果日由於我Plan得非常精彩絕倫,所以最後玩得晒八個鬼屋,由上山玩到落山。
 
我哋落到山嘅時候,個天已經黑晒,之後隨住人流愈嚟愈多,我哋展開咗好漫長嘅排隊之旅……
 
果陣我哋準備玩嘅係「鬼魅冥婚大殿」,間鬼屋分開兩個部份,第一部份係一間房嚟,一開頭會有一條走廊俾我哋行,左右兩邊有啲著晒唐裝嘅假人企咗喺度,入面成間房都係啲紅色燭光,氣氛詭異。
 
我仲好記得佢未嚟玩之前佢講過:「我最驚係中國古代果啲鬼,即係塊面好白,面豬燈又有兩點紅點果啲……」
 
而鬼屋嘅另一部份,會分開男一批女一批咁玩,所以我會同其他男仔一組,佢會同其他女仔一組,我心諗:呢獲仲唔嚇死你?
 


我目送咗佢背影入咗間鬼屋,而我亦都入咗另一間鬼屋。
 
過程冇咩特別,出到嚟嘅時候我已經見到佢係出面等緊我。
 
「車,呢個都唔恐怖嘅,我一啲都唔驚。 」佢一見到我就講呢句。
 
「吓?啱啱明明仲有人嗌到鬼剎咁嘈㗎喎。」我不忘揶揄吓佢。
 
「之不過啱啱有人俾我依賴住,所以我先會咁驚。」佢停咗一停,又講:「依家我要靠自己,所以我唔會再驚。」
 


果然,之後我哋玩嘅鬼屋,佢都冇嚇到尖叫,亦都冇再捉住我。
 
對Candy嚟講,我係咪只不過係一個依靠,獨立咗之後就唔再需要我?我係咪只係一個普通朋友?每一次我同佢拉近距離,佢都有意無意咁避開咗,到底我對你嚟講算係啲咩?
 
果一刻,我冇諗到咁多,只係諗住盡情享受埋今晚。