[有沙入眼]是咁的，我覺得我住嗰度有啲唔妥: 235防火牆

腹部傳嚟一陣劇痛，將我嘅意識由記憶中抽離。

奇怪嘅係，當我由回憶中抽離之後，痛楚就即刻消失咗。

而醒翻嘅我已經記起，依一切都係我自己製造出嚟。

我係依個遊戲嘅創造者，依個世界嘅所有法則同程式編碼，我終於全部都記得翻哂。

當知道世界由咩構成，我就如同依度嘅神一樣。



而家首要做嘅野，係搵翻月曦。

阻住我嘅一切，全部清除。

一團烈火喺屋企入面燃燒起嚟，將貞子、噴血浴室同播出「你好999報案中心」嘅電子產品燒成灰燼。

我運用遊戲製作人嘅權限，去清除喺我面前出現嘅怪物怪事。

火焰將屋內嘅怪異燒走，變翻一間極其普通嘅公屋單位。



「噠噠噠。」門外傳入有人打乒乓波嘅聲音。

我企起身，打開大門，見到走廊盡頭嘅肉色怪物。

清除。

怪物嘅肉體隨即被烈火焚燒。

我向走廊另一邊前進，穿過樓梯前嘅空地，再經過另一條走廊，行到有乒乓石枱嘅公共空間。



「噠噠噠。」

月曦就喺依度，面無血色咁同一個細路仔打緊乒乓波。

清除。

細路嘅腳邊捲起烈火，好似龍卷風咁包圍佢嘅身體。

但下一瞬間，火龍卷變成白煙。

「用遊戲製作人嘅特權通關，真係好粗魯。」個男仔無接月曦打過嚟嘅波，任由佢跌落地吓，碌到我腳邊。

帶住血絲同黏液嘅眼珠停喺我鞋尖前面。

再試一次！清除！



火舌喺佢身邊燃燒，但火花就好似喺狂風中嘅星塵，橙色光點轉瞬即逝。

「無用架，你清除唔到我。」

如果無估錯，佢就係每個遊戲入面都會有嘅大boss。

「你嘅權限只可以清除系統生產出嚟嘅NPC，雖然依個細路都係NPC，但畀我附身之後，就已經唔係你隨隨便便就清除得到。」男仔轉身面向我，應該有眼球嘅地方只有兩個血窿。

「我係依個遊戲嘅守衛，類似防火牆嘅存在體。」

佢指一指自己：「其實我可以附喺其他NPC身上，唔一定係依個細路。不過其他NPC啱啱畀你燒死哂，我無得揀。」

估錯咗⋯⋯原來係防火牆，唔係大魔王⋯⋯



我望向雙目無神嘅月曦，佢垂低手耷低頭，好似殭屍咁。

防火牆知道我望住月曦，嘆咗口氣：「你自己搞成佢咁架，唔關我事。」

我搞成佢咁？

「有乜可能？」

「你已經記翻現實世界嘅記憶，應該知道串鎖匙係咩嚟啦？」

設計遊戲嗰陣偷偷安裝嘅戲院，一間只有我先有通行證入場嘅戲院。

通行證，就係鎖匙。

所以月曦用全力都開唔到隻蚌，但我好輕鬆就拎到條鎖匙出嚟。



「係用嚟開戲院房門嘅通行證。」

「無錯。而只有你先有用鎖匙嘅權限，月曦無。所以佢接觸鎖匙嗰陣，違反基本法則，我先會排除佢嘅意識。」

防火牆將鎖匙抛翻畀我：「你唔怪得我，我偵測到異常就會自動做野。」

我之前以為條鎖匙可能對登出有幫助，所以想畀月曦用。點知好心做壞事，食豆食著屎，估唔到違反咗遊戲設定，啟動咗防火牆。

如果我早啲記起現實世界嘅記憶，我一定唔會將鎖匙交畀月曦。不過有早知無乞衣，既然已經做咗，而家唯有諗方法解決。

「咁而家月曦嘅意識去咗邊度？」