總在寂夜裡想起妳: 2

好記得以前仲係中學嘅時候，D師兄師姐成日都話捱埋中學最辛苦嘅公開試之後，修成正果入到大學就可以任走堂。 

萬料不到我竟然會咁渴望上英文堂，一星期兩堂英文堂就變左我最期待嘅時間，每次都早到，然後就可以睇佢每次遲到之後道歉果個傻笑樣。 

不過好可惜嘅係上咗成個月堂都搵唔到機會認識佢。皆因佢同另一班女仔一齊坐，而我哋一班男仔就坐第二邊，個ah sir又好小搞跨組活動，搞到冇咩藉口去撩佢傾偈。 

可能因為成個暑假都毒咗係屋企，成個人即刻好毒向左走向右走。不過嗰時我成日同自己講，我有女朋友，唔好周圍溝女，所以我都淨係享受下上堂望下佢嘅感覺。 

題外話，佢英文幾勁，ah sir成日叫佢出嚟 present佢d功課，搞到我哋成班男仔名正言順又流晒口水咁欣賞佢嘅英文作文。 



之後都係一直維持咁嘅狀態直到十一月頭。呢一個月令我明白到咩叫緣份。 

話說因為我星期一至五都天地堂，上完朝早個堂之後我就會去圖書館hea下訓下覺咁。個日hea完個晏晝之後，我就去上堂。我由圖書館最底個層行返上地面，行到中途個陣竟然比我撞到佢，嗰時佢同一個MK仔一齊行落嚟。 

雖然我好想行上去同佢吹下水，不過因為趕上下一堂嘅關係，我都係就咁say個hi就算。佢個反應都係幾驚訝，笑笑口咁同我say番個hi。之後我就去咗上堂，到咗第二日呢件事又再發生！ 

個日冇英文堂，我上完econ之後就走啦，一路行就一路噤下電話，噤噤下個電話抬高頭咁啱又見到佢！佢又係尷尷尬尬咁同我say個hi，個樣可愛到呢 

之後個半個月差唔多有返學嘅日子都撞到佢，亦因為咁開始令我個心囉囉攣。 



個感覺就係好似去邊都好期待可以撞到佢咁，腦海中開始多咗佢嘅出現。 

尤其是去咗寂夜嘅時候，會不期然咁想起妳。