我明明係殺手，搞乜鬼掉返轉保護個目標？: 6

相信絲襪殺手應該未適應呢個突如其來嘅情況，我敏捷咁向前衝，瞬間收窄同佢之間一步半嘅距離，直接衝入佢嘅懷抱，將佢撲低！ 

「蕉」，一抹火光照耀咗漆黑嘅通道，伴隨著嘅係689嘅慘叫！ 

光管再次回覆正常，我回頭一望，見到689跪咗係地下，眼神茫然咁望住我。 

「仆你個街！」我一拳打暈咗絲襪佬，即刻扶住689。 

「我…我係咪會死呀？」689無助咁望住我。 





「屌，講呢啲。」我忍著淚，空出嚟嘅手係佢胸口到搵傷口，希望幫佢止血，但好奇怪，佢外套底下嘅白色襯衫唔見有血喎。 

然後我摸到佢心口上面有個硬物。 

掀開佢件外套，我見到嘅係…一部 nokia 3310。 

「我屌，你冇事吖。」我拎起部3310，清楚咁見到粒子彈有一半射入咗部電話到，冇射穿，即係條死仔冇事啦！ 

「嘩屌，神器果然係神器！」佢撫摸住佢心口，「不過啱先好痛架喎。」 





「咁大衝力，係人都痛啦。」我扶返佢起身，然後行前拎條繩綁住絲襪佬。 

「係喎，咩年代呀，仲袋住部3310？」 

「你識乜春呀，入面個貪食蛇，係男人嘅浪漫呀。」佢好得戚咁笑。 

「你講起我又想玩，等陣借嚟跟機啦。」 

「唔得喎。」 





「點解呀！」我好似俾女仔拒絕咗咁。 

「俾人射爆咗呀，玩乜鳩呀。」 

「吖係喎。」 

「屌…」呢個時候地下嘅絲襪佬傳來一聲呻吟。