[有沙入眼]是咁的，我覺得我住嗰度有啲唔妥: 237獻上美夢

「重置會用幾多時間？」

「最長只會有十分鐘。」

「咁就得喇。」

「吓？」

「戲院唔屬於遊戲重置範圍入面。有十分鐘夠哂我帶月曦去嗰度。」



當初會加入戲院，就係為咗同月曦睇我整嘅恐怖片。嗰陣我唔知要等幾耐，月曦先肯陪我玩依個遊戲，所以為咗防止遊戲重置之後啲紀錄片會無哂，我特登將戲院移出重置範圍外面。

防火牆有啲訝異，「哦～」咗一聲，最後終於將塊乒乓波板交畀我。

「咁好啦，之後就靠你拉佢翻過嚟喇。」

「其實點解你唔直接還翻啲記憶畀月曦？」

「我只係防火牆，無歸還記憶嘅權限。必須要你同佢共鳴先可以喚醒月曦嘅記憶。」



「原來係咁。咁其實我用製作人權限，又可唔可以清除記憶體，等佢多啲位，咪唔會重置囉。」

「你清除唔到所有同系統直接有關嘅事物。你可以清除NPC，但清除唔到我，因為我係同系統直接聯繫嘅防火牆。記憶體同系統都係直接相連，所以你無辦法清空記憶體。」

「即係我真係得最後一次機會拉翻我個妹嘅意識過嚟啦？明架喇，多謝你幫我。」

「我只係做自己要做嘅事，唔係幫你。」

「一樣啫，解釋咁多野我知已經係幫咗架喇。」



雖然只係咁啱利害關係一致，防火牆先至睇落似幫咗我，但我都想多謝佢。起碼佢將個情況一五一十講完我知之後，仲話我聽應該點做。

「最後問你一個問題，第三個人，係邊個？」

「我唔清楚。」

「唉，預咗。」

我執起地上嘅乒乓波。

終於到咗最後喇。

「真係好咩？」我準備行去波枱就位，防火牆突然好似自言自語咁問。

我轉身：「咩意思？」



「拉月曦嘅意識翻嚟，真係好咩？」

「將佢嘅意識送翻去現實，又真係好咩？」

「我只係防火牆，太深嘅問題唔識答。但你唔知月曦嘅心意到底係想翻去定留喺度。而家嘅一切都只係你決定，或者月曦翻去現實先更加開心呢？」

「你真心覺得，佢翻去現實做植物人，眼前只有黑暗，手腳完全唔郁得，連自己係生存緊定死咗都分唔清嘅月曦，會更加開心？」

防火牆無言以對。

「或者科技一路進步，有一日可以將植物人醫翻好，但起碼而家仲未做到。既然係咁，起碼喺真正醫翻月曦之前，我想佢一直留喺幸福嘅夢入面。」

一諗到月曦要獨自面對黑暗同惡夢，我個心就會好痛。



至少，容許我依個不受認可、為錢放棄親人嘅阿哥，喺佢嘅黑暗之中點燈，獻上美夢。

「原來係咁⋯⋯啊⋯⋯有少少，羨慕人類。」防火牆合埋空洞嘅雙眼，一道血痕喺佢面頰滑落。

「唔好羨慕，人類好醜陋，我都係。」

「我知道。但因為醜陋，嗰啲僅餘嘅美好，睇起上嚟就特別耀眼。」

防火牆微笑，原來佢合埋眼笑嘅樣，都唔係咁恐怖啫。

「開始啦，金月晨。」

為你最重要嘅人，獻上美夢。

－－－－－－－－－－－－－－－－－－－－－－－－－－－－－－－－－－－－


網路結局篇︰星期日晚上八點