我每星期都會去摩星嶺同佢啪啪啪: 三

【上文提及】
喺摩星嶺山頭入面，我漸漸發覺Kenson同傻仔西好似冇左靈魂嘅驅殼咁淨係識得向前行，就算我點樣嗌佢地、追佢地，呢兩條友都係完全唔理我。最後，我仲同佢地兩個失散左，剩低自己一個喺呢個連一格訊號都收唔到嘅山頭入面。

【我每星期都會去摩星嶺同佢啪啪啪 - 三】
冷靜落嚟之後，我開始分析眼前面對緊嘅情況。繼續上山嘅話，我的確有可能搵得返Kenson同傻仔西，但係冒險上山搵返兩個似乎係撞左鬼嘅同伴對我黎講似乎冇太大嘅幫助，反而如路返轉頭睇落似係更安全、更合理嘅選擇。雖然係咁，但係要我喺咁嘅情況之下唔理自己好兄弟嘅安危，就咁自己一個走左去，我真係做唔出。望住前面嗰條樓梯，我用力吸左口氣--雖然已經睇唔清上山嘅路仲有幾長，但係我始終都下定決心，唔會放棄任何揾返Kenson同傻仔西嘅機會。

上山嘅路上一切都好順利，灰白色嘅濃霧亦有逐漸消散嘅跡象。喺山間濕漉漉嘅泥路上，我察覺到有兩組腳印--如果冇估錯嘅話，呢兩組腳印有可能就係Kenson同傻仔西留低嘅。跟住「佢地」嘅步伐大概又行左十幾分鐘，我見到一座樓高三層嘅老舊英式建築物--油漆剝落、鋼根外露……所有荒廢舊樓嘅特徵都有齊。如果冇估錯嘅話，呢度應該就係我地三個原本計劃要去嘅嗰座廢堡。

行左成個鐘山而家總算可以停低抖下，但係望住眼前呢座咁詭秘嘅建築物，我反而仲緊張。企左喺座廢堡面前好耐，我都係冇勇氣自己行入去--除左唔肯定Kenson同傻仔西喺咪入左去之外，更重要嘅係我根本完全唔知入面嘅情況（其實我最駑都係俾鬼嚇）。身為全職廢青嘅我，喺呢啲咁關鍵嘅時刻，梗係唔理咁多拎部埃瘋出嚟㩒下先算。



出乎意料地，部電話竟然收到訊號，仲有返data。我即刻What$app Kenson同傻仔西，睇下可唔可以揾得返佢地。

[10:05pm] 文：你地喺邊？
[10:05pm] 文：收唔收到？
[10:06pm] 文：我而家喺嗰座廢堡出面……

我眼定定咁望住個mon，從未試過好似而家咁期待俾人藍tick，期待下一刻佢地會讀到我嘅msg，期待下一秒會出現「……輸入中……」呢幾隻字。時間一分一秒咁過去，而我send嘅msg依然維持喺兩個灰剔嘅狀態，隔左幾分鐘始終都未收到佢地嘅回覆。

我一直都好心急咁望住個mon，唔知幾時開始覺得周圍越黎越光，亦越黎越熱，熱到就好似俾幾十個太陽圍住咁。我抬起頭一望，心諗：今次仆街啦--十年難得一遇嘅山火竟然咁都俾我撞到！喺呢個時候，我已經冇時間再理佢兩個覆唔覆what$app,當務之急就係要揾下仲有冇出路。我下意識望返上山條樓梯--嗰邊啲火勁到好似老母嚟m時咁，再行過去實死無全屍。咁我唯有再望下仲有冇其它小路，但係火勢蔓延得好快，我根本就已經被撤撤底底咁包圍，無路可退。



睇住場火越燒越旺，我就淨係可以企喺度，乜都做唔到。原本諗住上黎揾返Kenson同傻仔西，可以三個人一齊離開呢度，點知而家竟然自身難保，我覺得自己就嚟崩潰--唔通，我真係會就咁死喺呢度？