點知,我諗諗下瞓着咗。一覺訓天光。

由於係星期六,所以我又唔使返學。我一個毒撚,會有人約咩?
一如既往,我又坐係屋企打機。
平時嘅我,打機嘅時候唔會諗啲咩,因為其實根本冇野煩。係今日唔同。

今日晰晰好早出咗去,佢冇講低佢去邊,我10點起身已經唔見佢喺度,我越諗越擔心,就連我平時可以輕鬆KO嘅LOL,今日我顯得力有不逮。


直覺話俾我聽其實佢又一次約咗阿俊。或者咁講,係佢俾人約。雖然啲人成日話未問清楚唔好咁快下判斷,但係有時事實嘅嘢唔使問都feel到。



我一邊打機一邊望住個鐘,11點⋯⋯12點⋯⋯1點⋯⋯2點⋯⋯

終於,差唔多3點,晰晰終於返嚟啦。

「咦 你起咗身啦?好攰呀⋯⋯琴晚兩點先訓,八點幾就要起身出門口。」

「邊個叫你咁夜訓又咁早起身?抵你死啦!」

「咁約咗人吖嘛,又唔想太夜⋯⋯」



「約咗邊個呀?」

呢下我發覺自己嘅演技真係進步左好多,我竟然可以扮到完全唔care佢約咗邊個去咗邊。其實我心裏面真係好想問清楚佢,因為咁樣擔心落去都唔係辦法。

「你知黎做咩吖。」

佢會唔會根本唔想我知?由於我實在忍唔住,終於開口問佢。

「其實你係咪又約咗阿俊?」



「係⋯⋯」

個刻我個心⋯⋯簡直就係碎開咗。

「好囉好囉,女神有仔啦!」我依舊嬉皮笑臉咁同佢講。

「唔係呀,朋友嚟嘅咋。唔好諗太多啦你!我瞓陣先。」佢塊面紅咗。如果要文青啲咁講,佢臉上面流露左一種羞澀嘅笑容。

個一刻我根本唔知點解自己會咁擔心,點解咁驚,點解會咁擔心佢俾人搶走。

我未可以承認自己真係鍾意佢,我亦都唔敢相信我竟然會咁緊張一個只係識咗幾個禮拜嘅女仔。

我承認我係有FF過佢將來會係我女朋友,但係而家事實話俾我聽⋯⋯IMPOSSIBLE。



我從來冇試過會為咗一個人起兩日入面心情起伏會咁大,或者又要懶係文青啲咁講,也許愛情就像在大浪中的帆船一樣。
已有 0 人追稿