「返工多唔多靚仔丫?」

同皓傑傾下公事…

『都有D既~有一兩個幾靚仔~不過仲細過我一兩年~有個阿頭幾似王浩信架~不過人地有家室Luu~仲有一對仔女添~咁你呢?身邊有無D靚女圍住丫?』

又問下皓傑既近況...

「我?無啦~你幾何見到我Facebook有女仔出現?」





『我邊得閒留意你Facebook咁多~』

又扮下野咁…

「仲係唔係好似以前咁咁唔小心跌書落地?」

又講下舊事...

『我嗰時係有心喺你面前整跌D書~等你過黎幫我執架~你唔係到而家都唔知丫化?』





又講下以前D衰野…

「有無見過D舊同學?」

又講下一D過左去既人...

『舊同學丫...都好少見Luu~不過都有WhatsApp下既~好似ManYan囉~我同佢仲有幾個好姊妹開左個Group~不時都有聯絡~得閒仲會約下出黎既~』

又講下班姊妹...





「係喎…你同ManYan一齊入I大架喎~佢點丫?係唔係仲係咁靚女丫?」

又問下ManYan既近況...

『佢仲靚過之前啦~身材又好~』

又讚下ManYan...

「咁厲害?咁咪溝死仔?當年你同佢兩個都係我地既校花黎架喎~成個區D學校既男生為見你兩姊妹一面而慕名以來架喎~」

又講下以前D威水史...

『過左去喇~過左去喇~你睇我而家~都仲係好似當年咁成個學生妹咁~又唔高佻~又無四十二吋長腿~要大既地方又唔大~一D女人味都無~你睇我而家著Suit都唔似OL~十足十I大嗰時做Presentation咁~』

我又扮下謙虛...





「學生妹先正丫~高登仔話識得揀一定係揀不食人間煙火既學生妹~」

又講下高登仔...

『人間煙火都唔食,唔通佢會食你條蕉咩~』

又扮下James講野...

「食你舊和牛啦~」

又食下野…

『我想食你嗰舊多D~』





又夾下皓傑D野食...

「你都仲係咁鍾意食人地D野~」

『隔離餸香丫嘛~』

「人家老婆特別靚~」

『哦~原來你鍾意人妻既~』

「不可貪戀別人的妻子喔~」

『扮晒野丫你~美女廚房~食左先講~』

一邊食又一邊傾~我地都傾左唔少野~又食左唔少野~





傾左好多過去現在既野~又食左好多貴價野~

但你話我地係唔係傾返晒呢十年黎大家各自各既生活點滴?我又唔覺真係傾得咁深入~

我地都係傾得...好皮毛...

總係唔入心...唔入肺...

係我地想淺入深出?定係大家都刻意避開D深入既話題?

我都唔知...

我只係知道呢一餐晚飯既期間...我同皓傑既相處黎得自然...





久別再聚...無預期嗰種...尷尬...

初初應承皓傑出黎聚聚舊既時候...仲喺道諗會唔會有D尷尬...有D唔好意思...有D面阻阻...會唔知講乜好...

仲擔心到可能會尷尬到無野講...唔知講乜好...

但而家...我地又好似無乜野咁...好似好自然咁...

只係D話題好似...好似真係差梗D...差梗D深度...

就好似一直都係門外掃下掃下...打轉打轉...

硬係唔敢嘗試用力一插…插到入心入肺...

“若果你 未覺...”皓傑部放喺檯面上既iPhone響起...

「唔好意思...」皓傑拎一拎起部電話接聽,「喂...我係...嗯...嗯...知架喇...嗯...唔該晒...拜...」

等到皓傑收左線之後,我又八八卦卦咁問一問:『邊個咁夜丫?』

「無~航空公司打黎提我聽朝飛去冰島咋嘛~」皓傑扮晒認真咁~

『你講真架?你真係飛去冰島丫?』我又扮晒傻咁追問~

「真架~我講真架~你當我講笑架?」皓傑仲係扮晒認真咁~

『痴線~你當你真係Juno咩~』我恥笑一下皓傑~

「你唔俾我係周國賢既?」皓傑笑一笑~

『周國腎就有你份~』

「哈哈~真係去個廁所先~唔係就真係周國腎~」皓傑起一起身,行去洗手間~

望住皓傑行左入洗手間之後...

我鬼鬼祟祟偷偷地拎起皓傑部iPhone...

望住個Lock機畫面...四位數字既密碼...

唔...四位數字...應該係乜呢?

會唔會係...

反正又唔會錯一次就鎖機~試下先~

我喺個密碼鎖上輸入左我既生日日期...

畫面立即解開!

果然~呢個傻佬仲係用我既生日日期做密碼~

不單止係電話既密碼...就連E-mail~ATM~都係用我既生日日期做密碼~

唔同既,最多都係加埋個年份落去~

呢個傻佬...咁樣好唔安全架嘛~

真係好傻~

都係唔好諗咁多~一陣皓傑出黎見到我拎住佢部電話就麻煩~

我快快手手打開個錄音App~再對住個咪:『很感激 喜歡我十年仍 不 休 』

再快快手手轉埋做鈴聲~Lock返部機~放返喺原位~

搞掂~

你咁鍾意做Juno...就等我完你心願啦~

事實上...我諗每個等左女神十年既男仔...已經唔係再為左等一個可以喺埋一齊既機會...

一個男仔喺一個女仔身邊守護左十年...為既可能只係...

只係想喺佢開心既時候可以俾佢開心share~

唔開心又可以借個膊頭俾佢喊~

嬲既時候又可以借個心口俾佢出氣~

唔知點揀好既時候又可以俾d意見佢~

得閒做下佢既樹窿~又做下木屋為佢遮風擋雨~

而最後...男仔最想得到既...可能都只係...

一份感激之情...

感激你對佢既愛...

一直以黎不離不棄不捨既愛...

只要個女仔係知道...係感受到...個男仔就死而無憾...

或者你會覺得好傻好痴線~

之但係...深愛著一個唔愛你既人,十年...本來就唔係痴線咩?

我靜靜地咁坐喺道~

乖乖地咁坐定定~

扮晒無做過任何衰野咁等皓傑返黎~

過左一陣又過左一陣,終於都見到皓傑由洗手間行返出黎~

我就繼續扮晒無野咁問一問:『咁耐既?搵唔到丫?』

「梗係唔係搵唔到啦~係太大條好難控制丫~」皓傑又扮晒勁咁~

『太大條咩丫?皮帶丫?』我恥笑一下皓傑~

扮乜鬼野丫~扮晒大支野~

「咪就係條皮帶囉~唔係你以為咩丫?」皓傑又恥笑一下我~

『我以為你想講衰野丫~』我谷一谷起塊面豬登~

「我先唔會講衰野丫~」皓傑扮晒正經咁~

『咁正經無女仔鍾意架~』我嘆一嘆息咁擰一擰頭~

事實上...有好多男仔成日都話:『點解我對佢咁好,佢都唔揀我?揀個死MK!』

係~你真係好好~

成日叫我小心D~凍就著多件衫~病要記得食藥~早D瞓~瞓多D~過馬路唔好顧住睇部手機~

又體貼入微~又無微不至~又噓寒問暖~

十年既童話故事幾咁浪漫~

之但係現實D黎講...你同老豆又有乜分別呢?

現實就係咁現實~

我係要一個會氹我開心~會有驚喜~會俾到浪漫我~會令我有愛既感覺既男朋友~

就算你有幾暖都好...你都俾唔到呢種感覺我架...

你要知道...我唔係要老豆丫...

老豆...

「唔...」皓傑諗左一諗,「你有無聽過灰兔同白兔既故事?」

『灰免同白免既故事?』一時之間我俾唔到反應...

「嗯...是咁的...白兔長...」就喺皓傑正要講故事之時...

“典 經 法 為邪定界 色 空 相 怎樣理解 解 亂置好與壞”電話響...

係我既電話響...

『唔好意思~』我拎起部電話望一望...係阿Ken喎...『喂~咁得閒打俾我丫~』

「喂~咁我個人見人愛車見車載超級靚爆鏡無敵索死人既女朋友同Ex出去食飯喎~梗係擔心到要打黎打聽下架啦~」阿Ken扮晒緊張咁既語氣~

『下?乜你會架咩?今朝都唔覺既?』扮晒野咁~你唔係好放心~甚至係唔上心架咩?

「我緊張你係喺個心入面架嘛~唔通下下講出口講到Cheap晒咩~你就緊係唔覺啦~你都無我心既~」阿Ken又扮晒慘咁~

『係丫係丫~實係啦~』阿Ken可以咁肆無忌憚咁講埋D肉麻野~身邊一定無人啦~

之但係我就唔可以喇~話晒面前有皓傑喺道...

點都唔可以講得太過露骨既...

「係丫係丫~點丫?幾時返去丫?」阿Ken又問一問~

『唔...差唔多架喇~』做乜丫?真係想Check住我?

不過又真係差唔多係時候返去~

「嗯~咁你小心D啦~我都差唔多要收線架喇~」阿Ken關心下我~

『嗯~咁你都小心D丫~』呢D關心又唔係老豆嗰隻喎~

「錫啖我先~」阿Ken扮晒嗲咁~

『點丫?』玩野丫嘛?

「錫啖我先囉~做乜丫~喺Ex面前唔方便丫?」阿Ken仲要繼續玩...

『係丫係丫~唔講喇~係咁啦~』

「好~~~聽晚你就知死~~~」

『好丫好丫~係咁啦~』

「嗯~拜~」

『拜~』

呢個阿Ken真係丫...成日都係咁~

「你都仲係咁鍾意謝安琪...不過你都幾搞笑架喎~用諸神混亂做鈴聲~」皓傑恥笑一下我...

『下?謝安琪丫嘛~周國賢丫嘛~岩晒你啦~』我又恥笑一下皓傑~

「點丫~不過你唱起歌上黎把聲都真係幾似謝安琪既~」皓傑又笑笑口咁諗一諗...

『係丫係丫~』到你電話響既時候就真係似喇~

「夠鐘交人?」皓傑問一問...

『Er…唔係唔係...佢今晚要當值...不過我諗都差唔多係時候...要返去...』差唔多喇...

「嗯~咁埋單~唔該~」皓傑叫一叫人埋黎...

都真係差唔多係時候...

已經有D夜...呢道返去都要D時間...

一個女仔夜麻麻同個Ex傾咁耐...都真係唔係咁好...

而且我仲係...人地既女朋友...

有男朋友既女仔同Ex單獨約會到咁夜...始終唔係咁好...

等到皓傑埋完張單...本來我只係想講笑話要皓傑請...實際係想AA既...

之但係皓傑話約得我出黎就預左呢餐係佢請喎~

咁就真係...『多謝晒~』

「客咩氣丫~搭咩車丫?」皓傑同我都企喺路邊。

『巴士~』咁夜都係搭D一程就到既交通公具好D~

「咁我送埋你返去啦~」皓傑將條頸巾箍到上我條頸道。

『唔使...』我都未將句說話講完...

「大家都係住屯門咋嘛~順路姐~」皓傑就行去巴士站。

『嗯~』都係既...大家都係住屯門...

但唔知點解...咁多年都係撞唔到...

咁多年黎...大家喺街上就連一次都遇唔到...

又話香港好細?

又話香港空間不足?

但點解大家都住喺同一區...都係遇唔到?

起初我諗住分開左...喺街上再次相遇會好尷尬...所以出街都會留意下會唔會見到...刻意避開下...

但時間耐左...先發現原來想喺茫茫人海中遇返都唔係咁容易...

呢D係唔係就係...上天巧妙既安排?

上到巴士,我地都坐到上上層...

我地好自然咁坐返以前坐開既位置...

搖下搖下...擺下擺下...

好似坐緊喺搖搖床咁...

就好似BB仔既時候...坐喺搖搖床上...搖下搖下...搖下搖下咁...

唔知係唔係真係太攰…我好快就瞓著左...

喺皓傑既膊頭上瞓著左...

呢種感覺...呢種以為已經遺忘既感覺...

意識開始模糊...失去...消失喺潛意識之中...

過左一陣...唔知過左幾耐...當我再有返意識之時...

『嗯嗯...去到...去到邊...啜啜...丫!我流左D口水落你道丫!』我望到有一大攤口水喺皓傑膊頭上!

我立刻拎紙巾幫皓傑抹返!

「哈哈~唔緊要啦~你仲係好似以前咁,瞓覺流口水~」皓傑接過我手中既紙巾,自己抹返...

『可能係你既膊頭太好瞓啦~』或者真係啦...

或者我就真係只有瞓喺皓傑膊頭時先會流口水...

就只有...皓傑一個...

落左車之後...我同皓傑就喺暗黃色既街燈照射下行...慢慢咁行...

風…好大...好凍...

街...好靜...無人...

我同皓傑都無出過聲...默不作聲咁...肩並肩咁...行返屋企...

或者...人到就黎離別之時...先會係最真...

『我到喇~』行到黎屋企樓下...我將頸上條紅色頸巾戴返上皓傑頸上...

「嗯...返上去沖個涼早D瞓...」皓傑好似有D依依不捨?

『嗯~你都快D返去沖個涼早D瞓~』或者只係我既錯覺...

「嗯...拜~」皓傑同我揮揮手...

『拜~』我同皓傑揮揮手後就轉身行去拍卡...

“嘟 咔”當我拉開閘門之時...

「詩琳...」皓傑叫一叫我...

『嗯?』我回頭望住仲呆企喺道既皓傑...

「你要幸福...」皓傑望住我...眼裏充滿住說話...

你要幸福...

『嗯...』

我要幸福...我諗...我而家都算係...幸福...

TO BE CONTINUED