我屌你老母！你做乜撞鳩我？: ＃2 【懲罰】

我呆左一呆，仔細望下佢。的確佢無濃妝豔抹，戴上一副圓碌碌既眼鏡，更添幾分可愛。
 
但我可以話你知，佢一定唔化妝靚過化妝！
 
『哇！原來就係佢地呀？』
『上左Youtube嗰兩個呢，估唔到佢地係我地學校架喔！』
 
圍觀既人越黎越多，搞到我都唔知點好……
 
「估唔到我地學校出左個喊包。」佢一臉鄙視既模樣。


 
頂你好講唔講講呢樣……全場每人發出小小既竊笑聲，都可以變成演唱會般既喝采聲。
 
「喂……你！」我諗唔到咩野駁佢，畢竟我口才真係唔好，如果唔係點會俾人恰？
 
「你你你你…你咩姐！」佢不忿，「我同你有咩仇呀，撞完一次又一次！」佢直接走過黎揪起我衫領。
 
我俾佢嚇一嚇，因為佢真係成個人揪高左我。第一，佢細細粒咁，我高佢成個頭。第二，佢弱質纖纖咁，咁有力揪起個？
 
「停，有咩事都好，唔好郁手！」呀亮見風頭火勢，一個箭步就衝左出黎。


 
「你又老幾呀！？」呀亮捉住佢隻手，但好明顯都俾佢個氣勢震懾左。
 
「小姐，只係唔小心撞左你一下姐，無謂小事化大呀？」呀亮特登講重「小事化大」呢四隻字。
 
「好！咁你地諗個賠罪方法俾我，就當無數。」
 
挑你老尾！成個大佬款，呢道氣真係啃唔落。
 
「屌你老尾，撞你一下係咪要以身相許呀？」我頂佢唔順，逼上梁山，發揮出我內在既潛能。我後來諗返都唔明點解自己咁大勇氣。


 
『咪係！』其中一個花生友幫我平反，但好細聲，走住黎屌嗰類。
 
「妖！就算係呀，睇你個死款都唔敢架啦！」
 
「頭先邊個講粗口？」一把粗壯既男人聲從後傳黎。
 
『壯Sir！』眾人齊聲道。
 
仆街啦，咁多條友唔黎，係黎呢條咸濕佬。
 
佢一黎到，全場安靜曬。因為其他人見到老師黎，已經走撚曬。

全部人走曬，係得返我，壯Sir同嗰條女係度。無曬花生友，就連森仔同呀亮都閃左水。
 


「你地跟我過黎！」壯Sir嚴肅咁講。
 
我地落到去無人既視聽室，我地企係台上面，而佢就坐係中間，成個大佬咁款。
 
「頭先邊個講粗口？」
 
我地互相指住大家，佢囉佢囉！
 
「唔認啦嘛？」佢重申多次，我好唔鐘意佢呢種態度。
 
「咁我自己決定架啦。」佢講完嗱嗱林接下一句。
 
「平時思詩份人好乖，又聰明，點睇都唔似係講粗口架啦！」壯Sir字字鏗鏘，扭曲曬個事實。
 
「而你呢，莫治，成日同沙皮佢地玩埋一堆，都唔方好得去邊架啦你。」壯Sir步入中年，屈人既技巧越黎越On9。


 
「呀Sir，同沙皮佢地玩有咩問題？佢地好有義氣。」我真係唔忿氣。
 
「哈哈！」佢冷笑兩聲，「義氣？」
 
「佢地係有義氣呀，頭先就唔會走左去啦！義氣！」
 
「出自古惑仔典故，靚坤有云：『義』字拆開係咩呀？我係羔羊呀！你俾人玩咋！」
 
「壯Sir，撞親人姐，洗唔洗咁呀？」得啦，我知我鬥唔過，因為我無睇古惑仔……
 
已經輸左一大截，依家更加唔係同佢唇槍舌劍既時候。
 
「你撞親人搞到人地講粗口呀！如果唔係你撞親佢，佢點會講粗口呀？」
 


壯Sir向思詩單左下眼──扯貓尾！
 
「得！咁Sorry好未？」我同壯Sir講。
 
「問我做咩姐，同我講做咩姐？同佢講呀！」佢指一指思詩。
 
忍！忍住！唔好爆出黎……
「係！」我對佢超無禮貌，我知道，對住呢啲人，唔好同佢硬碰硬。
 
「Sorry，你想點罰我呢？」
 
「Ummmm……係操場罰企啦！Now。」佢瞪著我。
 
「下？依家？」好猛太陽喎，會死架。
 


「梗係啦，夜晚呀唔通？」
 
就係咁……我係操場企左成粒鐘。
 
一返到課室，全班安靜曬…個個唔出聲，望一望森仔同呀亮，佢地只係一臉既無奈。
 
從佢地既表情話俾我知，無好野發生。
 
我再望一望自己角落頭既座位，先知道奶野。
 
書包啲野俾人倒曬出黎，書枱俾人反轉左，四角朝天。
 
我第一時間衝過去問森仔佢地，「做咩唔幫我整返好佢？做咩唔制止佢？」
 
用個龜頭諗下都知係邊個做架啦，估唔到佢真係玩咁大姐。
 
「頭先整你張枱既，唔係女仔黎架，係男人黎。」森仔解釋。
 
「下？男人？係咪高高大大咁架？」
 
「係呀。」仆街，佢條仔。
 
「你好惹唔惹，惹呢啲人，想幫你都難啦治兄。」呀亮講返句公道說話。
 
真係好撚嬲，未試過咁嬲。
 
我默默咁執返好自己張枱，淚水伴隨左委屈一同流曬出黎。好彩無人發現，點解自己會咁俾人恰到咁？
 
坐已經係自己坐，除左森仔同呀亮，我係班上面已無朋友，沙皮又係隔離班…
 
思詩呀！我記住你！
 
呢個仇，我一定會報！睇住黎啦屌你！