「揀埋個手袋。」Lennon行到埋去放手袋既架前。

我隨便咁望一望...揀一揀…就揀左個黑色既...Salvatore Ferragamo手袋仔!

「就呢個?」Lennon打量住個Salvatore Ferragamo黑色手袋仔問一問。

『嗯~』我拎住喺手,望到實一實咁點點頭~

咁先襯返條裙丫嘛~



我就將自己個手袋仔裏面D野逐一咁放到落個Salvatore Ferragamo黑色手袋仔裏面~

所以話女人既手袋仔同多啦a夢個百寶袋係一模一樣係無錯既~

都係袋仔細細,你唔想摷到既野就點摷都摷唔到~但你想摷到既野就一摷就摷到~

等到我將鏡仔唇膏面油紙紙巾銀包鎖匙電話全部都放晒落個Salvatore Ferragamo黑色手袋仔裏面之後...

「好喇,咁我都去換埋衫先。」Lennon就行出女裝呢邊個衣帽間。



我又跟住Lennon行~行返過去男裝嗰邊個衣帽間~

「喂…做乜跟住我過黎?我仲未換好晒衫架小姐...落去樓下等啦。」Lennon又喺堆放到整整齊齊既煲呔之中揀下揀下。

『過黎幫你揀丫嘛~』我就除手拎起個黑色有暗斜紋既煲呔,『嗱!就呢個啦!』

「呢個?」Lennon拎喺手,望下望下,又諗下諗下咁,「真係岩?」

『你話架嘛~唔試過又點知唔岩?一試包你難忘丫~』其實真係使乜揀丫?個個都差唔多~



「我好似淨係話唔試過又點知唔岩咋喎...」Lennon冷眼咁望住我。

『咁我加埋後面嗰句接埋落去係唔係好Match先?快D戴起佢啦!』我扮晒唔耐煩咁~

「乜你好趕時間咩?」Lennon仲係懶懶閒咁。

『我就唔係好趕姐~唔知你趕唔趕喎~』我又唔知你要幾點過到去~又唔知你仲要搞幾耐~

「哈~我地呢D喺差唔多時候出現就得架喇。」Lennon笑笑口,擰擰頭。

『咁我唔知你咩時候係差唔多丫嘛~』你又無講我聽...

「我心裏有數...係喇...唔係應該你幫我打埋架咩?」Lennon遞一遞個黑色有暗斜紋既煲呔俾我。

『我...唔識打煲呔架喎...』我就扮晒無知咁既樣。



「竟然?咁就等我教你啦。」Lennon對住塊全身鏡。

『我又無話要學~』我就扮晒無興趣咁~

「OK~」Lennon就對住塊全身鏡打一打煲呔。

我就偷偷地望住全身鏡中既Lennon...偷偷學下點樣打煲呔...

Lennon慢慢打~我就慢慢學~

等到Lennon打好個煲呔照多兩照,著埋黑色西裝褸...戴埋隻手錶望一望:「好,行得。」

我就同Lennon落返樓,坐返上架法拉利...



“吼~吼~吼~”出發!

要出發~真係要出發~因為天色都已經黑了~到左夜晚了~

唔知個會場喺邊架呢?

會有咩人架呢?

我又使唔使...應酬架呢?

係囉...今日全日都無諗過...到左而家先諗起...

我就係咁...成日都係咁...

唔到面對嗰一刻都唔會諗起D細節野...



或者係因為...我就係一個煮到埋黎先食既人...

“吼~吼!吼!!吼~~~”坐住Lennon架法拉利,好快就黎到...灣仔...

好快就黎到香港會議展覽中心呢隻大烏龜。

交左架法拉利俾個服務員之後,我就...翹住Lennon隻手...行到入黎...入黎會展既...大會堂前廳...

「文生~黎左喇?」一行到黎門前,就有個著住成套紫色晚裝既靚女行到埋黎...

我睇呢個靚女都係廿幾歲左右...

係乜水?唔知…



我淨係知今晚要出席既場合係...一個酒會...

一個正餐前既酒會...

即係有好多檯仔又有D野食下,有好多人企喺道拎住杯酒吹水嗰D酒會...

因為喺門口望入去宴會廳都見到有好多人企左喺道拎住杯酒吹緊水...

有男有女...

男既唔係成個年輕才俊咁,就係上左年紀既有錢佬咁...

女既呢?個個都係年輕貌美咁...成隻雞...唔係!係成個港姐咁...(有分別咩?)

嘩…今晚唔係真係要應酬呢班人丫化?

你話我對住班教畜都仲有D辦法...對住班上等人喎...隔左幾個層次架喎...我唔掂架喎...

「係丫。呢位係李小姐。」Lennon將我介紹俾個靚女。

『你好...叫我詩琳得喇...』我仲係傻下傻下唔知點咁...

「詩琳小姐你好~我係Yvette~係今次宴會既負責人~」呢個名叫Yvette既靚女同我握握手。

負責人?

一個咁年輕既靚女負責晒咁大壇野?!

係唔係真係咁堅丫?

「文生~距離致詞仲有十五分鐘~喺開始之前我會再過黎搵你~」Yvette喺行過身邊既男侍應手上個托盤上拎左兩杯酒交到我地手中之後,自己再拎一杯,「Cheers~」

飲一啖手中既...干邑...

係REMY MARTIN LOUIS XIII嘛?

唔識…我呢D下等人無飲過好野真係識條鐵咩...

「咁我唔阻兩位~」Yvette同我地點一點頭。

「嗯。」Lennon向Yvette點點頭。

Yvette向我地再點一點頭後就行左去~

望住Yvette行左去應酬其他賓客之後...

『你一陣要致詞架?』我就細細聲咁又八八卦卦咁問一問Lennon。

「係丫…一陣要致詞...我都無諗過要講D乜添...」Lennon諗下諗下咁...

『下?你無準備架?』我又好奇咁打量一下Lennon。

「無丫…乜都無準備架...」Lennon扮晒古天樂既口吻咁擰下擰下頭。

『唔係丫化?你之前唔知要致詞架咩?』我又好好奇咁追問一下。

「知~」Lennon點下點下頭。

『知你都唔準備份講辭?』致得詞就要有定份講辭啦下話?!叫人幫你準備都要啦!

「咁我平時都無做開呢D野架嘛…」Lennon又扮晒古天樂咁既眼神望住我。

『就係平時無做開先要準備架嘛!』無做開又唔做準備咁點丫?!

「要架咩?」

『唔使架咩?』

「乜真係要架咩?」

『乜真係唔使架咩?』

「即場爆肚咪得囉~」

『即場爆肚?!』你當你係黃子華丫?你古天樂咋!

Lennon就好似唔緊唔緊咁,拎住杯酒行下行下...

我就翹住Lennon手臂,跟喺佢身邊行下行下...

仲有十三四分鐘就要上台致詞,真係可以唔緊唔緊?

話晒都要面對咁多人...

仲要咁多上等人...

行唔夠幾步...

「喂~Lennon~」一個中年阿叔就拎住杯酒,笑到陰陰濕濕咁行到黎我地面前,欄一欄住我地。

個中年阿叔身邊仲有個同我差唔多年紀既靚女翹住佢。

呢個靚女...好似有D熟口面...喺邊道見過呢?

「喂~George哥~點丫?又換左畫丫?」Lennon指一指個中年阿叔身邊個靚女...

George哥?George叔咋嘛?

「畫我日日換架啦~點丫?唔認得佢咩?今期最紅嫩毛MoMo喎~」George叔指一指佢身邊個靚女。

哦~原來係MoMo~

唔怪之得咁熟口面啦~

之前先喺D八婆Facebook專頁見到有Post數臭佢有幾咁臭~

又話佢十二三歲就走出黎做PTGF~又有班熟客話佢下面闊到狼牙棒都塞得落~

「我好少睇呢D野既。」Lennon帶住古天樂式既微笑擰擰頭。

「人地唔識你呀!你睇下你幾空氣呀!」George叔指一指住MoMo大大聲咁屌!

只見MoMo扁扁嘴咁...

做上等雞真係唔易~

「呢位乜姐丫?」George拎住杯酒指一指住我。

「呢位係...」我無等Lennon講落去...

『乜姐唔敢當~叫我李小姐得喇~』姐你老母咩...

「李小姐~~~丫化?咁生面口既?喺邊個場做開丫?」George叔帶住勁仆街既眼神打量住我。

呢一刻...我覺得George叔勁似杜汶澤...

『遊樂場~』場你老母咩...

「遊樂場?未聽過有D咁既場既?新開架?」George叔仲唔肯收皮。

『你真係識講笑喇~遊樂場都未聽過~你邊個星球黎架?』呢個世界真係仆街特別多...面前就已經有一個...

「點夠你咁好笑丫~」George叔笑住口咁望住Lennon,指一指住我,「喂~條女OK幽默喎~」

「係咩?我覺得佢好認真喎~」Lennon又帶住古天樂式既微笑。

「喂~講認真...」George叔行近多一步,「我黎緊呢...想搞創科公司...點睇?」

George講得有D細聲...好似唔想俾我地呢D女人聽到咁...

「你搞創科?」Lennon就好似唔介意講俾全世界聽咁,講得有D大聲,「政府講左幾年啦~都玩到爛啦~而家先黎搞?殻黎咋嘛?」

殻?空殻公司?

「衰鬼丫~你咁睇我既?」George叔笑笑口咁拍一拍Lennon,「咁即係點睇姐?」

「我地呢D都係睇數據架姐~咁D數據靚既話咪有得睇囉~數據唔靚既咪無眼睇囉~」Lennon又帶住古天樂式既微笑。

「咁即係條數做...得靚D就有得睇啦?」George叔又細細聲講。

「我無講D乜丫~你知架啦~唔係淨係得我睇架嘛~有好多人睇住架嘛~」Lennon又扮晒唔關自己事咁既樣~

「明既~明既~咁就...遲D再算啦~唔阻你喇~」George叔同Lennon撞一撞杯飲一啖酒就帶住MoMo行左去。

我望住George叔同MoMo行左去...同另一個男人傾計...

『咩人黎架?』我冷眼望住George叔既背影...

「賤人。」Lennon又帶住我行。

『賤人又咁好傾?』我打量一下Lennon。

「因為我都係賤人囉。」Lennon繼續帶住我行下行下。

『你都係賤人?』我又帶住質疑既眼神打量住Lennon。

「我唔賤咩?」Lennon停一停,帶住質疑既眼神打量返我。

『你賤咩?』我又真係睇唔出...你有幾賤...

「唔...」Lennon諗下諗下...帶住我繼續行。

唔好話我係唔係係人係鬼一眼就睇得出...淨係拎Lennon黎同George叔相比...Lennon一D都唔賤...

Lennon帶住我行...有唔少人都同Lennon點點頭...

「HI~Lennon~」又有唔少人同Lennon打下招呼...

呢道所有人都識得Lennon?

Lennon亦識得呢道所有人?

做得上等人就要識得咁多人?

咁上等人真係一D都唔易做...

行多幾轉...同多幾個上等人吹兩句...(係Lennon同佢地吹...我做花瓶姐...)

「文生~差唔多喇~」Yvette就行到黎我地面前。

「嗯...咁...」Lennon望一望我。

『嗯?得架喇~我喺道OK架~』我諗我一個花瓶棟喺道都唔會好悶架姐~

「嗯~咁我地行喇。」Lennon就跟住Yvette行...行過去台嗰邊。

我望到台上面...已經企左個...MC...

個MC肥肥地...光頭...戴住副圓形黑框眼鏡...成個阿Bob咁...

點丫?而家係唔係淨係得阿Bob先做得MC丫?

當Lennon跟住Yvette行到去台邊之時...

「呢D And 豬頭文~好歡迎大家黎到今晚既晚會~」阿Bob就開咪講野。

而全場都靜晒落黎...企定晒...將注意力都放晒喺台上...

呢D就係上等人既場合?

一聽到有野宣布,個個都好自覺咁靜落黎...留心咁聽...

唔似得出席D辣殺婚宴咁,個MC開晒咪勁大聲咁講緊野,台下D賓客仲成個小學雞入禮堂聽講座咁嘈喧巴閉!

我而家先發現...咩叫做唔同層次...

「今晚呢個係咩晚會?今晚個晚會係...劫富濟貧基金成立晚宴~」聽到阿Bob咁樣一講...

『哈...唔!』我忍唔住撳住個嘴仔笑左一左!

咩劫富濟貧基金呀?!咩名黎架?!

呢道成大班有錢佬,你唔係真係想劫佢地D錢黎濟我地呢D窮人丫化?!

又邊個咁沙膽丫?!

「我呢D小人物就唔敢多講啦~都係快D有請劫富濟貧基金創辦人...誠信投資有限公司CEO...又型又靚仔又超級有錢係全中環女士眼中既獵物...人稱中環古天樂既文繼文Lennon!上黎講幾句~」阿Bob拍拍手...

“啪 啪 啪 啪 啪 啪 啪 啪 啪 啪”全場既人又拍拍手...

下?!係Lennon?!Lennon就係呢個劫富濟貧基金既創辦人?!

“啪 啪 啪 啪 啪 啪 啪 啪 啪 啪”喺全場拍掌聲之下...

Lennon行一行上台...

唔係咁開心丫化?

Lennon呢個超級大有錢佬搞個劫富濟貧基金出黎?

自己劫自己丫?!

Lennon行到去台中心之後,阿Bob都退一退後。

「呃...大家好。要我上台講幾句...我都唔知講乜好...我又唔識講笑...又無阿Bob咁搞笑...」Lennon指一指身後既阿Bob。

阿Bob就拎一拎起支咪:「我唔係阿Bob。」

「乜你唔係阿Bob黎架咩?」Lennon打量一下阿Bob。

「我唔係。」阿Bob笑笑口又擰擰頭。

「我以為你係添...」Lennon再打量一下阿Bob。

「我夠以為你係古天樂啦~」阿Bob又笑笑口咁打量一下Lennon。

“哈哈哈哈~”台下既賓客都笑起黎~

點丫?搞乜9Gag丫?

係唔係夾定架?

又話自己唔識講笑唔搞笑...

「嗯...好喇...一場誤會~咁好啦,都係講返正題啦~」Lennon點下點下頭。

真係誤會一場黎架咩?

唔係有心搞氣氛架咩?

我就留心一下接住落黎Lennon會講D乜。

「今日係劫富濟貧基金既成立日。我之所以創辦呢個基金既目的係...積返D陰德。」Lennon帶住古天樂式既微笑。

“哈哈哈哈~”台下既賓客又笑起黎~

除左我...

點解我唔識得笑?

「你地都知架啦~我地D錢係點黎?唔係呃阿婆買倫敦金就係囤積居奇壟斷市場官商鄉黑~有幾多個好似李生咁開善堂都可以發達~」Lennon指一指住...我既右前方...

Lennon指住嗰個方向傳黎一大聲:「我姓陳架!」

“哈哈哈哈~”台下既賓客一邊笑,一邊望向聲音既來源~

我都跟住眾人一齊望一望...望下人群之中...聲音既來源...

但因為人太多...都係望唔到係邊個...

「係既係既陳生~係喇…所以我就決心成立呢一個劫富濟貧基金...希望幫大家積返D陰德...亦都希望大家可以多多支持。如果唔係既話...我真係會劫你地既富...濟嗰班被你地害到雞毛鴨血既貧民。講得出,做得到。唔係既話…我將我個名掉轉黎寫。」Lennon又帶住古天樂式既微笑。

“哈哈哈哈~”台下既賓客又笑起黎~

但我都係唔識得笑...

「我係唔識得講笑...亦唔搞笑。」Lennon好認真咁望住台下既賓客。

呢一刻...成個場又靜晒...

比起岩岩阿Bob開咪既時候更靜...更沈靜...

但反而我就好想笑~

喺成個場寂靜之下...我反而覺得好好笑...

好笑...唔係Lennon識講笑...好搞笑...

好笑...係Lennon既認真...

「多謝各位。」Lennon帶住微笑點點頭後...

台下既賓客都仲係呆晒咁...定晒格咁...

直至到...

“啪 啪 啪 啪”我拍掌...

“啪 啪 啪啪啪啪啪啪啪啪”D賓客先識得拍掌...

上等人...上等人既世界...呢個就係上等人既世界?

「多謝文生...多謝文生...」連勁有經驗既阿Bob聽完Lennon致詞之後都唔知講乜好...

都好正常既...讚Lennon頭先嗰番言論既話又怕得罪台下班唔係呃阿婆買倫敦金就係囤積居奇壟斷市場官商鄉黑既有錢人...暗諷Lennon既話又怕佢認真起黎唔知會做D乜...

所以都係...講句多謝咪算囉~

「好喇~咁…」阿Bob回一回神,「喺呢個時候呢~就請文生跳第一隻舞~」

下?跳舞?

乜呢D餐前酒會有舞跳架咩?咁老套架咩?!

大家都騰出一大個空間...

Lennon就行到埋黎我面前...

下?乜原來今晚我要跳舞架?

三十萬包埋架?!

點解我唔知既?!

Lennon帶住微笑向我遞一遞手...

我又真係伸隻手俾佢捉住行出去...行到一大個空間既正中心...

Lennon攬一攬住我條小蠻腰…

我又箍一箍住Lennon條頸...

「Music~」阿Bob一聲令下...

輕鬆柔和既古典音樂就響起...

我同Lennon就喺輕鬆柔和既旋律之下擺下擺下...扭下扭下...

『乜三十萬係包跳舞架咩?』我冷眼望住Lennon。

「三十萬…唔賣身...其他全部都包架喇喎~」Lennon帶住古天樂式既恥笑望住我...

『咁...咁你都同我講聲先丫...你唔驚我唔識跳架?』我又冷眼打量住Lennon。

「哈~其實我都唔知要跳舞既~況且...」Lennon諗左一諗,「我睇你既身材...就估你之前一定有跳過舞~」

咁都俾Lennon睇得出?!

無錯...細個既時候又真係貪得意學過下跳舞既...

雖然話唔係學左好耐又唔係學得好精...

但好似而家咁跟住個旋律擺下扭下搖下都唔係問題既...

之不過...Lennon呢個男人...真係...一時好似好了解女人咁...一時又好似對女人乜都唔知咁...

究竟係了解?定係乜都唔知呢?

『喂…乜你原來係投資公司既CEO黎架?』都係轉個話題...

「嘩…你D話題轉得咁快既?我跟唔上喎...」Lennon碌大對眼望實我。

『問你就答啦~』有D野諗唔通就要轉得快架啦...

「你頭先都有聽到架...」Lennon冷眼咁望住我。

『仲要係又型又靚仔又超級有錢係全中環女士眼中既獵物人稱中環古天樂既文繼文Lennon呀嘛~』我恥笑一下Lennon。

「人地咁吹架姐...」Lennon笑笑口,擰擰頭。

『唔係丫~你都真係幾似古天樂丫~』我又恥笑一下Lennon。

「就係呢樣唔係吹囉~」Lennon又扮晒古天樂咁笑~

『咁係唔係真?』我扮晒認真咁問一問。

「咩係唔係真?係唔係真係古天樂?」Lennon笑笑口咁問一問。

『係唔係真係會劫富濟貧丫~』

「嘩…你D話題真係轉得好快喎...我真係跟唔上喎...」

『咁係唔係真係會姐?』

「我地呢行牙齒當金使既~」

『堅架?咁你會點劫富丫?』

「我做邊行架?」

『投資公司囉~』

「咁咪係囉~」

『咁即係點姐?』