我伸手熄咗屋盞燈,廢事比人知道我哋嘅位置。 

「喂,呢度有冇滅火筒架?」我細細聲咁問689。 

「又要嚟做咩呀?」689好似好不滿我咁多要求咁。 

「你有冇睇die hard架,光頭佬又係見冇路走,拋個滅火筒去人哋度之後好型咁射爆佢,炸咗條友落街!」 

「你有槍唔直接射條友?」 



「…」 

仆街我真係想一槍打爆你個頭。 

689見我個樣都燥燥地,即刻指住前面遠少少嘅牆角,果然有支滅火筒。 

「比你睇下咩叫型啦!」我碎步行前拎起咗個滅火筒,屏息以待。 

「呀殺手阿,」 



「叫我做阿K。」本來諗住擰轉面招牌chok一chok樣,但當我望到佢個樣嘅時候,算啦當我冇講過。 

「哦。阿K呀,等陣你會唔會射唔中個滅火筒架?」 

我決定等陣一槍打爆你個頭。 

「喂嚟啦嚟啦,專心啲!」佢應該feel到我啲殺氣。 

我雙眼盯實樓梯口,直到見到個…用絲襪笠住個頭嘅殺手。屌,理鳩佢食緊安全套當香口膠抑或用m巾做口罩啦,照殺! 



我將罐滅火筒向佢拋過去,可以見到佢因為對絲襪搞到變晒形嘅表情更加扭曲,呢招work呀! 

我冷靜咁瞄准滅火筒。 

「蕉」。 

滋滋滋滋滋…… 

冇預期中嘅爆炸,只係見到有啲氣由個窿到漏咗出嚟。 

「呀仆街,罐滅火筒…好似過咗期。」 

我而家就一槍打爆你個頭。 

個絲襪殺手都呆咗,不過佢好快回復理智,見到佢隻手向後放,就知佢想蚊槍! 



無計啦!我對住絲襪佬扣下扳機! 

「卡嚓卡嚓。」 

「sor鳩ry,本來諗住一粒彈夠殺你。」我無奈咁聳一聳肩。 

我同689企咗係度,望個變態佬一步一步咁行過嚟。 

「阿K,估唔到今日你會死係我手上!哈哈哈哈!」 

把聲咁似T嘅? 

呢個時候,天花板盞燈又閃一閃,之後仲熄埋! 



機會嚟啦!
已有 0 人追稿