「葉小姐~無~我同個朋友想去你中環嗰間分店做Spa...係丫係丫...唔...女士黎既...哈~唔係唔係...嗯...而家有無位?」Lennon真係打左俾佢個客問。

「嗯~我地大約...」Lennon望一望隻錶,「十五分鐘左右就到...」

「嗯嗯...哦~好丫好丫~嗯嗯~唔該晒~拜拜~」Lennon收一收線。

『點丫?』我就有D心急咁問一問。

我心急唔係心急有無得做Spa...





我心急係心急想知Lennon係唔係真係咁勁...

真係有人地老細個電話?

又真係隨便打個電話就有得做Spa?

「搞掂喇。而家過去就有得做喇。」Lennon開一開車。

“吼!吼!!吼!!!”





真係咁堅?

Lennon做D乜有咁既客架?

佢個客間野又係唔係高級野黎架?

我帶住疑問咁...

“吼~吼~吼~”坐住架法拉利...





“吼~吼!吼!!!”好快又返翻落黎中環...

又係交架法拉利俾服務員...我就跟住Lennon身邊行...

好快就黎到一間...Spa與養生中心...

呢間Spa與養生中心...咪就係全港最大間嗰間…

呢間野聽Doris講唔預早一個月Book都唔使旨意入得到佢個門口!

而且就算俾你入得到...都未必出得到...

因為佢D收費係超級貴!

Lennon究竟係做邊行架?會有呢D咁既大客?!





一踏入大門...

「文生~」一位靚女立即行到埋黎我地面前...迎接我地...

然後再有兩位靚女行過黎...

「我地已經幫兩位安排好療程~需時一百九十五分鐘~」其中一個靚女向我地簡單咁講解。

兩位?

我偷偷喺Lennon耳邊細細聲咁問一問:『乜你都做咩?』

Lennon用上古天樂式既口吻:「我唔做得架咩?」





『唔係~好奇問下姐~』我以為你無咁姿整架嘛…

「請放心~一陣間我地會再有詳細既講解~」其中一個靚女又再簡單咁交代一下。

「嗯~有勞。」Lennon點點頭。

「咁文生請跟我黎呢邊~」個靚女就帶一帶Lennon。

「小姐請跟我黎呢邊~」另一個靚女就帶一帶我。

「一百九十五分鐘後見。」Lennon背住我揮揮手。

『嗯~一百九十五分鐘後見~』一百九十五分鐘...屬於自己既一百九十五分鐘...

我跟住個靚女行入去...應該係女賓部...





一百九十五分鐘...我好似從來都無諗過有屬於自己既時間...

細個時間多就唔會諗...大過D時就俾晒公司...

屬於自己既時間...對於我地呢D下等人黎講...真係好奢侈...

記住那關於光陰的教訓...回頭走天已暗...

你獻出了十吋時和分...可有換到十吋金?

入到去一間...應該係VIP房...

專業既療養師同我講解全個療程有D乜~做D乜~有乜野要注意~有乜效益~





全部都係最好最高級最花時間既~(係唔係最貴我就唔知...因為佢無同我講價錢...)

今次真係發達~

唔使我俾錢唔係重點~我真係無諗過自己可以喺全港第一養生中心花上一百九十五分鐘~

我放鬆晒成個人...無再理時間係D乜...

好好享受全個療程...好好享受屬於自己既一百九十五分鐘...

我希望...以後落黎所有既一百九十五分鐘都係屬於自己...只屬於自己...

或者開心既時間真係過得特別快...好快就過左呢一百九十五分鐘...

做完晒全個療程,成個人都精神晒~輕鬆晒~好似脫胎換骨!

真係唔怪之得咁多人都肯花咁多時間同金錢喺呢D地方...

有錢又有時間既話...真係值得花!

當我跟住個靚女行返出黎之時,我已經見到Lennon坐左喺張梳化道...睇緊部手機...

『咁快既你?』我行到埋Lennon面前。

「我都係岩岩出黎姐~點丫?OK嘛?」Lennon企一企起身,打量一下我,「我睇你真係...靚左喎~」

『咁即係話我之前唔靚啦?』我冷眼望住Lennon...

「唔係~唔係…你地D女人真係...」Lennon無奈咁笑笑口,擰擰頭。

『真係麻煩呢~』女人係咁麻煩架喇~

「唔係~唔係…只係...應付女人唔係我專長~」Lennon又好無奈咁笑笑口,擰擰頭。

『咁乜野係你既專長丫?』我又古古惑惑咁打量住Lennon~

「埋單丫~行得未丫?」Lennon又好無奈咁笑笑口。

『哈~行得喇~』我又跟住Lennon身邊~

同Lennon攞返架法拉利...

『跟住就係要Set頭喇喎~你係唔係又有客開Salon架?』我一邊扣安全帶,一邊半帶恥笑咁問問Lennon~

「係丫~」Lennon點住頭咁扣安全帶。

『咁使唔使又打去問問丫?』我又古古惑惑咁打量住Lennon~

「早喺你未出黎之前就已經打左啦~」Lennon就成副古天樂咁既衰樣點點頭~

咁醒?!

「做乜咁奇怪咁望住我丫?係唔係諗緊我咁醒架呢?」Lennon又得得戚戚咁既樣~

『小蟹柳~』我總係覺得...

「下?」Lennon一頭問號咁望住我。

『扮晒蟹丫~』Lennon呢個人真係好奇怪...

「哈哈~小蟹柳~扮晒蟹~邊道聽返黎架?」

『熊仔頭囉~你未睇過咩?』

「熊仔頭?咩黎架?」

『熊仔頭都唔知係乜?自己上YouTube搵啦~』

Lennon呢個人...一時好似好了解人咁...好似可以一眼就睇穿你咁...

但有陣時...又好似乜都唔知咁...唔講埋條腸出黎都唔明咁...

我真係...唔係好捉摸到呢一個男人...

之但係...就係越係捉摸唔到...就越想去捉摸下...

“吼~吼~吼~”坐住架法拉利...

“吼~吼!吼!!!”轉個彎就黎到銅鑼灣。

泊好架法拉利,跟住喺Lennon身邊行到上黎一間...星級Salon?!

我記得唔知喺邊道睇過...呢間Salon...好似話除左古天樂之外,周杰倫、蔡依琳同梁詠琪都會黎幫襯...

「文生~歡迎大駕光臨~請跟我黎~請跟我黎~」一行到黎門口,就有一個...應該係髮型師...黎接待我地...

我就同Lennon跟住呢位髮型師行到入去...

「請坐~請坐~」

坐一坐低...

身邊就多左三四個Junior同多一個髮型師...

「頭先聽文生你講左話今晚要出席個晚宴,我地就已經幫兩位諗好左點整~」個髮型師笑晒口咁既樣。

點解個個髮型師都咁好笑容?

我剪開嗰個又係咁架喎...

乜做髮型師真係咁開心架咩?

「嗯~有勞。」Lennon點一點頭。

「咁好啦~我地幫兩位洗洗頭先~」個髮型師就向兩個Junior示一示意。

「請兩位跟我地黎。」兩個靚女Junior就帶我地穿返件袍,開始搞個頭~

你問喺星級Salon整頭有乜特別?

其係都無架~

都係咁多笑容~都係咁多水吹~都係咁多讚美既說話~都係好似氹你開心多過整你個頭咁囉~

不過又真係舒服D~又好似無咁趕住收工咁既~

邊吹水邊整個頭,不知不覺咁又搞左兩三個鐘~

平時返工D時間總係好似好難過咁!但今日...時間總係好似...

「整完個頭...真係靚左喎...」Lennon打量住我。

『你又想話我之前唔靚啦...』我又冷眼咁望住Lennon...

「唔係~唔係~其實...」Lennon諗左一諗,「係唔係個個女人都係咁架?」

『都係點丫?又想話我地D女人麻煩?』我Keep住冷眼咁望住Lennon!

「算啦...你都係當我無講過啦...」Lennon擰下擰下頭,交張黑卡俾髮型師。

唔夠人講就唔講?呢D算唔算係投降?

『你整完個頭都靚仔左丫~』我又讚下Lennon先~

「都真係丫呵?我之前出席D咩咩晚宴呢...咩咩酒會呢...咩咩場合呢...都唔會話專登走黎Set頭...估唔到...又真係幾好睇...」Lennon對住塊鏡點下點下頭。

『係丫呢?』我又打量下鏡中既Lennon。

「係丫…係丫...或者係...平時身邊無人會...提議...」Lennon諗下諗下...

『嗯?』我有D唔係好明...

就喺呢個時候,個髮型師拎埋張單過黎:「文生~請簽一簽~」

「哦~好~」Lennon就拎起支筆簽一簽。

平時身邊無人會...提議?

Lennon係想講咩呢?

「慢行啦~」個髮型師送到我地落樓。

「咁我地都返去換一換套衫先。」

『嗯~』

時間都唔早喇…我諗都差唔多要返去準備一下~

“吼~吼~吼~”坐住架法拉利...

“吼~吼!吼!!!”返翻去Lennon既屋企...

今日既時間都好似過得好快...

去既地方唔係好多...不過就好似好充實。

無任何生產力都叫充實?

咁唔通困喺公司浪費生命先叫充實?

今日…我開始明白呢個道理...

試過唔係為公司活一日...而係為自己活一日...

至於以後...我又有無機會只為自己而活呢?

「咁...你上去換先啦。」再次踏入Lennon間豪宅,佢指一指樓上。

『使乜我先你後丫?一齊上去換啦~』我左手拎住個載住條黑色露背長裙個紙袋,右邊拎住盒NuBra Fing下Fing下咁~

「下?」Lennon有D愕然咁望住我。

『下乜鬼丫?你上面仲有個屬於你既衣帽間架嘛~』仲要有條校裙喺裏面添~

「之但係...」我無等Lennon講落去...

『仲之但係乜鬼丫?唔通我真係會怕你偷偷走過黎𥄫我咩?行啦~』我就推住Lennon背脊,行上樓梯~

講真一句,要𥄫我既話丫,你趁我換緊既時候走上黎𥄫都得啦~

我都吹你唔脹架啦~

仲擔心得咁多咩~

「嗱...係你話OK架咋...」推住Lennon背脊上到黎佢間睡房,佢都仲係要再三強調咁...

好似驚死我會蝕底咁~

『得喇得喇~快D換啦~』我就唔理佢咁多,轉身就行入衣帽間~

入到衣帽間,我好放心又好安心咁將自己身上條連身短裙除出黎~

再諗都唔諗就除埋個白色Bra~

淨係著住條白色底褲既我對住塊全身鏡...完全唔怕Lennon會走過黎𥄫我~

我唔係唔怕俾Lennon𥄫,而係我知道...Lennon唔會咁做...

唔知點解...我總係覺得Lennon唔會咁做...唔係D咁既人...

唔係D…乘人之危既人...

唔知點解我會有咁既感覺...

而且仲好強烈...

或者呢D就係女人既直覺...

貼好個NuBra,好小心咁著埋條黑色露背長裙上身,喺塊全身鏡前照兩照...

好靚...

呢一刻我覺得自己真係好靚...

岩岩做完Facial...做完Spa...Set埋頭既我...著上條Salvatore Ferragamo既黑色露背長裙...原來可以咁靚...

高貴得黎...又帶年輕...

就好似一個高貴既小公主咁...

平時無咁既時間...無咁既機會...原來只要好好咁為自己活一天...都可以咁靚...

陶醉喺全身鏡中既自己,突然發現好似差D野咁...

差D咩呢?

唔係差D手鏈頸鏈…

而係差D...差D...

我再仔細D...由頭髮...打量到落...腳趾尾....

腳趾尾...

『高踭鞋!』

我望住自己對腳仔...

係喎!都唔鬼記得要買埋高踭鞋添!

無高踭鞋又點去晚宴丫?!

點解D咁重要既野我都會唔記得架?!

呢次真係英明一世,笨柒一時!

呢D時候就梗係第一時間走去同Lennon講聲!問問佢有乜解決辦法!

我就急急腳咁走過去Lennon嗰邊!

『Lennon!Lennon!』當我行到去Lennon既衣帽間之時...

「嘩!你做乜無啦啦走過黎架?!」Lennon正正就著緊件白色恤衫!

我打量下Lennon既...下身:『車~你都換好左條褲啦~都無野睇架啦~』

Lennon都已經著好左條西褲,怕乜鬼野姐~

「都...都係姐...」Lennon仲係驚驚青青咁快快手手扭好D衫鈕!

『你扣錯鈕喇~』我就幫一幫Lennon解一解,再扣一扣返岩~

咁大個男人都嚇到連鈕都扣錯?使唔使丫~

「Er…唔該…」Lennon有D尷尬咁。

『唔使客氣~』我打量一下Lennon...

著住恤衫西褲既Lennon真係好Man~

引死人囉好唔好~

「係呢...你做乜無啦啦走過黎?」Lennon一邊揀...煲呔,一邊問。

『係呀係呀!原來買漏左高踭鞋呀!點算點算?』我一邊望下D煲呔,一邊問Lennon點算!

其實又有乜好揀呢?

個個都係黑色...

只係睇下咩暗花...

話明暗花都無人留意到架啦~

戴邊個上頸都係一樣姐~

「買漏左高踭鞋丫?唔緊要啦...嗰邊個鞋櫃都有唔少高踭鞋...」Lennon拎起兩個煲呔睇一睇...又諗一諗...

『岩著先得架…』我冷眼咁望住Lennon...

「你試左喇?」Lennon又拎起兩個煲呔睇一睇...又諗一諗...

『未丫…』使鬼試咩...

衫都唔岩啦...更何況係鞋?

仲要係高踭鞋...

「唔試過又點知唔岩呢?」Lennon放一放低手上D煲呔,行一行過去。

『乜真係要試過先知架咩?』我就跟住Lennon身後行。

「試下都無壞既...」同Lennon行返過黎女裝衣帽間。

『試左唔岩咪嘥時間...』

「乜你好趕時間咩?」

『我...咁又唔係...』

「咁咪係囉。」

Lennon拉一拉開個鞋櫃:「坐低先。」

『嗯...』我就坐一坐喺張梳化道,望住Lennon...

Lennon揀下揀下...喺放得整整齊齊既高踭鞋之中揀下揀下...

望住Lennon呢個細心樣...專心樣...用心樣...

為左幫我揀鞋...一個男人...為左幫我揀鞋...

Lennon好用心咁幫我揀左好一陣子,拎起左對黑色高踭鞋...(咁用心揀咁鬼耐把鬼咩?!咪又係黑色高踭鞋!)

Lennon拎住對黑色高踭鞋...單膝半跪咁跪喺我面前...

Lennon好溫柔咁拎起我隻右腳…幫我穿一穿上...

唔知點解...Lennon呢個舉動...令我心跳加速...

跳到“卜卜!”聲嗰隻!

點解會咁架呢...點解又係咁架呢?

呢次已經係第二次...第二次有呢種心跳...

第二次...Lennon令我有...

Lennon好溫柔咁拎起我隻左腳…幫我穿一穿好埋之後:「好岩丫...好似度身訂造一樣咁岩。」

我回一回神...望一望返我對腳仔...已經穿上左對黑色高踭鞋...

『嗯嗯...真係好岩咁...』又會真係咁岩既...

「起身試下舒唔舒服。」Lennon向我遞一遞手。

『哦...好好...』我就傻下傻下咁捉住Lennon隻手...

企一企起身...行兩步...對住塊鏡...望一望住鏡中既自己...鏡中既我同Lennon...

Lennon亦都好似我咁...望住鏡中既我同佢:「你真係好靚。」

真係好靚...

企喺Lennon身邊...真係好似...靚左咁...

呢D係唔係叫做...襯?

我同Lennon...相襯?

「不過仲差少少野...你等等。」Lennon行一行出去...

差少少野?

差少少咩呢?

我就望住塊鏡裏面既自己...等一等...

好唔真實...望住塊鏡裏面既自己...好唔真實...

其實都唔係而家先覺...

其實今日一早起身就覺得好唔真實...

今日所發生既所有所有...堅離地...

真係連FF都無FF過...我會有今日既...經歷...

我無FF過可以為自己活一天...更無FF過做一日有錢人...過一日有錢人既生活...

而事實上...今日仲未完...

等左一等...對住塊全身鏡再等左一等...

「唔好意思...要你等得有D耐添。」Lennon拎左幾盒...大大小小既...藍色既...

Lennon放一放低幾盒大大小小既藍色盒...打一打開個大D既藍色盒...喺藍色盒裏面拎左條...

鑽石項鏈?

我望住Lennon拎起條白色黃金鑽石項鏈...慢慢行到我背後...

我望住全身鏡裏既自己...望住全身鏡裏既Lennon...好溫柔咁幫我戴條白色黃金鑽石項鏈...

Lennon幫我扣好項鏈...再好溫柔咁幫我整理一下我把秀髮...

Lennon細心咁打量一下鏡中既我,點一點頭:「好襯你。」

好襯我...的確好襯我...

條鏈好襯我...而我...同你...

「幫你戴埋條手鏈同隻錶先。」Lennon再喺另外兩個藍色盒拎出一條白色黃金鑽石手鏈同一隻白色黃金鑽石腕錶。

Lennon再好溫柔咁幫我戴條白色黃金鑽石手鏈同隻白色黃金鑽石腕錶後,我再喺塊全身鏡前擺個Pose...

Lennon再細心咁打量一下鏡中既我,點一點頭:「絕配。」

絕配...

喺塊全身鏡之中...除左我身上既衣物同飾品係絕配之外...

我同你...又算唔算係...絕配?