其實⋯⋯我根本唔知自己想點。

一方面,好唔想阿俊同晰晰一齊。可能出於妒忌心。

一方面,我唔知自己係咪鍾意晰晰。所以我冇進一步行動。

而我亦只得兩個選擇。

一、去馬。
二、死心。



我依家選擇咗前者。


星期一 早上 6:30
「鼓起這勇氣,跨出這距離,差一點我⋯⋯」我嘅鬧鐘鈴聲響起。

係呀,又係新嘅一日。

一聽就知呢個係某電影嘅主題曲啦。點解我當初要set呢首?



因為聽首歌好似係講青春,我嗰日唔知係痴咗邊條筋,想的起心肝努力學習...

咁最後我當然係冇成功到啦。我記得我只維持左九個字。結果抵受唔住誘惑走咗去打機。


好啦,廢話唔講太多。

點解我今日要特別記錄住過時間呢?因為今日係我第一日的起心肝追晰晰。




係可笑嘅,你咪笑囉。既然我都選擇咗,都已經冇回頭路。 人生自古誰無死!

一早,晰晰仲未起身,但係我已經煮定左早晨全餐。實不相瞞,平時我通常都係出街食飯,好少係屋企煮。

尤其係早餐。都係靠低年級嗰陣啲家政堂學返嚟。 望住製成品,我都有幾分滿足。

6:57
由於晰晰仲未起身,我入咗佢房,結果佢仲瞓緊覺,咁我梗係鏟佢起身。

「起身啦!夠鐘啦夠鐘啦遲到啦!」我用一個激昂嘅腔調叫佢起身。

「咩啊⋯⋯」佢迷迷糊糊咁細聲講。




「返學啦大小姐!」

「shxt!」佢沖左出房。「乜嘢啊?七點鐘咋喎而家,你叫我起身?我要瞓覺呀⋯⋯」佢起廁所一邊講一邊行出嚟。

佢又諗住行返入房繼續訓, 於是我就用我強勁嘅臂彎擋住佢。

「今日煮左早餐啊,乖啦,快啲去刷牙洗面。」

佢好唔情願咁走返入廁所。

「快少少呀!冇時間食早餐架啦」我一邊拍門一邊大叫。
已有 0 人追稿