我明明係殺手，搞乜鬼掉返轉保護個目標？: 8

推開咗大門，一陣冷風撲面而至，吹到我眼都擘唔大。 

「小心。」我示意689烏低身。 

「出面一條友都無喎，驚咩呀。」689越過我，自己衝咗出去。 

突然，走廊轉角有個阿婆行咗入嚟！ 

我反射性咁將手放喺腰後，準備拎從絲襪佬到執嘅槍。 





越係唔起眼，越係有可疑。 

只見個阿婆健步如飛，仲要腳踏八卦方位，一睇就知精通五行八卦功夫，呢套步法進可攻退可守，練到爐火純青嘅地步要係上水扭過班水貨客絕對唔難！ 

睇嚟我要先發制人！ 

「喂，伍姑娘！好耐冇見啦！」689同個阿婆打招呼，乜原來識架 

「QQ！好耐冇見啦！」被稱爲伍姑娘嘅阿婆向住我哋揮揮手。 





「你識個阿婆架？」我細細聲咁問689。 

「佢住我樓上架，佢成日拎啲啤酒落嚟同我劈嘅！」 

啤酒？ 

「伍姑娘，你又飲醉啦？」689好熱心咁上去扶住個阿婆。 

飲醉？ 





我屌，諗多咗添 

「呢個邊個嚟架？」阿婆指住我。 

「佢…佢係我表哥阿！」 

「咁佢孭住果個呢？」 

「佢…佢係我表哥條女呀！」 

「條女做乜塊面笠住絲襪嘅？」 

「欸…我表哥鍾意玩絲襪架嘛！」 

「後生仔果然淫蕩。」個阿婆露出極其淫賤嘅眼神。 





我都不甘示弱，揼低條友，雙手叉腰挺胸，擺返個你吹得我漲咩嘅姿勢。 

「條女個胸，平過我喎！」阿婆你知就好啦。 

「欸…我表哥撚腳唔撚胸架！」 

「條女個褲浪突起嘅？」 

「欸…佢M到，實住條M巾咪腫囉，哈哈哈哈！」689係度鳩笑。 

「你又知佢M到？佢係你表哥條女喎！」阿婆好淫咁奸笑。 

「欸…欸…唔好問啦伍姑娘，我哋趕時間呀，遲啲見啦！」689都兜唔到，諗住鬆人。 





「好啦好啦，你扶我返門口啦！」 

「okok冇問題！」689扶住阿婆，慢慢咁向住我行。 

我一直留意住阿婆，硬係覺得唔對路。 

當佢哋經過我身邊，同我平排嘅時候，我突然感到一絲殺氣！