我一家人都接受唔到細佬已經死左既事實: 我一家人都接受唔到細佬已經死左既事實（上）

我細佬已經死左，我好清楚，佢係5年前就已經死左。個年我21歲，細佬18歲，我帶佢兩個人一齊行山，我親眼見住佢差錯腳跌左落山崖，而比人救返上黎既時候已經死左。我好內疚，我覺得都係因為我冇睇住好我細佬，佢先會死，而呢五年黎我都要接受屋企人既懲罰，就係佢地一直當細佬仲在生。細佬過身既呢個消息黎得太突然，我父母都冇幫佢攪到葬禮，我唔知佢地點樣處理細佬既遺體，而我都唔敢問。細佬過身既往後半年，我一家人，呀爸呀媽同埋呀哥，都過住好似細佬仲在生既生活。佢地食飯拎左5個碗，我以為係一時改唔到，點知佢照樣裝5碗飯，照樣留空細佬坐開個個位。我唔敢講d咩！細佬岩岩過身，可能呢個係一個我地一家人一齊悼念細佬既方式。直到個年細佬既生忌，佢地好開心咁買左個蛋糕，要幫佢慶祝生日。我都冇出到聲，我深信過左一年可能會好d架啦！但係我個心始終好唔舒服，望住佢地對住空氣唱生日歌，我只覺得佢地好似精神有問題咁，亦都覺得好心痛。「細佬，吹蠟燭啦！」呀媽講。
「女，拎開個袋啦！細佬冇位坐啦！」呀爸講。
「我岩岩同細佬去左睇葉問呀！好好睇呀！」呀哥講。過左細佬既生忌，細佬都死左差唔多一年，我越黎越忍受唔到屋企人既行為。有一晚開飯既時候，我冇裝到第五碗飯，空左細佬個位。
「做咩唔裝細佬個碗飯呀？」呀媽問。
「媽！細佬已經死左啦！」我小心翼翼咁講出。
「啪！」佢即刻摑左我一把。「你講咩呀？」
「佢已經死左啦！」我重覆，眼淚係眼眶到打轉。
「就算你同細佬鬧交都唔可以咁講野架！」老豆好惡咁鬧我。
我絕望咁望住佢地，開始冷笑，講：「哈哈～我知道啦！我知道啦！～你地覺得我冇睇住細佬，害死左佢，所以用呢住方式黎懲罰我。係咪呀？係咪呀？」我嗌出黎。
佢地聽完之後一d憐憫既反應都冇，全部都用厭惡既眼神望住我。我見到咁就衝左入房，而我個晚冇食到飯。到左第二日，佢地一如既往咁當細佬仲在生，對我既態度亦冷淡左，但大家都冇再提到個晚既事。而我冇再跟住佢地既節奏去當細佬仲在生，食飯我唔再幫手裝飯，佢地講起細佬我都一定唔會搭嘴，但我亦都冇再嘗試挑戰佢地所營造既假象。我好靜好自閉咁係呢個家入面生存，靜到好似呢個屋企根本冇我，死個個其實係我，而唔係細佬。呢5年黎，我沈默，我亦都受盡煎熬，我每日每夜都係到諗，係我，係我害死左細佬。不得旨，仲攪到全家都變左精神病人。我唔知道點樣先可以將佢地拉返去現實世界，但至少我自己要活係現實先。自從個晚之後，屋企有任何人生日，我都會準備定活動唔留係屋企，免得又要同佢演戲，因為個過程真係令我覺得好心寒。呢4年我都記得細佬既生日，唯獨今年既今日，我因為太忙而唔記得左今日就係細佬既生忌。一收工，我因為好攰就即刻衝返屋企，而開門迎接我既卻係非常殘酷既現實。




一開門我見到屋企成個廳清空左，整左個祭壇咁既野。有兩張白色既長台，其中一張放左細佬既遺體，因為我認得佢d衫。我呆左咁望住表情透露住期待已久既呀媽問：「發生咩事？」
佢只係係到笑。
我忍唔住飲泣咁講：「5年啦！5年啦！你地點離譜，點痴線都好，我都唔理你地。但你地點可以咁多年都唔比細佬入土為安呀？佢會變成遊魂野鬼投唔到胎架！呢d就係你地想要既？」我一面喊一面鬧佢地。
而佢地聽完一d感覺都冇，呀媽笑住咁同我講：「今日唔同啦！佢將會重生。返黎我地既身邊。」
呀媽望向另一張空既白台繼續講：「但我需要犧牲小小野，唔多，只係小小。」

#有興趣歡迎讚黑柴Facebook
https://www.facebook.com/%E9%BB%91%E6%9F%B4-879053098899020/