《港女FF妄誌》: [Day 07－港女軍師] PART 09
等到我左邊坐多對HEHE之後...
兩個HEHE不時都𥄫下我咁...
右邊人地個男朋友又趁住佢女朋友撳緊手機又偷偷地𥄫下我對雪白美腿...
我就好似俾班飢餓既狗公圍住左咁...
仲要好似虎視眈眈咁...
你話會唔會有D坐立不安？
會唔會周身唔自在咁？
會唔會好無安全感？
無安全感都唔係第一日架啦～
我日日都生活喺無安全感既世界裏面架啦～
之不過我又真係唔覺得有乜野喎～
佢地虎視眈眈咁又點？
又可以對我點？
唔通佢地真係夠膽摸我咩？
唔好話而家仲著住燈，一陣熄晒燈都唔會咁夠膽啦～
港男FF就叻～要佢地做？咪又話這些機會～
所以我真係驚都未驚過～
我就唔理身邊D飢餓既狗公咁多，繼續留意住豪仔佢地既情況～
只見豪仔同Kawaii你一啖可樂...我一啖可樂...我一啖爆谷...你一啖爆谷...
好似已經變得好順理成章...
唔...
再睇睇自己...因為頭先覺得太多人排隊...所以無買到野...連可樂都無杯...
睇佢地飲得咁開心...搞到自己都有少少口渴...又無野飲...
唔...
你話而家身邊有個人幾咁好呢...
如果而家身邊有個人...識得自動自覺排隊買爆谷可樂俾我...你話幾咁好呢...
原來...我都有依賴人既時候呢...
戲院裏既燈光開始變暗...銀幕就越黎越光...
直至到戲院裏既燈光都熄晒...開始喇...
我已經唔係好睇得清楚面前既豪仔同Kawaii搞緊D乜...
我只係見到佢地兩個既黑影黐到實一實咁...連成一體咁...
我呢？
單身隻影...仲要無野食無野飲...
唉～睇黎都係唔好理佢地咁多住...專心睇戲好過...
免得成身葡萄味丫嘛～
我就將注意力放到喺大銀幕上～留心喺大銀幕上～
睇住鮮豔既動畫～平凡既男主角～平凡既女主角～動人既故事～
由輕鬆既節奏慢慢咁帶到去內心最敏感既深處...
一睇...就睇左個幾鐘...
你問我好唔好睇？
唔...OK啦～
都係好有新海誠Feel～
新海誠係乜野Feel？
D配色好出囉～好細緻囉～好多夜空星星月亮囉～
男女主角都係帶住淡淡既憂傷囉～總係充滿住故事囉～又唔會兜口兜面講你聽囉～要你自己去感受囉～
個故事到最後都係嗰種...遺憾...無奈...可惜...
想改變...就只係差一步...
或者大家只要回個頭...
或者大家只要行出一步...
或者大家只要開句聲...
或者大家只要隨便問一句...
或者...大家就會再一次走埋一齊...
或者...結局就會改寫...
但喺新海誠既作品之中...有幾多個係Happy End？
我記得係有既～不過唔多囉～
入得黎睇新海誠既作品，就預左帶住淡淡既遺憾行返出去...
想喊...但喊唔出...
總係要谷喺眼裏...總係要谷喺內心...
明知會係Sad都要睇，算唔算係自虐？
或者咁樣...先叫做寫實...叫做貼地呢～
或者...假如你係個主角...故事喺你身上發生...你都唔會回個頭...
你都唔會行出嗰一步...
你都唔會開句聲...
你都唔會隨便問一句...
你地都係唔會再一次走埋一齊...
結局…都係改寫不了...
隨住片尾曲奏起...
戲院內既燈光開始光亮...觀眾都開始起身...
而我左手邊嗰兩個HEHE都仲係未捨得起身...
等乜鬼呢？都無彩蛋架啦～仲未捨得起身～
其實我知點解既～
佢地兩個都唔起身既目的就係想等我行先～
等我行過佢地面前既時候，就可以借D易用膝頭哥掃下我對白滑小腿又好～大髀又好～
你估我真係咁蠢唔知你地籠野咩～
我本來就唔係好想俾佢地兩條HEHE奸計得逞！
之不過...我而家唔行先既話...陣間豪仔同Kawaii起身先既話...俾Kawaii留意到我既話...咁就麻煩...
都話靚女同靚女之間互相係有感應既...
萬一俾佢感應到我既存在...
萬一一陣間打後既時間有意無意咁感應到我跟住佢地身後...
咁就麻煩...
所以縱使我幾咁唔想俾兩條HEHE當我係白痴咁抽水...都要起一起身...
當我一起身之時，兩條HEHE不單止無諗過要縮一縮後，反而仲要隊一隊對膝頭哥上前...
我就只好打側個身...貼住前面排凳...行下行下...
當我一行到兩條HEHE面前之時...我感覺得到我對大髀唔係掃到膝頭哥...
而係...而係手背...
哎呀呀！呢兩條HEHE真係丫！俾你地用膝頭哥掃大髀都算...
你地就賤格到擺對手落膝哥用手背掃我大髀咁過份？！
真係賤鳩格格！
唉...不過算啦...鬼叫我而家唔得閒理佢地兩個咁多...要趁住喺豪仔同Kawaii未起身之前離開呢道咩...
唔係既話，我實鬧爆呢兩條HEHE！
唉...都係唔好理咁多…快快手手俾佢地兩個HEHE掃一掃對雪白美腿當係俾鬼摸就急急腳走返出去大堂...
我出到大堂之後，見到大堂都有唔少人...都有唔少人已經行左出黎...
有唔少男仔企左喺道啦～我諗係等緊女朋友去洗手間啦～
又有唔少毒HE企左喺道啦～唔知係唔係等緊另一個毒HE去洗手間啦～
我自己就唔使去洗手間啦～因為頭先睇緊戲既時候，我都已經去過喇～
我就穿過人群...行去遠D既位置...
企定定...等豪仔同Kawaii出黎...
我望實三號院門口...望左一陣...
Kawaii就拉住豪仔行出黎～
我見Kawaii都好似好開心咁～好似好滿意同豪仔睇完套戲咁～
但豪仔呢？仲係呆下呆下咁囉～好似唔係好投入咁囉～
我又真係唔明呢個豪仔～
明明就同女神睇戲～應該好投入先係～點解而家既豪仔就好似唔知諗緊乜咁架呢？
唔係而家...應該話一直都係...
由豪仔見到Kawaii開始...時不時又久唔久就會感覺到豪仔呆下呆下...
好似唔知喺心裏面諗緊乜咁...
總係好似忽略左Kawaii咁...
用忽略會唔會嚴重左？會唔過份左？
我諗都差唔多啦...
你唔係全心全意全個人連靈魂都放晒喺你身邊既女神身上，已經係死罪啦～
唔...
究竟豪仔心裏面諗緊D乜呢？
究竟喺豪仔心裏面又放左D乜野喺道令佢咁分心呢？
定係其實只係純粹因為豪仔太毒太呆呢？
Kawaii帶住甜絲絲既微笑望住豪仔，指一指住洗手間...
豪仔點一點頭後，Kawaii就行左入去洗手間...
我又拎一拎部電話出黎，打一打俾豪仔～
「嘟...嘟嘟...」
豪仔又呆下呆下咁拎部電話出黎睇一睇，又周圍望下望下咁：「喂...」
『喂～仲周圍望？我咪叫左你唔好望我囉～』今次我醒喇～專登企遠D～企喺人群之後～企埋一二角～等豪仔望唔到我～
「係係…Sor...」豪仔無再四圍望～乖乖地企定定～
『點丫～套戲好唔好睇丫？』我就問一問豪仔～
「OK丫...我覺得幾好睇丫...」豪仔點下點下頭咁答～
『我唔係問你覺得好唔好睇丫～我係問Kawaii覺得套戲好唔好睇丫～』鬼有興趣知你覺得好唔好睇咩～
「哦...佢話好好睇丫...」豪仔又傻下傻下咁摸摸頭～
『嗯～咁就好喇～係丫～一陣呢～記得同佢傾下套戲喎～問下多D佢對套戲有乜野睇法喎～』我又指點下豪仔～
「哦哦...」豪仔又對住空氣點點頭～
『要留意多D佢既睇法喎～要記喺心裏面架喎～』我又再指點下豪仔～
「哦哦...」豪仔又再對住空氣點點頭～
『要了解佢多D喎～』
「哦哦...」
『睇下邊D位佢鍾意多D就講多D～』
「哦哦...」
『睇下邊D位佢係Sad D既話都要講多D～』
「哦哦...」
『不過佢唔鍾意既位就以後都唔好喺佢面前提喇知唔知丫？』
「哦哦...」
『仲有記得問佢肚餓未～肚餓就帶佢去食野啦～』
「哦哦...」
『要問下佢想食乜丫～』
「哦哦...」
『如果佢話無所謂就帶佢去食日本野啦～』
「哦哦...」
『但唔好再去一壽司喇～』
「點解呢？」
『因為會覺得你又係帶佢去食一壽司好悶好無新意好無心思囉仲問！』
「哦哦...」
『記住喇喎～』
「哦哦...」
『我會Keep住喺你地後面跟住你地架喇～』
「嗯嗯...」
『咁好啦～加油～拜～』
「嗯嗯...拜...」
收左線之後，我望住豪仔企到直一直咁等Kawaii...
唉～我仲緊張過佢～
都唔知而家係我溝女神定係豪仔溝女神～
不過點都好啦～我都係想豪仔成功既～
想豪仔成功？我真係咁諗？
點解我會咁諗？
點解我會想豪仔成功？
唔...
或者我真係當左豪仔係我細佬...
想細佬追到女仔...
想細佬有拖拍...
想細佬追到女神…同女神拍拖...
應該係咁...
做家姐既...應該都會想咁...
喺豪仔身上...俾到我一種...做家姐既感覺...
越黎越強烈...呢種感覺...越黎越強烈...
而且仲...好真實...
等到Kawaii由洗手間出返黎...行到去豪仔面前...帶住微笑同豪仔點下頭...擰下頭...就同豪仔行過黎我呢邊...出口呢邊...
我就扮晒睇下D電子顯示板...扮晒睇下有乜戲咁...
等到佢地喺我身後行過...由鏡既倒影睇住佢地行左出戲院之後...
我都轉一轉身...行出戲院...
跟喺豪仔同Kawaii身後...再一次離遠咁跟喺佢地身後行...留意住佢地...
Kawaii同豪仔都有講有笑咁...
好似好開心咁...
兩小無猜...
只有佢地呢個年紀既時候...先會有呢種感覺...先會散發出呢種感覺...
望住佢地…總係好想...好想可以返番去嗰個年紀...嗰個時候...
但時間總係唔等人...又無辦法可以回到過去...
我從來都唔會俾自己後悔！只會遺憾...
帶住遺憾...行面前每一步...
或者...仲有更多遺憾...喺前面等住我...
我一路離遠咁跟住豪仔同Kawaii身後行...
行下行下...喺商場裏面行下蕩下...睇黎佢地仲未想去食野住～
或者係Kawaii仲未肚餓掛～
或者係Kawaii仲想行下街先掛～
行下行下...就行左入去買襪既舖頭～
買襪既舖頭？
Kawaii帶豪仔行入去買襪既舖頭？！
睇戲前就帶豪仔去買衫...
睇戲後就帶豪仔去買襪...
呢個Kawaii...係唔係真係咁主動？
要知道...對男仔黎講...襪同內衣褲...其實係無乜分別...
都係一樣會挑起性慾...
有D仲會特別鍾意...直頭係癖好！
好似個賤人阿Ken咁...就特別鍾意玩黑絲！
仲要特別鍾意玩30 denier呢D透透地既黑絲...
真係好鬼變態！
而家既Kawaii...就帶豪仔去買襪...直頭係對豪仔有所性暗示啦...
唔...
我就跟埋入去睇下Kawaii點向豪仔暗示先...
我行到黎襪店門前，就已經見到Kawaii拎住兩對白色既學生襪喺豪仔面前Fing下Fing下...
我就立即行入去...背住佢地...隔住一個貨架...由店舖裏面既鏡中偷偷睇住佢地搞乜...
由鏡中睇到佢地兩個...睇到Kawaii𡁯長個嘴仔...拎住兩對白色既學生襪...望到豪仔實一實...
豪仔又尷尷尬尬怕怕羞羞咁摸下摸下頭...
然後我就聽到背後傳黎一把可愛既女仔聲：「點姐～邊對好D姐～幫我揀丫～」
哦～原來係叫豪仔幫佢揀～
其實我都估到架喇～
就喺我一見到Kawaii拎住兩對白色既學生襪喺豪仔面前Fing下Fing下之時，我就估到係Kawaii要豪仔幫佢揀邊款好～
呢D招數我都有得出賣啦～
叫個男仔幫你揀～可以引誘一下個男仔～又可以性暗示下～仲可以知道個男仔鍾意咩款式～
買定多幾對～等到返學既時候著多D～吸引個男仔注意多D～又暗示下俾個男仔聽有聽佢講著佢揀既款式～等個男仔FF多D丫嘛～
呢D招數我做囡既時候都成日做架啦～
係估唔到而家D𡃁妹都仲鍾意用呢招姐～
「Why Not Both？」豪仔反問一句～
哈～呢個豪仔又呆唔晒喎～
「哈哈～你覺得兩對都OK？」Kawaii又問一問～
「唔...OK丫...我諗...著返學都無問題掛...」我又由鏡中望到豪仔摸下摸下頭咁～
「你成日留意我地著咩款式既襪架？」Kawaii恥笑一下豪仔～
「唔係丫唔係丫！」豪仔立即驚驚青青咁Fing晒手！「我只係知校規話女仔要著白色既學生襪咋！我見D花紋唔係咁覺眼就應該無問題！」
「哈哈～真係？你真係只有留意校規？無留意過我地班女仔？」Kawaii又恥笑住咁問下豪仔～
「無丫無丫！我都唔𥄫女既！」豪仔仲係驚驚青青咁既樣～
「哈哈～我都無話你𥄫女～我問你有無留意過我地班女仔咋嘛～」Kawaii就拎住兩對白色既學生襪喺手，Fing下Fing下咁行入D...
呢個豪仔真係丫～成日都俾人玩～俾人牽住個鼻子走～
不過係咁架喇～情場初哥丫嘛～
咁Kawaii又係唔係老江湖呢？
唔...
雖然話Kawaii係著住條短裙仔...但唔係真係睇得咁清楚...
不過就咁睇佢對腳...應該都唔算分得好開既...
應該未到一字馬既～
Kawaii行左入D...再入D...
豪仔就尷尷尬尬咁跟喺Kawaii身後...
Kawaii越行得入...豪仔就越尷尬...越怕羞...塊面仲越黎越紅...
點解豪仔塊面咁紅架呢？
因為裏面仲有幾個𡃁妹仔喺道所以焗D？
唔...
我再由店舖裏面幾塊鏡反射下望一望...望一望幾個𡃁妹仔手中...手中拎住...幾對黑絲...
係黑絲？
Kawaii行左入去放滿黑絲既貨架前...仲拎起左包黑絲黎睇...
豪仔眼甘甘咁望住Kawaii手上包黑絲...塊面就超級紅～
呢個豪仔丫～睇佢個眼甘甘樣加上面都紅晒咁，唔使審都知佢一定都係對黑絲情有獨鍾架啦～
Kawaii偷偷地咁望一望豪仔...見豪仔眼甘甘咁望實自己手中包黑絲...就奸奸地咁笑一笑：「點丫～鍾唔鍾意呢對丫？」
豪仔呆下呆下咁問：「下下？」
「我問...鍾唔鍾意我...著呢對黑絲喔～」Kawaii嗲氣嗲氣咁嗲一嗲豪仔～
豪仔吞左一啖口水：「唔...你...你著既話...我一定鍾意...」
「你好鍾意我著黑絲咩？」Kawaii谷一谷起塊面豬登～
「唔係唔係！」豪仔立即Fing晒手！擰晒頭！
「咁即係你唔鍾意我著黑絲啦...」Kawaii再谷一谷起塊面豬登～
「唔係唔係！我唔係咁既意思！」豪仔再Fing晒手！擰晒頭！
「唔係咁既意思...即係乜野意思丫～你搞到人地個心都亂埋喇～」Kawaii又再谷一谷起塊面豬登～扭扭擰擰咁～
呢個Kawaii丫！講到咁...搞到我個豪仔心都亂埋就真啦！
係唔係覺得我個豪仔單單純純毒毒地呆下呆下咁好好玩姐？！
會唔會玩到有D過左火姐？！
你叫人地俾咩回應你好姐？！
「我！我...我係覺得...如果係你既話...著唔著黑絲都係好靚...」豪仔望一望住Kawaii...
Kawaii又望一望住豪仔...
佢地互相對望左好一陣子...
我唔知道點解佢地會呆左咁互相對望...
我唔知道究竟有乜好望...
我只係知道...喺佢地兩個身處既位置...唔到兩平方米既空間之中...時間好似停頓左咁...
就好似只有Kawaii同豪仔兩個人咁...
再過左一陣...好似好耐...其實好快...
「你都...真係幾特別...」Kawaii對住豪仔微微一笑…講左句我唔理解既說話...
Kawaii覺得豪仔幾特別？
點解Kawaii會咁覺得架呢？
又係邊方面特別呢？
唔...
或者...或者喺Kawaii同豪仔對望之時...Kawaii喺豪仔眼中...望到我地旁觀者望唔到既野...
或者...或者呢樣就係Kawaii眼中...口中...心中...豪仔特別既地方...