坐喺Sam哥架日本車裏面…

“我但願 他珍惜妳 愛可一生一世永沒盡頭”

聽住首...經典金曲...

一首我從未聽過既經典金曲...

“不要我 內心輾轉 無盡無盡掛牽





愛妳卻未開口 寧願像現在是好友 願妳開心 偶然想到我

又是雨天 在夜靜沉寂處 妳說失意際遇 是內心再猶疑

天空似是停了雨 我始終相當關注 盼妳去找些開心日子

到底應相愛 或分開 假設情不再 只想等妳決定 我假裝 瀟灑望海

我早都知妳 離不開 真叫人感慨 但我對妳愛念 未曾改





我但願 他珍惜妳 這顆心不忍看妳落淚時 一串串 令心酸酸 仍舊仍舊眷戀

我但願 他珍惜妳 愛可一生一世永沒盡頭 不要我 內心輾轉 無盡無盡掛牽

愛妳卻未開口 寧願像現在是好友 願妳開心 偶然想到我”

愛你卻未開口...寧願像現在是好友...願你開心...偶然想到我...

假如你開口說愛我既話...唔知又會點呢?





我會接受你嗎?

我可以再接受你嗎?

定係你唔可以再接受我,所以一直都唔開口呢?

既然係咁...點解仲要愛呢?

「好~就停喺道啦~」Sam哥既聲線介入我既思緒...

我回一回神,望一望四周:『呢道係...』

Sam哥將架車停左喺條斜路上...

前面仲...有幾架泊左喺道...





而四周既風景...有草...有樹...有石...有山...

「呢道係城門水塘嘛~」Sam哥熄一熄匙...解一解開安全帶...

城門水塘?!

日光日白上黎城門水塘玩車震呀?!

唔L係丫化?!

你係都揀夜晚先好上黎啦!

而家光燦燦咁...嗰邊仲有一家大細男女老少上緊山...





做Show咩真係?

「心情唔好最好就係黎郊區行下散下心架喇~黎~我地落車先~~~」Sam哥就落一落車...

唔係上黎車震…係上黎膠遊?!

我都解一解開安全帶...落一落車...

「嗯~今日真係風和日麗~天朗氣清~」Sam哥伸左個懶腰...

『好大風好大風!好曬好曬!』我就覺得係風急日曬喇!

D風吹到“颼颼”聲!

吹到我條高馬尾都就快散!





D陽光曬落我D皮膚道,好似俾火燒咁!

會唔會變炭架?

我好唔曬得架嘛!

曬一曬都會紅晒...

一紅就會變黑...

一黑就要美白...

就算美白都要成個月先白得返...





乜咁玩丫...

你又唔早D講係黎膠遊!

等我帶定支防曬都好丫!

「你真係...好似天使一樣...」Sam哥眼定定咁望住我...

『下?』無啦啦噏乜鬼野天使?

「你身上發出陣陣白色既光芒...真係好似天使一樣...」Sam哥望住我望到呆晒咁...

『呃…係咩...係咩...』咁曬法梗係發光啦...

曬多兩曬變黑添喇...

俾Sam哥眼甘甘咁望住總係好唔自然...周身唔自在咁...

我都係行前兩步...行上斜路...

路上都有唔少車泊左喺路邊...

大大細細既私家車...七人車都有...

鬼死咁大架…霸晒成條路...都無人理架咩?

都係既…郊區都係D人放假先會上黎行下~

你叫班警察上黎做野?咪玩啦~

無議員投訴丫~佢地都唔會做野架啦~

我就行到去路中心,喺停泊左喺路邊既車邊行下行下...

同一大班都係上緊山既膠遊人們一齊行...

行多幾步...

「尋日落完雨,今日真係好好天呢~」Sam哥終於都識行到去我身邊...

『嗯...』我尋日仲淋完雨添~

好彩無淋病姐~

你知架啦~好似我地呢D年紀,再唔係十八廿二~

淋一淋都會死架喇~

「呢D咪叫雨後陽光囉~」Sam哥身上散發住正能量...

『下?』無啦啦乜野雨後陽光丫?

「希望在明天丫嘛~」Sam哥仲要笑到成個白痴仔咁...

『生命無希望,前路受重創丫?』好心你啦...咁大個人就唔好咁天真啦好唔好?

「你都幾負面架喎~」Sam哥又笑笑口咁打量下我...

『有幾丫?』咁就叫負面?

「而家咁好天都仲話生命無希望?」Sam哥望一望住個藍天白雲...

我又跟住Sam哥望一望上去...

『嘩!好曬!』我頂!差D曬盲我!

我做乜咁白痴會跟住Sam哥癲架?!

「天氣影響心情~咁好天氣應該好開心先係架嘛~」Sam哥深呼吸一口...

『好開心?我就話D蚊好開心先係喇...你睇你睇!有蚊開始飛埋黎我身邊喇!』我好惹架囉頂你!

「唔怕唔怕!」Sam哥立即喺背囊(幾時孭左背囊架?!)拎出...一支...「我有蚊怕水!」

Sam哥拎住支蚊怕水向我身上一噴!

『嘩!』好臭呀!!!

我想講蚊怕水除左D蚊會怕之外,我都好怕架囉好唔好?!

我立即撳住個鼻行開幾步!

「噴多少少先啦~噴多少少D蚊就唔會飛埋黎架喇~」Sam哥仲要拎住支蚊怕水對住我黎噴!

『得得得!咳咳!夠架喇夠架喇...咳咳!咳...咳咳!』救命呀...邊有女仔會鍾意噴蚊怕水架?!

傻的嗎?!

「你睇你睇~D蚊怕到飛走晒喇~係唔係好有用呢~」Sam哥仲要叻唔切咁既款...

『係喇係喇…咳...咳...』我都怕左你添喇...

我頂你個肺...你噴之前可唔可以講聲先架呢?

唔聲唔聲咁就拎支野出黎對住個女仔黎噴,知唔知好無禮貌架?

噴到人地成身都係...咁大陣味...情何以堪呀?!

帶住成身蚊怕水既臭味喺斜路上行下行下...

行唔夠幾步我對腳都軟軟地...

我地呢D平時又唔多做運動...少行斜路...最多都係行下平路企下地鐵既少女...係上唔慣斜架囉...

再行唔夠幾步...再死下死下咁行多兩步...

『唔得唔得…頂唔順...頂唔順...抖下先...抖下先...』我就坐喺個石壆上...

「咁快就攰喇?行唔夠幾步咋喎~你平時好少做運動呢?」Sam哥行到埋我身邊...

『Shopping算唔算係做運動?』平日邊有咁多時間做運動?有時間都行下街又或者喺屋企Hea下好過啦...

「哈哈哈~Shopping又點算得上係做運動呢~」Sam哥喺個背囊摷左一摷,「黎~飲啖水先~」

『唔該…』我接過Sam哥手上支水...飲一啖...先驚覺會唔會加左料?!

不過算啦...光天化日眾目睽睽之下,就算真係落左迷姦水,Sam哥都做唔到D乜野出樣架啦~

「平時無時間都要做下運動架~」Sam哥企正喺我面前...

好似一D攰意都無...

好似好硬淨...

「每日落運動場跑返十圈八圈~咁先Keep到架嘛~」Sam哥都仲係成碌鐵咁企喺道飲一飲啖水...

Keep乜鬼野姐?

家陣我Keep得唔好咩?

都係咁細細粒粒成個𡃁妹咁~

肥左既地方又俾我遮得到~

使乜跑步咁辛苦?

「好似我咁,放左工都一定要落去運動場跑返幾十個圈~出一身汗~」Sam哥喺我面前原地跑左幾下...

出一身汗?出一身臭汗咋嘛?

搞到成身臭汗味想點姐?

「出完一身汗真係好爽架!再沖返個靚涼心情都開朗D~」Sam哥又成身正能量咁...

放工返到屋企咁鬼攰...我唔使出完一身臭汗先去沖涼都好開朗架啦...

「你知啦,我做個位咁高~有好多野都要孭上身架嘛~壓力都唔細架嘛~一定要有返D野減下壓架嘛~」Sam哥扮晒有責任心咁既樣...

我職位低返工就無壓力既?

你既職位真係好高既?

我唔知~我亦都唔覺~

人地話而家做地盤既搵得多~

但對我黎講都係一D無文化既人先會做既工作~

我話知你係工程師定係紮鐵佬,咪又係喺D污糟邋遢既地盤裏面工作!

「無計啦~能者多勞丫嘛~」一路聽住Sam哥又喺道自吹...

『哦...』我已經都唔係第一次Hea答佢...

「不過做人就係咁架喇~要努力工作上進搵多D錢~」不停咁自吹...

『哦...』我真係無佢咁好氣...

「咁先可以令身邊最愛既女人得到幸福架嘛~」吹丫吹...

『哦...』真係睬佢都有味...

呢個世界真係乜人都有...

你點估到真係會有人咁厚面皮咁不停表揚自己既“優點”?

其實佢自己知唔知咁樣會令人覺得好討厭?

你真係有咁好既話,係唔使你自己噏出黎架囉~

人地係會感覺得到架囉~

好好好~唔好用感覺咁虛無縹緲~

有眼睇架囉好唔好?

如果你有咁多優點,個女仔都仲係睇唔到既話...

咁即係個女仔不單止在心中,就連眼中都沒有你囉!

你懂唔懂呀?

「黎緊仲有幾單工程要跟~真係周身都唔得閒~」Sam哥仲係繼續自吹...

『嗯...』我已經Hea答到出晒面...

「不過就算我點忙都好,都一定會放多D時間喺你身上~」完全無諗過要收聲...

『嗯...』放D時間喺我身上把鬼咩...

我都無話要你陪...

「只要你有需要,我都會第一時間出現~」就喺Sam哥講埋D勁骨痺肉麻說話既時候...

我感覺到我背脊好似有D...有D野...有野拍一拍我背脊...

我回頭一望...我見到...有隻...馬騮?!

『嘩!』我嚇左一嚇!彈一彈起身!

「唔使驚唔使驚!」Sam哥立即攬一攬住我!

隻馬騮無俾我既“嘩”一聲嚇到!反而仲要勁惡咁望住我!

咩料呀?而家D馬騮唔怕人架咩?

只見隻馬騮望下望下...坐喺個石壆上...摸下摸下...掃下掃下自己條...JJ...

呢隻咪就係傳說中既玩撚猿?!

隻馬騮越摸越爽咁...好似好舒服咁...

唔L係丫化?

唔係連隻馬騮都走黎J我丫化?!

我係唔係真係咁好J丫?

連畜生都吸引到?

天啊~係唔係痴L線架?!

「唔使驚!唔使驚!我會保護你!」Sam哥攬住我...掃下掃下我背脊...

我就立即推一推返開佢:『嗯嗯...』

就算俾隻馬騮強姦,我都唔要你保護囉...

「呢頭開始多馬騮架喇。」Sam哥望一望四周...

我又望一望四周...

都真係有唔少馬騮...

有D就喺D樹上跳黎跳去...彈黎彈去...飛黎飛去...

有D就坐左喺前面D石壆上食花生...食薯片...

仲要係紳士花生...品客薯片…

乜而家D馬騮咁識食架咩?

平時有無上開高登?

唔怪得近呢幾年高登越黎越低汁~就係因為多左眼前呢堆畜生~

「不過唔怕唔怕!有我喺你身邊!我唔會俾佢地傷害你!」Sam哥用上一對堅定不移既眼神望住我...

『得架喇…得架喇...』講真一句...我覺得你比起D馬騮更加可怕囉...

過左一陣,又多幾隻馬騮行左過黎...坐喺石壆上...

兩三隻咁...兩三隻咁排排坐...

望一望住班馬騮望住我既眼神...

再望一望住Sam哥望住我既眼神...

可以話係一模一樣咁難頂...

『我地都係行啦...』俾一隻Sam哥視姦已經夠難頂...

我唔想再俾多幾隻Sam哥望住黎J...

同Sam哥繼續喺斜路上向上行...

身邊D阿公阿婆都行得比我地快...(應該係只係比我快...)

睇黎我既體能真係好差...

比起公公婆婆還要差...

或者Sam哥講得岩既...有時間真係要做下運動...

跑下步都好丫...

唔好話係唔係要Keep下個Body...身體健康都要啦...

而家無拖拍...無人照顧無人錫...就要自己照顧自己...自己錫自己多D...

女人有時都真係要堅強D...

要獨立D...

要識得自己去處理...自己去面對...

始終...最靠得住既...都係自己...

同Sam哥一齊行...

「行路既姿勢都好重要架喎~」Sam哥又一直講過不停...

我就連開口應都無氣...就咁點點頭就算...

再行多兩步...

「呼吸既節奏都好重要架喎~」Sam哥繼續佢有佢講...

『終於都上到黎喇...嗚呀...』終於都俾我行到上黎城門水塘!

痴線架真係!

我行左幾耐呀?!

大大話話好似都行左成粒鐘...

行到我成身汗...

而家個太陽仲要喺正我頭殻頂!

曬到痴孖肺咁!

上到黎仲要無地方遮頭!

D樹陰下全部都係馬騮!

一大班馬騮排排坐喺道抖涼食花生!

我頂你個肺D畜生仲識歎過人!

無啦無啦~猿人爭霸戰喇~人類要滅亡喇~

我挨埋一邊...挨埋無俾馬騮霸佔既石壆,飲一大啖水:『唔...唔...唔...唔...呀~熱死人喇...攰死人喇...』

Sam哥都行到埋黎我身邊:「辛苦係得到回報既~你睇下~呢道D景色幾咁靚~」

Sam哥望一望出去...望住個湖...(定係叫水塘?)

我又跟住Sam哥望一望出去...

好靚咩?

我淨係見到一大片湖水...湖水上反射太陽光...刺眼到呢...

無太陽眼鏡既我真係唔敢再望多兩秒...

怕再咁望住D紫外線好易會有青光眼...(定係白內障?)

我都係合埋對眼,擰一擰頭,飲多兩啖水...

「D風吹埋黎幾咁舒服~」Sam哥攤開兩隻手...

“颼!颼!”

舒服?真係舒服咩?

我已經紮起左條高馬尾架啦!都俾D風吹到亂晒喇!

搞到成個癲婆咁...

唉...又要再紮過...

“颼!颼!颼!”

D風兜口兜面咁吹埋黎...

“颼!颼!颼!颼!”

搞左好耐先搞返好個頭!

唉...真係勁討厭!

「抖多一陣我地先繼續行~好嘛?」Sam哥問一問。

『下?仲行丫?』唔係已經達成目標架喇咩?!

「係丫~上到黎就梗係要去睇睇水浸榕樹腳啦~」Sam哥好認真咁點點頭。

『水浸榕樹腳?!』咩黎架?食得架?!

「水浸榕樹腳~好出名架~係城門水塘既標誌黎架~」Sam哥成個導遊咁既口吻...

標誌?

城門水塘既標誌唔係城門咩?

幾時變左做水浸榕樹腳架?

「不過唔急既唔急既~可以再抖多陣既~喺道抖多陣,然後我地可以慢慢行~欣賞住美麗既景色慢慢行~」Sam哥好似好有興致咁...

『哦...』但我就真係無乜興致...

我只係知好熱好曬同好多馬騮...

越黎越多馬騮...又越黎越多馬騮走過黎...

D馬騮真係好恐怖...好鬼樣衰...又好鬼黑人憎!

隻隻都好似大爺咁既款...完全唔驚人...

做乜丫?你真係以為自己係周星馳呀?!

真心唔明點解成個城門水塘都係馬騮都無人去理!

漁護處死架?!

唔做D野去阻止班馬騮扑野?!

捉晒D馬騮公返黎剪晒佢地JJ等佢地變成真正既玩撚猿呀嘛!

咁就唔使搞到而家D馬騮仲惡過人啦!

唉...真係...

Dry FF係無用…

D馬騮都仲係不斷咁走過黎...

一家大細有老有嫩聚埋一齊...

好似驚死我會霸左佢地個家園咁...

好喇好喇...當我怕左你地...

『我地行喇...』都係快D行...

「唔使再抖陣先?」Sam哥行到埋我身邊...

『唔使喇...快D行啦...』再唔快D行就俾班馬騮捉返去水簾洞俾孫悟空啪啪啪啪啪啪啪啪啪啪啪啪啪啪架喇...

同Sam哥一齊行到去堤壩...喺堤壩上行下行下...

「你睇你睇~成個塘D水位都好高喎~」Sam哥指下左又指下右...

『哦哦...』我就真係無乜心情睇...

就係知好曬...好鬼曬...好鬼死曬...

只係想快D行過呢條無遮無掩既堤壩...

行下行下...我仲見到有個女仔著住條白色吊帶短裙坐喺堤壩上俾個龍友影...

個女仔睇起上黎都係十五六歲咁上下...坐喺堤壩上條白色吊帶短裙就飄下飄下...

露下唔露下咁...

個龍友就影到扯晒旗咁...

嘩…收開幾錢丫?

又要上黎呢D咁既地方...仲要曬住咁任人影...

我睇個龍友企既位置...唔係影緊對雪白美腿就係影緊裙底...

而家做私影真係辛苦又蝕底...

當年我接私影Job都唔使去呢D膠~~~區曬住黎影~

而家真係越黎越難撈~

不過無計啦~呢個年頭競爭大嘛~

咁多𡃁妹拋個身出黎做,仲邊有得揀客丫?

「呢道影相都真係唔錯喎~」Sam哥望住條𡃁妹對腳...

『係丫?係丫?』咁唔錯你咪走去問下價囉...

「不如我都幫你影下咯~」Sam哥問一問我...

『下?!』唔L係掛?!

我係叫你問佢價,唔係問我喎...