嘅金仔咩？

真係嗰個可以帶你逃離人類荒謬嘅最愛？

小說只係小說，現實已經講咗個答案畀你聽。依個同你一齊四年有多嘅男仔，到頭來都係做唔成你幻想中嗰個男朋友。

畢竟喺現實世界，自私自利嘅人太多。



大難臨頭各自飛嗰一瞬間，先能夠真正了解身邊嘅人到底係飛去搵食物照顧自己嘅知更鳥，定係一去不還巢嘅燕子。

「月曦講過你做遊戲設計，推出咗隻遊戲之後好有錢。我諗以你嘅經濟能力，要照顧佢都唔係咩重擔。」

我有少少錯愕。

推出遊戲係今年嘅事⋯⋯

原來月曦⋯⋯雖然做出所有斷絕同我聯絡嘅舉動，但係佢⋯⋯仲有留意我嘅動向⋯⋯