【上文提及】
睇住Kenson同傻仔西嘅情況好似俾Alex講中曬咁,我決定禮拜一返學之前上摩星嶺睇下。喺伸手不見五指嘅情況下,我再一次(現實上可能只係第一次)遇到之前嘅情況。

【我每星期都會去摩星嶺同佢啪啪啪 - 十四】
……前面依然係無窮無盡嘅山路,而手機app個箭咀就依然顯示我喺山路嘅盡頭冇郁過,我再㩒多幾下,成部機自己熄埋。行到呢步,我都唔理得咁多,亦都冇理由而家先返轉頭。我收返埋部垃圾機繼續向前行,唔知點解,我總係有一種好熟悉嘅感覺--每一下呼吸,我都好清楚咁感受到有一陣微薄而且寒冷嘅空氣貫穿全身,一次又一次喚醒內心嘅驚恐--咁嘅情況,我肯定,曾經試過。

繼續行左好耐,我應該終於到左山路嘅盡頭。我見到前面一大片嘅草地,仲有……喺草地隔離,有一座殘到老母都唔認得嘅廢堡--呢個場景,同我之前見到嘅一模一樣。我再一次企喺廢堡出面,不過今次冇再猶疑,反正而家又唔係夜晚,就算真係有鬼都係佢驚先。我用力吸左啖氣,然後先慢慢咁踏左半隻腳入呢個鬼門關(可能係)……就算係朝早,廢堡入面都係勁黑,完全依靠出面嘅光先勉強睇到入面。行左入廢堡,我先首先周圍望下,同我預期一樣,所有野都同我記憶入面嘅嗰座廢堡一樣--唔止又暗又殘,而且冇門冇窗,就連樓梯嘅位置都一樣。

突然間,周圉黑曬一啲光都冇。
「妖,咩料呀仆街?」我心諗:唔係好似啲老土鬼片咁on9入左鬼屋之後就「呯」一聲鎖門呀?(其實就完全冇可能喺咁因為成座廢堡都冇門)我望返轉頭,根本就黑到連原本個出入口都唔見左。我今次真係有啲淆底,驚會成個出口唔見左走唔到,於是快手拎返部機出嚟㩒開個電筒影下。好彩嘅係個出口仲喺度,而且仲見到出面好遠好遠嗰堆山群嘅黑影,情況就好似印度中深夜嘅廢堡咁。我行過去門口嗰邊,想睇清楚出面嘅情況--究竟成件事係咪真係我諗得咁白痴,明明上一秒都仲係朝早,下一秒就突然間變左夜晚。諗返起之前喺樓梯上二樓嘅經歷,我行到出口前面就停低左,冇直接行出去。用個電筒照住出面就咁望出去,出面嘅情況同夜晚一模一樣,唔怪得小小光都照唔到入廢堡。我諗住慢慢踏隻腳出廢堡,果然,就好似上二樓嗰次咁……


「妖,俾小小新意啦唔該!又係睇唔到嘅牆……」雖然知道自己走唔到,不過我都已經冇乜所謂,反正我嚟嘅目的就係想知呢幾日嘅事究竟同呢個地方有冇關係,但係而家黑到乜都睇唔到要完全依靠電筒嘅感覺真係唔太良好。

遇到地下出口封左嘅情況,我第一時間諗起嘅當然係廢堡二樓……而家假設地下出口同二樓暫時各有一幅「隱型牆」,咁即係我嘅活動範就係得地下同一樓。於是我決定由一樓上面嘅樓梯開始掃返落地下,逐個角落睇下有冇啲咩奇怪嘅地方。我一路照住地下慢慢上樓梯,由地下…………上到一樓…………再繼續行上去。就喺我好專心望住樓梯間有冇任何異樣嘅同時,我唔經唔覺上埋最後一級嘅樓梯。見到前面已經冇梯級,我先用電筒影下附近--我而家……上左二樓?

我一路數住自己上到邊層,而且前面仲有幾間房,所以我肯定--呢度一定係廢堡嘅二樓。雖然冇諗過上到嚟,但係既然都入左二樓,我梗係第一時間去嗰幾間房入面睇下,話曬入面都發生過疑似啪啪啪或者SM之類嘅嘢。

我入左最近樓梯嗰間房,用手機個電筒四圍照下。奇怪嘅係,呢度嘅佈置好似辦公室--書枱、櫈、一堆folder……四面嘅牆就貼滿左好多剪報--「天台「遺」攝15歲女墮亡」、「再有學生自殺亡 半年第19宗」、「3年52學童自殺亡團體請願促政府正視問題」......
突然間,我電話個電筒熄左。我乜都睇唔到,淨係聽到有把聲喺度講野……
「終於嚟啦……等左你好耐啦!」
已有 0 人追稿