等到Kawaii揀多幾對黑絲...

30 denier又有~60 denier既又有~就連絕對領域黑絲都有~

真係應有盡有~包羅萬有~

豪仔都好醒目咁自動自覺拎銀包出黎俾錢~

咁我都行定出去~搵定個地方~等佢地俾完錢出黎~



企喺條柱後面等~成個柱女咁等左一陣~

豪仔就左手一大袋H&M~右手一大包襪~俾Kawaii拉住咁行出襪店~

其實我覺得Kawaii對豪仔都算唔錯丫~

起碼都叫做同豪仔有唔少身體接觸丫~

你話:「俾左錢架!」



喂!俾左錢又點丫?你當人係雞呀?

你知唔知有好多俾左錢都無得掂架?

有得同女神出街...有得幫女神俾錢...你知唔知道...係幾咁幸福...係幾咁多人恨都恨唔到...

而家仲有得俾你掂...死而無憾啦下話?

所以話D男人上得床黎牽被冚!



得一就想二!

咁樣唔會得到女神既芳心~

咁樣只會令女神覺得你貪得無厭~

所以呢~下次女神派軍糧既時候,要識得感恩丫知道嘛~~~

點樣感恩?

唔...

心存一顆...當你真係鍾意一個人既時候,你唔會介意自己係唔係一隻兵...你甚至乎會想佢收你做兵...咁女神就會Feel到你既好架啦~

真架真架~我無坤你架~



坤你嗰個係你個女神姐~

我就又一路離遠咁偷偷地跟住喺豪仔佢地身後~留意住佢地~觀察佢地~

講開又講~我都真係幾厲害~

跟左豪仔佢地成日都無俾Kawaii發現你話係唔係真係厲害先~

直頭厲害到可以做FBI添啦~

定係話...因為Kawaii太投入喺佢同豪仔既相處之間...所以就忽略左身邊其他事物...人物...

唔...



如果話真係咁既話...就梗係好啦...

但世事又點會...真係咁好...

世事就係...往往都係你自己諗得太美好...

到最後先發覺...事實不似預期...

然後傷嗰個...痛嗰個...又係自己...

偷偷地跟住喺豪仔佢地身後行過左個商場~

落左幾層~

黎到一間...食日本野既餐廳...



唔?食野喇?

我望一望出去街上...原來都差唔多天黑...

再拎部電話出黎睇睇...原來都已經六點幾…

差唔多啦~六點幾食個晚飯~

飽暖既話...之後仲有時間...嘿嘿嘿...

我就等到豪仔同Kawaii行左入去之後...再等多一陣...等多對情侶入去之時,我都跟埋入去...

跟住對情侶後面入到黎間日本餐廳之後,我都偷偷地望一望豪仔佢地坐左喺邊...



間日本餐廳都唔算太大,好快咁就俾我望到豪仔同Kawaii坐左喺一個位於角落既二人世界檯...

我就立即搵個離佢地遠D既...但又可以好清楚咁望到佢地既二人世界檯坐一坐低...

舉一舉高本Menu...遮一遮住自己...離遠望住豪仔同Kawaii...

Kawaii背住左我...睇緊本Menu...

豪仔就...望住我...

我就瞪大對眼!怒視住豪仔!

都叫左你幾多次唔好望住我呀!你又唔記得喇!

豪仔見我瞪大對眼怒視住佢之後,好似Get到我心裏屌緊佢咁,好快咁望返住Kawaii。

我真係頂你個肺丫...無黎醒目架!

好彩Kawaii睇緊本Menu姐...唔係既話俾佢發現就真係前功盡廢...

望住豪仔好似問緊Kawaii想食乜野...Kawaii又諗下諗下咁...(因為真係坐得有D遠,聽唔到佢地講乜,只可以鳩估~)

我諗...我都可以放心既...

我諗...豪仔都應該識得點樣照顧Kawaii架喇...

我諗...我都係時候...抽返少少時間...照顧一下自己...

望住本Menu...款式唔係多…種類唔係多…可以揀既...唔係多…

但就係唔知食乜好...

望住本Menu...裏面D圖...裏面D字...唔多…但就係揀唔到...

無乜話有乜想食...無乜話有乜吸引到我...腦海仲係空白一片咁...

就算有...都只有...問號...

問食乜好?食呢樣好唔好?食嗰樣好唔好?好似呢樣好過嗰樣...又好似兩樣都唔係咁好...

點算好?

我開始明白點解女人食飯總係想有人陪...

就算唔可以同到自己鍾意既人食...都要搵隻伙食兵陪自己食...

唔係話因為想同隻伙食兵食完一餐睇住佢UM錢埋單既時候仲要覺得自己有得同你食飯已經係賺左咁抵死~

而係...有個人可以幫我做個決定...

喺我困惑既時候...喺我無助既時候...喺我唔知食乜好既時候...可以有個我信得過既人...可以依靠既人...幫我決定食乜好...

可以唔使我一個人對住本Menu...呆坐幾個字...

好似我而家咁...

望住周圍坐左幾對情侶...觀音與兵...都唔使個女仔諗食乜...都有個男仔幫佢諗埋食乜...

其實真係好幸福...

一個會了解自己既男仔...

仲會唔會...出現喺我面前呢?

就喺我諗緊仲會唔會出現...

腦海中就快出現一個身影...一個熟悉既身影將要浮現...

「請問有無人?」有把女仔聲喺我面前出現...

我回一回神...有一個...同我差唔多一樣咁...嬌小既身影...

『哦!無!無...』我望住面前呢個嬌小既身影...呢個女仔擰擰頭...

呢個嬌小既女仔點一點頭...坐左喺我面前...

我眼定定咁...望真D...望真D呢個...女仔...

係一個...黑色長髮...著住白色無袖恤衫...應該同我差唔多年紀既...女仔...坐左喺我面前...

我好細心咁留意住眼前呢位冷艷美人...

冷艷美人?點解我會話眼前呢個同我差唔多年紀既女仔係冷艷美人?

因為...喺佢身上...總係散發住...冰冷既感覺...

冷若冰霜...

喺呢個女仔既面上...好似見唔到笑容...見唔到有表情...

好似…唔係喺呢個空間裏面...

雖然坐喺我面前...但就感覺唔到...我地係身處喺同一個空間...

呢種感覺好奇怪...亦都係我...第一次接觸到...

我再用心咁打量住面前呢個冷艷美人...

睇真D...佢都幾似...Yanny...

Super Girls裏面嗰個Yanny Chan…

只見Yanny放一放好一個用紙袋入住既...Portfolio Cases?

呢個貌似Yanny既女仔係做Design既?

我諗都應該係喇...

佢個樣咁Designer樣...

係唔知做邊種Design姐~

Yanny放好左個用紙袋入住既Portfolio Cases之後,就拎一拎起本Menu...睇左一睇...就舉一舉手...

女侍應好快就行到過黎問一問:「係~想要D咩呢?」

「秋田拉麵。凍檸茶。」Yanny好簡單直接咁講一聲...

「好~一個秋田拉麵~凍檸茶~」女侍應覆一覆...

『呃...唔該我都想要一個秋田拉麵...凍啡...』難得有人幫我諗埋...我就唔諗咁多喇...

「你地係...一齊?」女侍應問一問...

『唔…唔係唔係...分開架...』

「哦...好~一個秋田拉麵~凍啡~」女侍應覆一覆我...

『唔該…』等到女侍應行開之後...我再望一望返面前既Yanny...

Yanny都仲係好似唔係好在乎身邊既事物咁...繼續停留喺自己既空間裏面咁...

睇見面前呢個Yanny可以咁自我咁...

就連點野食都可以咁快...咁直接...咁果斷...

我都真係...有D羨慕...

其實一直以黎...我都真係幾羨慕D...自我獨立既女仔...

身邊無人...都可以自己選擇...自己決定...自己去做...

無人可以依賴...無人可以依靠既...時候...

我都好想可以...

我又可唔可以?

我又有無機會可以?

究竟要點樣先可以有機會變成呢種自我獨立既女仔呢?

Yanny由個手袋仔中拎一拎出部電話...撳左幾下...望左一望...然後...笑左一笑…

冷艷美人會笑?

一個冷若冰霜既冷艷美人竟然會笑?

而且呢種笑容...就好似...北極既夏天一樣...

和暖既陽光照射到北極既冰山上...雪山上...散發出陣陣...冰冷之中帶著溫暖...

最溫暖既感覺...相信就係眼前呢種...

究竟有乜野可以令到冷若冰霜既冷艷美人笑起上黎?

係佢既愛人?

係佢既男朋友?

我相信...應該就只有佢既愛人...佢既男朋友...先可以令佢笑得咁幸福...

究竟一個可以令冷艷美人幸福既男人,又會係一個點樣既男人呢?

仲要唔喺佢身邊都可以令佢笑得咁幸福...

我都真係好想...了解下...

望住Yanny再輕輕笑一笑…Lock返部機...翻轉放一放喺檯面...

雙眼之中...好似充滿影像...

係回憶?思念?定係掛念?

我都唔清楚...

當中好似包含左好多...好多感覺...唔能夠一一細數...

但當中...就一定唔會包含痛苦...

喺Yanny既眼中...並不帶半點憂鬱神傷...

反而會令我覺得有一種...滿足...

真係好奇怪...一個俾人感覺係自我獨立冷若冰霜既冷艷美人應該係帶點孤獨又寂寞...

但係我喺佢眼中...睇到幸福...睇到滿足...

究竟要點樣先可以鍊成呢種女仔?

又係唔係要經歷過D乜先會變成呢種女仔?

而呢個女仔...究竟又經歷過D乜野經歷呢?

有好多問題喺腦海裡面...

想問問個女仔經歷過D乜野經歷...

想問問有乜野男人可以令個女仔咁幸福...

但當然...我都只係心裏想...無去開口...

始終我地都係同檯食飯既陌生人...

就連萍水相逢都講唔上...

所以...我都只係可以留意住佢...

留意住佢坐定定咁等野食黎...

「兩碗...秋田拉麵...一杯凍檸茶...一杯凍咖啡...」等到女侍應放好晒D野食喺我地面前...

我就一路食住碗...秋田拉麵...留意住佢食碗秋田拉麵...

靜靜咁食...無太大既動作...無多餘既動作...又唔會八卦身邊既事...就連我一直留意住佢都好似唔知咁...

完全無視一切...目空一切...專心食自己面前碗麵...

呢種心態...呢種境界...真係好吸引我...

我都真係好想...好想可以有一日...俾我達到...

不過直覺話俾我聽...我要付出好多...

付出好多好多…太多太多...

但你問我要付出D乜?我又唔可以具體咁答你...

因為...直覺呢家野係唔可以具體化架嘛~

我就繼續留意住眼前既Yanny食麵~

留意到大家都食完~留意到佢飲埋杯凍檸茶後...

「唔該。埋單。」Yanny舉一舉手。

等到個女侍應拎住個木盒行過黎...等到Yanny俾埋錢...埋完單...拎齊D野...起一起身...

Yanny條黑色短裙輕輕咁飄一飄起...一對雪白修長既美腿展一展露喺我眼前...

我就望住呢個冷若冰霜既冷艷美人行出門口...離開呢間日本餐廳...

冷若冰霜既冷艷美人...

如果有一日...我都可以好似佢咁...咁自我獨立...咁就好喇~

二人世界檯又變得得返我一個...

我一個人飲下飲下杯凍咖啡...諗下諗下...

諗下諗下頭先個冷若冰霜既冷艷美人...

諗下諗下...好似...忽略左D野咁...

忽略左D...乜野呢?

我諗下諗下...又望一望...

望到遠處...一張空左出黎既二人世界檯...

一張本來係豪仔同Kawaii坐緊既二人世界檯...

係喎!豪仔同Kawaii!

頭先一直都俾個冷若冰霜既冷艷美人吸引住,都唔記得左豪仔同Kawaii添!

我望一望四周...望到豪仔同Kawaii正要步出大門!

佢地要走喇!佢地要走喇!我都要快D埋單先得喇!

『唔該!埋單!』我舉晒手!揮晒手咁!

「黎緊黎緊~」等到個女侍應拎住個木盒行過...

我就快快手手俾錢:『唔使找喇!』

拎齊野立即鳩衝出去!

“灑!”落雨...

我一出到門口...就見到出面落緊雨…

『終於都...落雨啦...』

“灑灑灑灑灑灑灑灑灑灑灑灑灑灑灑灑灑灑!”仲要好大雨!

終於都落雨啦...終於都真係落雨喇!

天文台真係無講錯!今日真係會落雨!

仲要落得好大~勁大~

咁就真係天助豪仔也喇!

係喎!豪仔佢地呢?

我左望望...右望望...望到遠處...喺雨簾之中...一把黑色長遮之下...兩個身影...

豪仔已經開左遮...遮住Kawaii...一齊喺行人路上行...

仲要就快離開我既視線範圍!

我快快手咁拎把黑色縮骨遮出黎!打一打開!急急腳咁行一行出去!

“啪啪啪啪啪啪啪啪啪啪啪啪啪啪”雨水打落我手上把黑色縮骨遮上...發出“啪啪啪啪啪啪啪啪啪啪啪啪啪啪”聲。

好大雨!真係好Q大雨!

大雨加上天都黑...喺街燈照射下...眼前好似白茫茫一片...唔係好睇得清豪仔佢地...

被厚厚既雨簾隔住之下,我就係見到...兩個身影...喺黑色長遮之下...撞下撞下咁...

肩碰肩咁...撞下撞下...撞下撞下咁慢慢行...

呢種撞撞碰碰...

呢種估估下既暗示...

就只有佢地呢個階段...佢地呢個年紀先會有...

係一種以身體接觸既傳意...

就好似要用身體去話俾你聽...我想可以再接觸你多D...親近你多D...

就係唔用言語去講你知...

就係要你猜猜下...估估下...

因為怕你唔接受...所以唔敢講出口...

但又控制唔到心裏面想俾你知...所以只好用身體去暗示俾你知...

呢D情況...只會喺十幾歲既中學生身上發生...

因為到你大個D...到你遇得多…俾人拒絕得多…俾人玩得多…經歷得太多...無乜野講唔出口...亦無乜野面對唔到...

到時就會好快咁一句“受唔受溝”又或者直接上人屋企瞓返晚睇下夾唔夾得黎就決定一唔一齊...開唔開始...

完完全全飛晒呢D會令你忐忑不安心如鹿撞似是而非估下估下刺激又好玩既階段~

所以~而家睇到佢地兩個咁,都真係...幾回味~

或者真係...往事只能回味啦~

“啪啪啪啪啪啪啪啪啪啪啪啪啪啪”一路離遠咁跟住喺豪仔佢地後面...一路回味往事...

見到豪仔用左大半把遮都係遮住嬌小既Kawaii...其實豪仔對Kawaii都幾體貼丫~

情願自己淋濕半邊身,都唔想Kawaii俾雨水滴到~

唔單止係咁~同Kawaii過馬路又唔會衝燈~會等到綠公仔先過~而且等緊既時候又唔會行得太出~怕D車駛過水氹會濺起水花~整濕Kawaii~

做男仔都算交到功課架喇~

之不過Kawaii留唔留意到呢?

留唔留意到豪仔對自己既細心呢?

我諗...一定留意得到~

唔好睇少呢D細微細眼既野,女神係最清楚~

應該話有無分加,就係睇呢D架喇~

一路跟住豪仔佢地行...行到黎Kawaii屋企樓下...

喺對面馬路既我,望住佢地企左喺大門前...

豪仔同Kawaii面對面咁...好似傾緊野咁...(實在太大雨...我無辦法睇得清楚...)

佢地傾左一陣...然後我就見到Kawaii蹬一蹬起對腳仔...攬一攬住豪仔!

呢下我係好清楚咁見到Kawaii攬實左豪仔!

攬實左好一陣子...一直攬實左好一陣子...

攬實左好一陣子...都係無錫到...

Kawaii無錫到豪仔...只係攬住左豪仔...

再好一陣子之後...Kawaii鬆一鬆開手...企一企返直個人...向豪仔點一點頭...揮一揮手...行入大門...

就係咁...呢個就係你對豪仔今日表現既評價?

唔...

我轉一轉身...一邊離開...一邊計算...

“啪啪啪啪啪啪啪啪啪啪啪啪啪啪”向住ManYan既屋企方向行...心裏就計算著...

到最後...只係攬攬...無錫到...

呢種回應...會係...

“啪啪啪啪啪啪啪啪啪啪啪啪啪啪”一路盤算...一路行...路程都好似比較短...

就連時間都好似過得特別快...

好快我就返到黎ManYan屋企樓下...

好快我就上返黎ManYan屋企...

“啪啪”開一開燈...放一放低D野...斟一斟杯水...諗下諗...

我拎住隻水杯望住塊鏡...望住鏡裏面既自己...

望左一陣...又望下間屋…又望下張床...豪仔張床...

行兩步...又望下D相...有豪仔喺裏面既相...

“咔...咔...”大門再次打開...

「詩琳!姐姐...你返左黎喇?」濕左半邊身既豪仔好似帶點驚訝咁望住我。

『嗯~岩岩返~』我拎住隻水杯,打量住豪仔。

「我...我頭先仲搵左你一陣...諗住你會喺附近...」豪仔面紅紅咁。

『我見落咁大雨,所以返黎先咋嘛~點丫?同Kawaii...進展如何丫?』我搓下搓下隻水杯,問一問豪仔。

「我同Kawaii丫...OK丫~」豪仔面都紅晒咁點點頭。

『哦~OK丫?咁咪好囉~』OK?我都希望真係OK...

但事實呢?

以豪仔今日既表現...加上Kawaii對豪仔既舉動...最後只係換黎擁抱...我就覺得...唔係咁樂觀...

我覺得...如果Kawaii真係對豪仔有意思...想同豪仔發展既話...應該會係錫...

話唔埋...應該已經可以開始...

但只係擁抱既話...呢個舉動...

我只會覺得...Kawaii只想豪仔做佢隻兵...一直都只會係兵...

TO BE CONTINUED