總在寂夜裡想起妳: 1

呢件係舊年既事。 

哥時我十八歲，DSE炒左，入唔到想入既科，不過好彩，都入到一間唔錯既商學院，總算對父母有個交代。 

咩ocamp住hall我通通都冇報到，因為女朋友呷醋，唔想我去。咁我亦尊重佢，所以成個暑假都做左個毒向左走向右走。交代番少少背景，我女朋友細我一年，哥時未入大學。 

至於我，就正正常常一個男仔，冇咩特別。 

我同呢件事既主人翁第一次既邂逅就係係大學嘅第一堂。呢一堂係英文堂，九點堂我八點半就到咗大學，因為呢間大學出名迷宮陣，所以我都搵咗好耐先搵到個班房。 



入到去就是但搵咗個後排位坐，因為係英文堂，唔係咩大lecture，所以個班房就好似以前中學個類嘅班房，枱凳嘅位置都係差唔多咁。 

一入到去個ah sir就叫我哋係張紙上面寫底自己個名，讀咩科，然後佢就好似D變態佬咁拎住部攝影機，叫你好似犯人咁拎住張紙俾佢影相。 

影完之後當然周圍望下D女同學啦，好可惜冇一個叫靚嘅。 

正諗住放棄嘅時候，有個人係課室出面怕怕醜醜咁敲門，之後推開咗對門伸咗個頭入嚟。 

嘩！唔望由自可，一望完全係比佢俘虜咗。及頸嘅深啡色長髮，會微笑嘅雙眼，配埋個個永遠令我難忘嘅笑容，我完完全全淨係可以呆咗咁望住佢。 



好彩佢並冇留意到我嘅失態，而係好唔好意思咁同個ah sir講sorry啊遲到啊。個ah sir笑笑口咁話無所謂，之後叫佢一樣寫紙影相。 

係ah sir影佢嘅時候，我都靜靜地用我嘅雙眼，拍低佢呢一幕咁搞笑尷尬嘅時刻。 

個時嘅我因為有女朋友，無諗過要去溝佢，不過之後發生咗太多太多嘅事，令到我每次到咗寂夜裡，總係想起妳。