海外研究生的日常生活: Sept 3, 2016
星期6又到了。我諗著剛剛開學，未正式開始忙，就去以前讀大學o個個城市探D 大學同學，同埋我係個邊唯一嘅親戚。我一開始係加拿大讀中學個幾年，都係同我親戚一家住。佢地未過加拿大之前，係香港算係由細睇到我大，所以感情好好。就算升左大學自己住之後，都會keep住聯絡食飯。我諗我都真係好好彩架啦，父母唔係身邊，自己係外地都仲有屋企人關心自己。當然，父母同其他屋企人嘅感覺始終唔同。不過人大左，就算父母係身邊，其實有事嘅時候都係要自己處理。身邊嘅人，就算再close，有時都只係可以陪伴，能夠分憂嘅，真係好少好少。Anyways，由我依家間學校去以前間大學要搭大概兩個鐘嘅車。D 車呢，其實就係一架旅遊巴，D 位係好窄嘅。不過多數搭li 架車嘅都係學生，有D 番自己屋企，有D 就好似我咁去玩，所以就算逼小小，大家都會體諒下。畢竟要出去o個個城市，就只有li 架巴士。正當我坐好，打開部laptop 想睇下D paper 做功課嘅時候，突然身邊有個人好大聲講野。 「做咩咁多人架？！好逼啊。」我不自覺鄒鄒眉，望下究竟係咩人講野咁大聲。佢係一個亞洲男人，睇落年紀應該比大學生大。佢著住恤衫加西褲，攞住個公文袋，我估唔係出去做野就係係度做完野番出去。 佢發現我望到佢，我就只好同佢微笑一下。😊。跟著繼續望番個laptop，自己做自己野。 佢好大力咁坐左係我隔離，然後話：「你係附近o個個AA城市搭li 架車黎架？」 「唔係啊，我係li 度上車。」我心諗大家一齊係總站等車架wor。 「哦，你係邊度黎架？」佢又問。其實我真係唔想同佢講野，只想做自己野。不過係加拿大，路人同路人搭嗲係好正常嘅事，變相同人傾計係一種禮貌。其實li 個文化我幾鍾意。人同人之間，唔洗好似有坐山咁嘅，講兩句又唔會俾人呃嘅。 「我以前係BB 城市住，依家出去囉。」 「唔係啊，你D 英文咁好，我想知where you are actually from?」佢又問。我當堂呆左呆。雖知道加拿大係一個多元文族嘅國家，有好多人都係移左民好耐，或者係移民嘅第二代，由出世開始係加拿大生活。所以就算唔係白人，好多人都會identify 自己係加拿大國藉，而大家都會尊重。所以無啦啦assume 一個唔係白人嘅人就唔係來自加拿大，再加上”where are you actually from?” li 佢經典racist 問題，其實係一件好冇禮貌嘅事。同埋，究竟一個人係邊度黎，關其他人咩事呢？ 「......Why?」我認唔住反問佢做咩咁八卦。 「點解咁問？哈！你知唔知我係邊個。我係一個好成功嘅人，以前係XX大學畢業。所以我想了解下依家D 後生囉。睇你個樣，一定係讀緊大學第二年啦！」佢又大大聲講野。我又心諗，咩料啊？先唔好講我以前都係XX 大學畢業，唔多覺又咩咁厲害。單憑佢以貌取人，純粹因為我個樣生得後生D 就覺得我好細個，我肯定佢唔會成功得去邊。再加上佢咁講野法，我諗我同佢冇可能溝通得到。 「哦，係啊係啊，OK。」我決定求其應左佢，就唔再理佢。 當我重新開始係laptop 睇paper 嘅時候，我feel 到佢大模斯樣咁望住我個screen，睇我睇緊咩。本來我真係唔想煩，不過咁樣真係感覺好似侵犯我私隱，好唔舒服。 「你可唔可以唔望我個screen ？」我認真咁同佢講。語氣堅定，但係抱持禮貌。 「下？！咁。。。你坐窗口位，我望出窗一定會望到你個screen 架wor。你唔可以take away我望出窗嘅權利wor！」佢理直氣壯咁回我。我心諗，what the fxuk?! 阿叔你都得架啦。 「我冇唔俾你望出窗，我係話唔好望我個screen。」我再一次強調。li 個時候，隔離位有D 人開始望望下。 佢聽到我咁講，好似老羞成怒，好激動咁講：「你知唔知我一個鐘搵緊幾多錢阿？係＄400啊（即港幣大概＄2400）！我洗八卦你？！」 到li 一刻我唯有覺得自己黑仔，佢想點就點啦，只要唔好傷害到我，我就算啦。就係咁，我就開始戴上耳機，繼續做自己野唔理佢。佢講到咁上下，發現我冇理佢，佢就終於停止左。我真係唔應曬佢囉！再過一陣，佢突然話：「啊唔好意思，我頭先意思係我搵跟＄400八個鐘，唔係一個鐘啊。」 「。。。。。。。。。。。。。。。。。。。。。」我依舊冇俾反應，不過真系無奈到好想笑。講真，who the fxck cares how much money you make?!香港有D friend同屋企人話，香港好多麻煩人。其實整個世界都係。類似以上嘅事情，我自己同其他係加拿大嘅friend都遇唔少。不過我覺得，一個社會，有好多唔同人。大家應該要互相尊重，個社會先會和諧。li 樣野加拿大做得好好。大多數加拿大人都會接納新移民，而新移民都會尊重別人同自己。我同阿叔都係ethnic minority，其實點解佢仲要做D minorities會介意，或者令人地覺得你冇禮貌嘅野呢？要人地尊重，包容，首先要做好自己。連自己基本禮貌都冇，試問人地又點會想了解你，從而去同你和平相處？