噩夢,不經不覺間已經開始

  「喂,夕源,醒啦!」

  我張開眼睛,逐漸清醒過來。

  「呢度係…係咩地方嚟」

  這裡的環境只能以幽暗形容,四處只有無盡的黑暗。





  忽然,身旁的光線捲入眼簾,十分刺眼。

  「你醒左喇?」身旁的那個人先開口。

  「阿…阿虹?乜…乜係你呀?其…其他人呢?」口吃的問題仍然嚴重。

  「佢地?我都唔知呀!」

  說罷,海虹把燈光照向這個「空間」。終於,也看到了他們。然而,他們都背對著我們,彷彿在私下談甚麼似的。





  「喂,你地喺度傾咩呀?」她的提問,並沒有得到答覆。

  「喂,我叫你地啊!」她繼續說。

  良久,他們幾人終於也轉過頭來,看著我們。但是,他們的臉上都顯露出驚慌的表情,身體明顯地顫抖著。

  「殊,你地唔好咁大聲啦!」阿強的聲音非常不穩定,震動不已,臉上猶如寫上「害怕」二字。

  「究…究竟發生咩事呀?」看到阿強也流露出如此害怕的表情,我也不禁緊張起來。





  此時,阿強吞了一下口水,準備開始解釋。我和海虹也聚精會神地留意他。

  他開始解釋道:「喺我地執緊書嗰陣,咪突然間有下閃電特別閃嘅!當時我真係被佢嚇到阿媽都唔認得。之後我冷靜落嚟,諗住走人架啦。點知你兩條友又暈左喎,梗係即刻叫醒你地啦!之後先發現,度門好似被人封左咁,點撬都撬唔開,最恐怖嘅係,連窗都被人封埋,直程成間房都被人封鎖咁!

  原本呢樣野都夠得人驚架啦,點知隔左一陣,連燈都熄鳩埋喎!今期真係黑過墨豆啦!」說到這,他的面色越來越難看,我們緊張的感覺以幾何級數上升。

  「咁…之後呢?」海虹插問了一句。

  「之後我地幾個咪圍埋一齊傾下點算囉!點知我諗住同啱啱帶我地嚟嗰條友傾嗰陣,先醒起佢一早走左。」

  「咁…咁點算呀?」我不禁加插問。

  「我點撚知呀!講番正題,我當時直接忽略條友,繼續講點樣離開呢度。突然,我地都隱約聽到啲叫聲,而且唔只係叫聲咁簡單,仲係慘叫聲。我聽到啲慘叫聲冇停過,咪向住叫聲嗰邊聽清楚啲囉!呵,你地知唔知我之後聽到啲乜呀?」

  「講你就講啦!」我不滿地回應。





  「依家講依家講。我聽到有一堆聲『噠噠』聲咁震動,聽清楚啲,至發現係一堆腳步聲,而且越嚟越大聲。之後…度牆突然『呯』一聲,好似被某樣野撞埋嚟咁,仲要不停咁撞,搞到我心都寒埋。好彩過左一陣,啲腳步聲越走越遠渣!」此時,身邊那二人都紛紛點頭。

  驀地,一言不發的詩敏也說:「係呀,門口無啦啦有野撞埋嚟,我差啲嚇到嗌出嚟,好彩阿強及時㩒住我,我先冇嗌到。睇嚟,拍門嗰啲人都係不懷好意。」

  「咁點解你地唔開燈呀?」海虹一臉疑惑。

  「癡線架咩?我都驚到唔敢郁啦,仲點敢開燈啊!」

  聽過他們的情況後,海虹發言道:「照你地咁講,拍門嗰啲人,係嚟捉我地嘅?」

  「好可能係。」阿強接道。

  語畢,我們陷入了緘默狀態。此時,眾人都專注地看著海虹,因為只有她擺著沉思的表情。然而先打破沉默的,並不是她。





  「其實,喺啲燈突然熄之前,我留意到兩樣野。」口齒不清的他,顯得特別認真,我們四人也同時把視線轉向建鴻身上。

  「首先,我發現呢度吊住嗰部電視機好似顯示緊一啲野。第二,呢度其實唔係完全密封嘅。」

  「可唔可以講得詳細啲呢?」海虹忍不住問。

  建鴻繼續解釋:「嗯。關於電視機方面,我有一直留意住,原本喺呢度未被『封鎖』之前,部電視機係閂住嘅。但係當間房被封鎖之後,部機好似自動開左咁。其實,部機到依家都未熄過。」

  說罷,海虹把燈照向原本電視機的位置,果然,右下角顯示著綠色的光點,營幕的右上角顯示「0」,似乎在打開的狀態。然而,屏幕上只顯示「0」的字眼,並沒有顯示其他的東西。

  「車,乜都冇嘅,又話開左!嘥氣!」阿強一臉不滿。

  「會唔會係唔…唔啱channel啊?」我提問。

  「未必,因為我嗰陣真係見到啲野,不過非常模糊,睇唔清楚。不過呢度似乎都冇遙控器,證實唔到部電視係咪真係有其他用。」建鴻簡單的回答。然後繼續道:「至於關於間房唔係完全被封鎖嘅事,我就清楚啲喇!」





  「點清楚法呢?」海虹像查問建鴻般。

  「因為…我親眼見到一個神秘嘅出口。」

  「嗄!認真咩?做乜啱啱唔撚同我地講呀?」阿強顯得暴燥。

  「我諗住等佢地兩個醒左再講啊嘛!講翻正題,呢個神秘嘅出口,都唔可以話好神秘,只係喺『封鎖』之前冇出現過。而呢個出口,就喺嗰邊。」說罷,他用食指指向原本門口的右側。

  巧合地,這個方向正是我們剛走來的那個。

  「這條路會唔會通番去我地行過嚟嘅走廊呢?」海虹再提問。

  「唔知架,不過睇嚟淨係得番呢條路可以行,點都要博一博架啦!」





  「咁仲等咩啊,起程啦!」阿強此時臉上竟露出一副興奮的表情。

  難得眾人都舉腳贊成,卻又被人截住了。

  「咪住先!」

  眾人再次把目光注視在這個人身上,她見此狀,立即托一托眼鏡,假裝是推理小說中的主角般開始說道:「其實,我已經估到我地發生呢啲野嘅原因。」

  「真係架海虹,咁究竟發生咩事呀?」詩敏倏忽顯得特別激動。

  語畢,我們四人再次冷靜下來。

  「其實我都唔夠膽肯定,呢個只係我個人嘅推測。首先,我認為成件事都係由帶我地嚟嘅四眼仔搞出嚟。」她吞了一下口水,並緊接道:「喺6點半左右,我地咪喺樓搵書嘅。之後我地搵到7點幾都搵唔到一本,於是去左自修室休息。跟住四眼仔帶我地嚟呢度搵書,直到依家發生嘅事,都非常匪疑所思。好似由我地見到佢之後,就發生呢啲咁奇怪嘅野。」

  「嗯,又好似係喎。唔怪得佢一早走左啦!原來係佢…」阿強一副終於明白了的樣子。

  「不過,我覺得佢特登引我地入嚟,唔係想害我地。」

  這句話,讓所有人懷疑了。

  「唔乸係掛,咁都唔叫害我地,講唔通喎!」阿強代我們說出問題。

  海虹繼續解釋:「其實我咁講,並唔係冇根據架。如果淨係間房被鎖嘅事,可能真係會害我地。不過你地話過停電嗰陣,有人撞度門,而且聽到外面有人慘叫?」

  「嗯,的確。」建鴻簡單應道。

  「我認為撞門嗰班人,至係元兇。我嘅假設係,班人唔知咩原因突襲呢度,之後佢地可能威脅出面嘅人,搞到佢地慘叫。然後佢地發現呢條通道,走左入嚟,之後撞門,想捉埋我地。所以,我覺得個四眼仔係想幫我地,等我地唔好被班人捉。」

  「嘩,有冇咁誇張呀?你唔好吹大啲?」粗獷的聲音覆蓋整個房間。

  「不過呢個只係假設姐,咁都要出到去至知發生咩事嘅!」海虹補上一句。

  「咁…咁走喇。」我提議。

  「好。」眾人紛紛贊同。

  終於,我們也踏上了這個唯一的出口。踏進出口,似乎與房間無異,漆黑一片。可是,這裡卻是眾人的希望。

  至少,現在還是。
已有 0 人追稿