萬呎高空上來一場死亡遊戲: 17

「嘩屌，唔撚係呀話。」膽小男看著鋒利得發亮的刀刃，吃驚得口也合不起來。 

「點解會有啲咁嘅嘢…」少女下意識地向後縮，避開發芒的刀鋒。 

「我相信唔會得我呢個儲物櫃有武器，你哋都睇下你哋頭頂個儲物櫃。」文康右手緊握著刀柄，左手在刀身上來回撫摸著。 

冷靜男推開呆若木雞的友人，抬頭打開儲物櫃。 

只見在行李袋後亦有一黑色布袋，與文康黑袋所不同的是，這袋比較幼，但更長。冷靜男嚴肅地把手伸進袋裡，然後面子露出滿意的一笑。 





「好刀，好刀。」他點著頭，從袋裡抽出修長的日本刀，「呢把刀，好啱我。」 

與此同時，華叔亦從布袋中抽出一把背後刃薄的大刀。 

「哈，我想話唔啱我都唔得啦。」華叔乾笑著，同時提刀虛斬著前方。 

「喂，阿行、阿偉，你哋諗成點呀？」冷靜男把日本刀托在肩膊上，滿像歷史書本裡的戰國名將。 

「我…我唔知呀…」阿行低下頭，雙手互相緊握著，狀甚緊張。 





「屌，你條死仔船頭驚鬼船尾驚賊，你望下訓咗係度嘅阿明！」急躁的阿偉按著阿行的頭，逼使着他看著倒在地上的阿明。 

「你係唔係想好似佢咁呀！」阿偉用力一拍阿行的後腦。 

「做囉！做囉！」阿行撥開阿偉的手，發著晦氣說，「阿傑，個袋入面仲有無嘢呀？」 

「無啦…你睇下後面嗰幾個櫃有冇。」性格穩沉的阿傑沒理會友人，自顧自的把玩日本刀。 

右邊的夥伴都加入了自己的陣營，文康心裡不由得滿意地笑了起來。他回過頭來，卻發現左邊的幾位乘客都只是繼續坐在位子上。 





「你哋唔打算用武器？」文康盯著中年婦女，和其餘的幾位乘客。

「我唔打算殺人。」中年婦女閉上眼睛，柔和地道來。 

「你唔殺人…就只可以坐係度等運到架咋…」文康試圖游說更多的人加入自己的陣營。 

「我尊重你哋嘅抉擇。每個人都有自己既價值觀，你哋選擇染住鮮血落地獄，而我，則選擇著住白袍上天堂。」中年婦女的語調與她心情一樣平靜得沒泛起一絲漣漪。 

「我哋就係唔想落地獄先有此決定！我哋想生存落去，所以我哋要靠自己嘅雙手開拓我哋嘅未來！」 

「你覺得就算生存到落去，你哋個世界依然會同以前嘅一樣？」 

文康沉默著，這個答案的確很難面對。 

「唔會…唔會…你哋只會活係無比痛苦嘅地獄輪迴當中。」婦女抬起頭，深吸了一口氣，「人各有志。去啦小朋友，爭取你哋嘅生存空間。」 





文康看著其他乘客，他們都是點著頭，認同著婦女的想法。 

即使在亂世當中，有些人還是不能拋開人性，忘卻道德。他們為崇高的理念犧牲掉自己的性命，是一種值得的執念，還是不會變通的愚鈍表現？ 

「既然你地想法堅決…咁我都唔勉強你哋…」細想婦女的一番話，令文康心裡生了一陣糾結，多了一份掙扎。 

咇咇咇咇…咇咇咇咇… 

電子錶響聲一下子敲醒了迷失了的文康。 

「等陣我再講我嘅計劃。」文康套上口罩。 

距離降落時間：12小時41分鐘。