萬呎高空上來一場死亡遊戲: 8

靜。 

機艙一片寧靜。 

靜得聽不見阿樂的呼吸聲。 

笑。 

阿樂臉上掛著一抹微笑。 





燦爛得令人忘記一生的苦痛。 

傷。 

文康心頭黯然心傷。 

悲傷得莫名其妙生出一股憤怒。 

一股想把首領撕開的衝動。 





「後生仔，」這時候，一把慈祥溫柔的聲音傳入文康的心窩裏，「你見唔到佢面上嘅笑容咩？」 

文康回過頭來，看見是機場裏遇上的老婆婆。 

她乾癟的手一邊輕撫著阿樂的臉龐，一邊徐徐說道：「佢嘅故事，佢嘅人生，係一個悲劇。」 

「佢唔應該咁樣俾人對待！」文康紅著雙眼，回憶起自己因為沉默的個性而在班裏受到排擠的片段。 

「冇錯，社會唔應該咁樣對待佢。」婆婆嘆了一口氣，「但係我哋有能力改變呢個畸型嘅社會咩？」 





文康眼前彷彿出現了往日欺凌他的同學，和站在一旁雙手疊在胸前的老師。 

「既然我哋係一班非主流嘅人群，就要接受社會對我哋嘅歧視，學識係不公平嘅環境下生存。」 

這，是什麼道理？ 

「呢個小朋友，活盡一切悲痛，但係喺生命嘅盡頭，佢反而可以笑出最美麗嘅一幕，我哋唔係應該為佢高興咩？」 

這，是什麼鬼道理？ 

「佢只係想搵到一班朋友，了解佢，陪住佢，記住佢。能夠係最後嘅時刻達成佢嘅心願，我相信佢唔會留下一點遺憾。」婆婆笑了笑，樣子依舊是那麼慈祥，但卻教文康不寒而慄。

「康，人死不能復生，唔好咁執著啦。」律動的輕語帶著魔力，讓激動的情緒稍為平靜下來。 

因為與眾不同，所以要學會享受特別的待遇嗎？ 





「人，唔係應該生而平等架咩？」文康咬著牙，語氣裏充滿不忿。 

「平等？」老婆婆笑得露出了口裡疏落的黃牙，「呢個世界有平等架咩？」 

「你望下呢班機，」老婆婆示意著眾人，「真係有人打起上嚟，我同伯爺有能力反抗咩？坐係個邊個小朋友，又有咩條件生存到落去？」 

少婦聽到此話，下意識抱緊旁邊的兒子。 

「呢個遊戲開始嘅時候，我同伯爺已經知道今日係我哋相處最後嘅一日。」老婆婆柔情的雙目望向後排坐着的老伯伯，「我同佢冇帶著任何嘅遺憾，但係我唔希望見到咁年青嘅你，會失去理智，喪失求生嘅意欲。」 

此番話扇了文康一個耳光，直把他打醒了。 

「我知道我講嘅嘢好似歪理咁，但係呢樣正正係我哋生存落去嘅法則。」 





「我哋無條件談尊嚴，因為係世俗道德嘅眼光下，我哋係離經叛道嘅一群。我哋只可以俾佢哋恥笑，俾佢哋排擠欺凌，然後繼續過我哋嘅日子。」 

「我哋唯一可以感到慶幸嘅，可能就係喺一生裡面，達到自己嘅目標，找尋到屬於自己嘅真理。」老婆婆語重心長地道。 

「你可能覺得我痴線，但係呢個係我活咗近百，對呢個世界嘅感覺。我當然希望未來可以好似你講咁，人人平等，唔會再有歧視嘅發生。但係係呢一切發生之前，弱小嘅我哋首先要學會點樣生存落去。」老婆婆一番話刺激著文康的腦細胞，把他帶進另一個思考空間。 

「你有脫下口罩嘅勇氣，但係你冇屈膝求存嘅胸襟。奉行住你腦海入面清高嘅諗法，一股衝勁做你認為啱嘅事，你就只會淪為呢個遊戲嘅玩物。」 

老婆婆走回座位，握著老伴的手。 

「自尊唔能夠當飯食架，好好咁記住啦。」 

距離降落時間：14小時30分鐘。