「依個就係我要搵NPC附身同你溝通嘅理由。因為有野需要你幫手。」

「月曦喺邊?」

防火牆無視我嘅問題,行去月曦身邊:「聽我講埋先啦。你同吳非凡設計出嚟嘅新植入技術,雖然成功將植物人意識植入虛擬世界,但仲未完善到可以應對被遊戲系統排除意識嘅情況。」

「結果就係,植入機拒絕被我排除嘅意識,唔畀佢回流翻去肉身。而家月曦嘅意識就攝咗喺虛擬世界同現實世界之間,而未完全登出嘅意識就以依種狀態繼續留喺遊戲世界。」

佢用手掌喺月曦身邊由上而下掃,好似展示新衫嘅售貨員咁。



「本來由得佢喺度無咩問題,但佢繼續存在就會消耗遊戲記憶體。你應該知記憶體滿咗會發生咩事啦?」

「我知。到時依個世界會重置,遊戲系統會將所有意識強制登出。」

防火牆伸手去摸月曦嘅手臂,但好似喺影子上面掃過一樣,掂唔到月曦嘅實體。

「但係佢已經被我排除咗一次,正如你所見,就好似鬼魂一樣。就算遊戲重置,系統都無辦法強制登出一個『應該已經被防火牆排除咗』嘅意識。」

「所以呢?你到底要我做咩?」



「咁嘅bug可能會影響重置程序,而家嘅月曦就好似清除唔到嘅電腦病毒咁,至少單靠遊戲嘅自動防火牆清除唔到。為咗令重置程序唔會受阻,我想拜託你清除佢。你用製作人嘅權限,直接中斷依個意識同遊戲世界嘅連線。」

簡單講,情況就好似電腦中咗毒,但部電腦無能力自己掃除病毒嘅時候,叫我手動除毒一樣。

「我拒絕。我唔會清除月曦嘅意識。」

就算月曦嘅意識翻咗去肉身,等待佢嘅都只係得無盡嘅黑暗。

防火牆嘆咗口氣:「唉,都預咗。」



「咁樣的話,仲有另一條路揀嘅。」佢行向我,而我腳前面嘅眼珠亦不知不覺間變翻做普通嘅乒乓波。

「其實個情況好簡單,因為月曦係植物人意識,係例外,所以我無辦法完全將佢排出遊戲世界。要解決的話,有兩個方法。一係就用製作人權限將意識完整拔除,但你唔肯,咁無計啦。」

佢指一指月曦揸住嘅球板:「雖然佢好似鬼魂咁,但唯獨乒乓波板同乒乓波佢可以接觸。即係話,你可以用第二個方法。」

防火牆將自己塊乒乓波板遞畀我:「用共鳴將佢嘅意識喺兩個世界嘅夾縫之中,拉翻過嚟。」

我正想伸手去拎,防火牆又將波板收一收,令我手掌喺板柄本來所在嘅位置撲空。

「我要提醒你,系統用咗九成九嘅記憶體,遊戲嘅記錄次數得翻最後一次。無論你共鳴成功定失敗,系統都會記低依個最後記錄,然後進行重置。」

即係話,依個將會係最後機會。