《聽說她是一隻Hell雞……》: 第九節

「梗係唔係女朋友啦，我都冇女朋友！我個Friend打俾我咋嘛。」我立即澄清，表示自己單身。
 
「哦……係咩？」
 
「係……」
 
「……」Air已Dead，我哋亦減慢步速，果一剎那真係好很尷尬。
 
三秒之後，我打破沉默：「係呢，今日食咩好？」
 




「商場好似開咗間新舖，我想試吓呀。」Candy雙手合十、笑瞇瞇咁講。Candy真係好鍾意笑。
 
「好，就咁話。」我爽快答應。
 
喺呢九個字嘅Lunch time入面，時間一樣過得好快，我哋雖然冇再Dead air，不過彼此心底亦有個共識，就係我哋之間嘅話題唔可以太過觸及對方嘅私人生活，今日佢犯咗規，情況就會好似啱啱咁。
 
食完之後我送咗佢去上堂，自己就返咗Hall上高登，我盡量唔俾自己太多時間同機會去諗佢，因為太多外在因素阻隔住我哋。
 
雖然，我有幻想過同佢一齊之後會點、其他人會點睇我哋等等……但始終我自己青頭毒撚一名，我當然接受唔到自己女朋友係一隻Hall雞，只不過將來嘅嘢冇人知道，我只能夠見步行步。
 




時間過得好快，轉眼間夜幕已經低垂。
 
就喺我沖完涼，十點幾鐘果陣，我部手機突然傳嚟一吓提示聲，我心諗：「唉屌，三台又Send啲垃圾廣告訊息嚟。」跟手拎起部電話一睇，原來係Whatsapp，邊個咁好興致搵我呀？九成都係問人哋電話或者問Assignment幾時Deadline。
 
我拉低條Bar一睇，哇屌你！Candy嚟嘅喂！