總在寂夜裡想起妳: 4

自從個次m記閒聊之後，我發現我對佢嘅好感有增無減，而我亦都feel到佢開始留意到佢嘅世界入面多咗個男仔嘅存在。 

之後上英文堂有次好好彩我隔離個男仔冇返學，ah sir調咗我去佢個組到。去到個組我都未開始講嘢，隔離個兩個八婆已經雞啄唔斷，打擾晒個氣氛 

最後成堂都係無乜好特別嘅交流，無計啦可能時機未到。 

落堂就死死氣咁去圖書館。原本個日下晝無堂，但要去聽talk。個talk其實由九月中已經開始，我記得我報咗十月其中一日聽，但個日通宵睇完波眼訓冇去，拖下拖下得返最後呢個時間去，唔去就會fail，唯有逼住去喇。 

好唔容易hea到下晝，就去個體育館聽點用個gym嘅talk。入到去求其搵咗個位坐就恰一陣啦，因為個talk實在太悶嘅關係我都無乜留意係講乜。 



聽完個talk之後，講talk嗰條友，好似叫阿鈞，就叫我哋起哂身學做熱身運動。心諗熱身運動都要教 

一起身周圍望下，咦？又係你？ 

個刻佢都望咗過嚟，我地相視而笑，好似明白到撞到對方係一種習慣咁。 

原來佢同我一樣，都係唔等到最後一刻都唔做嘢嘅人。 

「專心做熱身啦你。」比佢望到我個心噗噗噗噗跳，唯有勁噏下等自己無咁尷尬。 



「嘿嘿。」又係招牌嘿嘿傻笑，我真的不行鳥 

之後就跟住個阿sir做熱身，佢係度彈下彈下，我哋又跟住彈下彈下，今次到佢尷尬啦，因為佢著住條迷你熱褲，彈起上嚟勁唔方便。 

望住佢咁狼狽嘅樣，我忍唔住笑咗，佢又笑返，兩個一齊傻笑。 

做完熱身運動就入gym房學用啲gym嘢，因為小弟打開波有做開gym，所以全程我都係冇聽阿鈞sir噏乜，淨係係gym個塊鏡個度望住佢。 

你哋可能諗，Hi咪咁毒啦，我會話，有時太進取其實失去咗好多樂趣，相反望住鏡入面佢嘅倒影，會有種說不出嘅甜蜜感。 



阿鈞sir講完跑步機之後又講吓單車機，之後就叫我哋試下自己用啲機。講真我冇乜興趣玩，所以都係行行企企，之後我見到佢係到玩擘大手臂用力推向心口練手臂果啲機，忍唔住行咗埋去，笑佢玩到成個傻婆咁。 

嗰時佢兩隻手擘大，坐咗喺度好似被人綁住咁。佢見到我望住佢係度笑，即刻鼓埋泡腮，微嗔：「完！」之後又自己嘿嘿咁傻笑。 

個刻我同佢雖然隔咗幾步嘅距離，但我同佢心靈上就好似連埋咗一齊咁，任何嘅說話都係多餘，倒不如用心好好咁感受呢一刻。 

「好啦，快樂嘅時光好快過，又係時間收工啦。」鈞sir見夠鐘心情都雀躍起嚟。「咁多位出番出面搵個位坐，幫我填埋啲問卷就可以走架啦。」 

行到出去壁球室，我就坐咗係觀眾席第一行，拎咗份問卷就係到填。 

雖然話係互相認識，但我冇諗過佢會主動坐埋嚟我隔離，仲撩下我傾計。 

「How do you feel about the course？你點填呀？」佢笑笑口咁哄埋嚟，啦我警告你咪哄咁埋呀，信唔信我錫你架。 

「個ah sir幾靚仔？你gay架？嘿嘿。」佢偷望我寫咗啲乜，估唔到佢咁都笑一餐。 



「填完，走得。Byebye。」交咗份問卷我就拎袋走，佢就話要去洗手間先。 

係洗手間出面等咗一陣，我心諗係咪應該要等佢呢，不過好似好怪咁，我又唔係佢男朋友。 

所以最後我都係自己走咗，而家諗返起都覺得傻仔咗