《聽說她是一隻Hell雞……》: 第二十六節

我哋玩完「鬼魅冥婚大殿」同埋「古墓凶靈」之後就去咗食嘢，中間發生咗一段小插曲。話說我哋未入海洋公園之前買咗兩支水放咗喺Candy個袋度，由於佢個袋好重，我唔忍心叫佢自己孭，所以我全程都幫佢拎袋。
 
去到食完嘢果陣我就問Candy：「你口唔口乾？洗唔洗飲啲水？」
 
「好呀。」
 
「我幫你拎啦。」於是我就打開咗佢個袋諗住拎支水出嚟，點知佢一嘢搶走咗個袋，個樣好尷尬咁話：「唔好睇入面啲嘢啦。」
 
佢呢個動作完全出乎我所意料，會唔會係佢個袋入面收埋啲唔見得光嘅嘢？例如Con……於是我即刻話：「唉，驚咩吖，有咩唔睇得啫。」於是一手拉開咗條拉鏈睇，只係見到入面有幾塊M巾。
 




「都話唔好睇囉！」Candy好嬲咁講，然後好快咁拉返埋個袋。
 
「對……對唔住……」我知道自己啱啱一時衝動做錯咗，唯有即刻扮死狗。
 
「做咩要咁做啫！」Candy對住我發脾氣：「你有冇理過我感受！」
 
「對唔住呀Candy，冇下次嘞，原諒我啦冇好？」我嘗試用誠懇嘅態度平息佢嘅怒火，女仔嚟M果陣真係唔惹得。
 
「哼，係先好！」Candy總算係原諒咗我。
 




果一晚我哋玩剩兩個鬼屋，一個係「5D地獄不歸路」；另一個係「全院嚇滿」，英明神武嘅我帶咗佢去玩前者，而巧合地果個鬼屋出面得小貓三四隻，事前又大肆宣傳話咩「Yahoo!特別呈獻」，點知完全冇人玩！不過個鬼屋都算係幾大而且幾好玩，又唔洗點排隊。
 
玩完之後剩低一個「全院嚇滿」，但我見出面條龍長過劉翔，加上我哋有張優惠券吸咗印可以打尖，但要等到十點之後先可以用。
 
好明顯，果陣未夠鐘啦。
 
之後我問佢：「橫掂未夠鐘，不如去睇啲哇鬼Show啦。」
 
「好呀，你話事。」佢笑住咁答，應該冇再嬲啱啱果件事。
 




之後我哋就去個大型舞台睇Show，老老實實真係幾Q悶吓，但我見佢好似好投入咁，所以都冇出聲。過咗一陣，我真係頂唔順，講：「Candy，不如周圍行吓囉。」
 
Candy諗都冇諗就講：「好呀，我都想。」之後我哋就周圍搵啲鬼去影相、Hea時間。
 
女人嘅心思真係好細密，其實Candy都好悶只不過冇講出嚟……