第二日,因為剛剛係香港放完暑假翻黎仲有時差,清晨5點半就已經醒左。我坐係屋企個小小後院仔,開左一盞微弱嘅燈,飲著杯熱奶睇書。慢慢,漆黑嘅天空中開始變光。九月係香港可能已經好熱,不過係加拿大,早上同夜晚已經開始清涼。陽光成功開始照亮大地,但係我依然只係感覺到晚上嘅涼意,感受唔到應該由陽光帶黎嘅溫暖。li 種清晨獨有嘅涼意,每次都會係我自己一個人翻黎加拿大之後,帶俾我孤獨嘅感覺。過去幾個禮拜仲同Daddy Mammy同friend開開心心團聚,搭左一程15個鐘嘅飛機之後就只係得翻自己一個,面對著寂靜無人嘅四周。

其實要係li到讀書工作生活,都係自己嘅選擇。為嘅就係希望可以儲存多一D本錢,將來可以同自己在乎嘅人,可以過D好D嘅生活。只不過,每次以為完成一段路程,存夠本錢可以翻去嘅時候,先會發現其實只係剛剛開始另一段路,同個目標距離仲好遠。到底係個人變左,想要追求更難嘅目標,定係根本以前嘅目標就係太細小,達到後先發覺根本唔足夠?讀完個大學,就發現只有一個大學學位根本唔代表D咩。但係我繼續讀,讀到最後PhD,又會唔會有分別呢?可能,如果我大學讀嘅科唔係心理學,而係實際D嘅野,根本就冇野煩。只可惜我對個D所謂實際嘅科目都冇興趣or唔太叻,就唯有選擇繼續讀好我自己有能力做好同有興趣嘅科目。li一切,有部分係自己選擇,有部分係被大氣候逼的。人生,大概如此吧?

我之所以會諗埋曬li D野,係因為琴日同一D人嘅一番對話。

話說琴日聽完Admin講野,大家就分別去同自己嘅professor單獨見面。不過我同George嘅Professor咁岩有事冇番,所以就直接同D Senior Students傾傾計。
「歡迎你地啊!每次見到新學生,我都替你地興奮。我係今年第三年嘅學生啊。」Shawn,一個差不多三十歲嘅白人男仔,歡迎我同George。當然,佢用嘅係英文。佢讀Grad School 之前有做過其他野,所以分人比較成熟。之後發覺,原來有好多其他學生年紀都唔細。
「我係Carol啊。你地有咩問題就問我地啦!我地一齊讀書做研究,一定會互相幫忙架。剛剛開學習慣唔習慣啊?」Carol係另一個師姐話。
「OK 啦,我其實都好興奮。不過聽完Admin講,發現真係好多細微嘅野要學,以後慢慢就應該會習慣架啦。多謝你地咁歡迎我地啊。」我答。




跟著就都係咁,同其餘大概10個到嘅師兄師姐閒聊傾落去。直至到Shawn突然講左一番說話。

「你地要好好keep住依家你地個興奮啊。你會發覺,li 份熱情,遲D好難維持。」Shawn有小小嘆氣咁講。我同George聽到嘅時候,不其然互望左一眼。係加拿大,所有人都特別熱情。尤其係要歡迎一班新生嘅時候,大家都係講好說話多,例如“我真係恭喜你啊!”(係,自己配番李嘉X個tone。),“好高興你黎我地道讀書啊” etc。所以當佢冇啦啦講li D嘅時候,我不禁心諗,究竟佢想講咩呢?

有另一個師姐Amy見到,就即刻跳出來打完場。「我地大家咁支持,一定冇問題啦!」Amy講完後,向Shawn打左個眼色,然後就傾左去其它話題。其餘人都好識做,配合Amy講落去。Amy個眼色細到應該除左Shawn之外冇人睇到。不過我自小對人同人嘅相處比較敏感,所以我係睇到嘅。

之後我就翻翻自己Office*,係到執野。
「Jeremy!」原來係Shawn係門口叫我。
「Hey!你office都係附近?」一時之間我都唔知講咩好,就求其搵D 野問。
「係啊。頭先呢,嚇親你唔好意思。」




「咩事啊?」我更加唔知講咩。
「頭先我叫你地珍惜依家嘅熱情,唔係想嚇你地話以後會好辛苦架。只不過係最近有D 壓力大,有感而發姐。我相信你地唔會一定係咁嘅。」Shawn好真切咁講。講真,我雖然年紀細,但都唔會係毫無戒心。我頭先係有懷疑佢究竟係咪怕以後有競爭,想嚇嚇我地。不過諗深一層,所有Grad Students 嘅研究項目都唔同,先唔好講自己有自己嘅projects,加上我同Shawn 都唔同professor,佢又senior 我幾年,又有咩必要咁嚇我地呢?所以我諗佢講嘅應該係真心說話。
「唔會啦!我冇咁諗過啊。」
「咁就好。你知啦,讀Grad School 咁多年,真係要有恆心。因為D 工作回報至少等一年先有D 野睇。有時重要做完一大輪先發現個project 係唔work 嘅。就算成功畢業,都未必會搵到一份理想嘅工作。依家競爭大,D 大學有點會可以請曬所有博士生做professor ?分分鐘為左份工,要就間大學,去個唔知咩地方做野生活。其實最難受嘅係,你所做嘅研究,對li 個世界,究竟係咪真係有影響呢?」Shawn一口氣講左li 番肺腑之言。我就聽到面都青埋。大佬,我開始第一日咋,洗唔洗咁震撼啊?!
「唉呀,我又黎啦。你唔好太認真聽啊。我講我架咋。」Shawn見我聽到定曬神就話。
「哈哈!多謝你同我分享。其實我之前都聽過下。總之大家以後一齊努力啦。」我回答。之後吹多陣水,佢就翻翻自己office。

個日完左第一日嘅Orientation,我自己一個搭車翻屋企。心裡面諗番Shawn講過嘅野。其實,係未讀之前,就已經聽過一D 讀緊master 嘅人講過。大致上話讀Grad School 嘅幾年,如果冇恆心真係好難讀落去,只係我以前冇點聽入耳。再加上,我心底一直都好想好想讀完書,可以翻香港同在乎嘅人一齊,係一間大學做professor ,安安穩穩咁過生活。如果花5年時間,生活依然係唔穩定,咁我算唔算浪費時間呢?但係我依家翻去,生活一樣唔穩定。到時同在乎嘅人攬著一齊喊到冇用。我諗,li 個就係點解D 人去睇風水命理嘅原因。有人占卜預測你嘅決定會有咩後果,正正係迷茫中嘅人最想要嘅野。
以後係點,我唔知。我只係知道我嘅理想同目標,係要咁樣先有機會達成。至於到是有咩外在因素影響,我冇得控制。「你自己有個理想,就全力去做啦,Daddy Mammy 會支持你。」我諗番起li 句說話。為左自己同在乎我嘅人,我一定要努力,li 個道理我明白。只不過,現實嘅問題就好似一直暗藏係生命嘅黑洞,唔覺意就會見到佢想連同寂寞一齊想將我吞噬。





天降大任于斯人也,必先苦其心志。我冇咁偉大。只不過聽著謝安琪嘅山林道,聽到 “妄想這裡有天 會由樹變成路 一醒覺經已殺出 這條路“ 嘅時候,自然會諗起自己一直以黎孤身一人做緊嘅野,到最後又可以換到D 咩?




*我地學校grad student每人都有自己間房做野。通常我地嘅office都係附近。

 
已有 0 人追稿