《聽說她是一隻Hell雞……》: 第八節

呢一堂，我一如以往，乜書都冇聽過，一係就光明正大咁望佢抄碌屎個認真樣；一係就扮專心聽書然後偷望佢抄碌屎個認真樣，所以我覺得我簡直係對唔住供我讀大學嘅雙親，我又浪費咗一堂Lecture。
 
過咗冇耐，教授講左句：「This is the end of our lesson，see you in next week！拜拜！」此言一出，成個Lecture開始嘈吵起嚟，而我同佢亦都開始執嘢。
 
「不如一齊去印Note，跟住去食Lunch啦好嗎？」佢問。
 
我嘅反應完全係喜出望外，估唔到佢竟然會約我食Lunch，但我又不禁懷疑佢係咪下一步會Sell我……不過當時我梗係冇諗咁多，口快快一嘢應承咗：「好呀！」完全唔記得咗今日約咗Kevin條契弟食Lunch……
 
當我察覺到Kevin件事嘅時候，我同Candy已經行咗出學校，不過我諗Kevin都未放，所以唔打俾佢住。
 


行吓行吓，我哋嘅話題都係圍繞住閒話家常，Candy冇提及佢自己嘅生活，我亦冇去問。
 
忽然我褲袋震咗幾震：「Pretty的辣妹Baby、Sexy的辣妹Baby，Tell me what's you name baby……[1]」
 
佢一聽到我鈴聲又笑到掩住咗個嘴，我拎起電話一睇，不出所料，果然係Kevin。
 
「喂，咩事？」我行埋一邊，而Candy亦好識趣咁企定定喺度等我。
 
「你喺邊呀撚樣？」
 


「喂唔好意思呀，今日唔同得你食。」我道歉。
 
「我屌撚爆你老母！我推撚咗十幾條女、紓尊降貴同你食飯，你竟然放我飛機？」Kevin喺電話另一邊好大聲咁話。
 
「唔好意思呀大佬！我阿媽急病入咗醫院！我依家趕緊去。」跟住我扮跑緊步喘緊氣。
 
「屌你呀！咁洗唔洗匯住五萬蚊過嚟俾你做手術呀！」Kevin呢句說話似曾相識。
 
「得得得！下次果餐我嘅，Okay？」
 


「好，殺鳩你！下次再放我飛機我斬你全家呀仆街仔！」Kevin講完就Cut咗線。
 
我收埋咗部電話之後就同Candy講：「唔好意思呀要你等咁耐。」
 
「做咩咁鬼鬼鼠鼠呀，女朋友嚟？」Candy笑笑口咁問。
 
咦？佢從來都唔會問我呢啲問題㗎喎，唔通佢呷醋？
 
參考：
[1]英皇新秀：http://www.youtube.com/watch?v=UITzWlYD8v8