[有沙入眼]是咁的，我覺得我住嗰度有啲唔妥: 238晨曦
我抛起乒乓波，用滴滴仔發球。
個波喺虛空劃出弧度，跨越球網，好似帶我同月曦一齊穿越空間時間，翻翻過去。
紮住孖辮嘅月曦揮動又短又肥嘅手，拙劣咁迎接我開過去嘅波。
「哥哥又話幫我改英文名嘅。」
「都話你打得贏我，我咪幫你改囉。」有時做阿哥，都會咁蝦吓個妹。
「喂呀～聽日星期一喇，老師會問我架。」
嗰陣月曦升上一年級無耐，上英文堂嘅時候老師問佢叫咩名，佢答翻幼稚園一路用嘅「yuet hei」。
但老師話依個只係中文譯音，唔算英文名，所以叫佢諗個英文名上堂用。
月曦翻到屋企就問阿婆阿公叫咩英文名好，兩老因爲唔識英文幫佢唔到，所以就順理成章走嚟叫我幫佢改名。
「啱啦，你有一晚時間打贏我。」
「哥哥蝦人⋯⋯」
我地打咗幾個來回，月曦就接唔到。
雖然我都會失手，但計分比賽的話我總會打贏，話哂都大佢兩三年嘛。
「不如咁吖，我地一球決勝負！計分我實輸，但淨係一球嘅話我應該可以贏！」
「好好好，你話一球就一球。」
月曦好開心咁執起個波。
「你諗定我個英文名喇喎。」
「你贏到先算啦。」大蝦細畀屎餵。
「咁我開波喇！」
月曦放個波落枱，等佢彈起之後用球板兜過嚟。
噠。
「我打！」
啪一聲，我本身諗住發力一野打個波出界，點知符碌咁啱角度對正，個波飛過對面撞枱彈起，衝向月曦個額頭度。
「死火喇⋯⋯」
「嗚⋯⋯」月曦鬆手，球板跌落地吓。然後佢就揞住個額頭開始喊。
「阿哥蝦我！嗚⋯⋯」
我即刻放低塊球板跑過去攬實佢：「哎呀，對唔住呀！阿哥無心架，真係無心架，我啱啱諗住大力啲打出界輸比你架⋯⋯」
我用手搓佢額頭，陰公咯⋯⋯紅咗一噠。
「你呃我！你無幫我諗英文名！」
「傻妹。」我一野手刀哼落佢個頭度。
「你又哼我頭殻頂！」
我無視佢嘅抗議，拖住佢隻手，拉住月曦行去石枱一邊，指向外面嘅夜空。
「你睇吓，個月亮好圓好靚係咪。」
月曦捽走眼淚，扁住嘴望向我指住嘅純白月亮，點點頭。
「阿哥有幫你諗架，真架。個名就係月亮，因為月曦同月亮一樣咁靚靚。」
「叫Moon？」
我即刻忍唔住笑，又係嘅，佢只係小學一年級，淨係識月亮係Moon。
「笑咩喎！」
「笑你得意囉。好喇好喇，唔笑你喇。」
「咁我個英文名係咩呀？」月曦好似一隻等主人餵野食嘅狗仔，雙眼發光咁，已經無再扭計。
「係Luna，L，U，N，A，Luna。即係月亮咁解。係咪好聽過Moon呢？嗱，阿哥有幫你諗英文名架，唔好喊喇知無？」
我終於記起，月曦嘅英文名。某個打乒乓波嘅夜晚，我幫佢改嘅名。
腦入面「LU」之後模糊一片，化開嘅字體終於重新聚焦。
唔係Lucy，係Luna。
「咁阿哥你英文名又係咩？」
「我？你估吓。」
「係咪叫Sun呀？」
「唔係囉。我英文名係Dawn，D，A，W，N，Dawn。」
老師講過依個名好少男仔用，但我仍然堅持要用依個英文名。
「當？點解？」
係我地兩個個名，合埋嘅意思。
「即係晨曦囉。」
月曦「哦～」咁點頭，但好快又開始想喊咁嘅樣：「哥哥你個英文名有晨又有曦，好似我一直陪住你咁⋯⋯但係我個名得個月⋯⋯係咪即係你唔會陪住我呀？」
真係唔知好嬲定好笑。
原來月曦以前咁怕我唔陪佢。
「傻妹。」我微笑，因為聽到細妹不切實際嘅憂慮。
「唔駛驚，我會一直陪住你架，Luna。」
我會一直陪住你。
乒乓波喺月曦嘅半場彈起，但係佢無接到，任由個波彈向自己嘅身體。
個波好似放入熱水嘅白糖，同佢相融，回憶湧入佢嘅意識當中。
「共鳴成功咗喇。」防火牆喺旁邊靜靜宣布，達成任務嘅佢轉眼間就消失得無影無蹤。
最後嘅共鳴，只係咁簡單。
月曦無力咁跌喺地吓，我跑過去將佢抱起。
眼皮慢慢打開，視線聚焦喺我身上。
「係你呀？」
「嗯。你醒喇？」
月曦捽一捽眼：「醒喇。我發咗個夢，夢見自己喺個海入面⋯⋯」
「我知，唔駛講。唔好再講，嗰個惡夢。」
「唔係惡夢。我只係喺個海入面，睇到好多片段⋯⋯」
「片段？」啱啱融入月曦身體嘅乒乓波⋯⋯
「嗯。係你嘅片段。」
個乒乓波將我喺現實世界所做嘅一切，亦即係我嘅記憶，都送咗去月曦心入面。
就好似一開始我同吳非凡共鳴嘅時候，我可以睇到佢細個嘅經歷咁樣，月曦啱啱亦睇到我依廿年嚟嘅努力。
「所以我想講⋯⋯」月曦望住我：「辛苦你喇⋯⋯哥哥。」
我終於⋯⋯再次聽到個妹叫我一聲哥哥。
一首歌嘅前奏響起。
https://youtu.be/nwObYQkSC8w
代表終結嘅第三部曲，dear jane嘅〈經過一些秋與冬〉。
「你肯⋯⋯原諒我喇？」
月曦面容上，展現出多年未見嘅微笑：「我原諒你，你又原唔原諒我？」
我哼一哼佢頭殻頂：「阿哥一直都無嬲過你。」
「對唔住⋯⋯好多謝你⋯⋯」
系統播放重置之前嘅唯一一首歌，係第一曲，亦係最後一曲。
經過一些苦與瘋，沉鬱中，呆觀夜晚星空
揮去一些驚與恐，人生中，呆想著你面容
在某天心裡邊，悄悄的可發現
記憶之中全是，心意
全力去關心你，我用今世愛護你
無別個可媲美，痛亦不會再別離
唯獨有對不起，放在心裡苦等你
遺憾我永不心死，在等一線生機
「你一直，都係抱住咁樣嘅心情等我？」
我點頭：「而我終於等到喇。」
努力無白費，我真係等到喇。
今世都不想放手，常可想到，曾許誓約的那面容
那天她的笑口，最開心的眼眸
我與她勾了手，就因你快樂透
你今生都比別人，優秀
全力去關心你，再用多世愛護你
無懼再捉緊你，我願不會再別離
遺憾說對不起，痛像秋冬花紛飛
祈願你會想得起，讓我可有生機
「我想得起⋯⋯我知道你為我努力咗好多年⋯⋯對唔住呀⋯⋯阿哥⋯⋯」
我為佢抹去眼淚。
「要講對唔住嗰個，從來都係我。」
所以，唔好喊喇。
知那天的背影已別離
不再可溫暖你的心扉
後悔如我遍地
重聚再關心你，我是想再愛護你
重聚再捉緊你，渴望不會再別離
重聚說對不起，你是否可不心死
遺憾是我不心死，遺憾我永不心死
願某天我跟你
可相見沒唾棄
依個願望，我終於都實現到喇。
我地真係，可以向對方展現再無芥蒂嘅微笑喇。
所以。
「乖，唔好喊。」
經過一些秋與冬
「嗯。」月曦抹走自己嘅眼淚。
回憶中
我抹走自己嘅眼淚。
晨曦綻放笑容
我地兩個，笑起上嚟。
就好似遙遠嘅昔日，打完乒乓波嘅兩個細路仔咁。
網絡篇章完結
購買電子書︰https://play.google.com/store/books/author?id=%E5%81%9A%E9%87%91%E5%BA%B8%E7%9A%84%E7%94%B7%E4%BA%BA
購買實體書︰https://www.enrichculture.com/products/9789881468635
電子書及實體書含真實結局
