【上文提及】
行左好耐,我終於見到座廢堡,入左去之後,靠出面嘅日光我仲可以見到入面嘅情況。但係過左冇幾耐,周圍突然間黑曬,出面好似變左夜晚咁。我開住電筒撞下撞下咁竟然上左廢堡二樓,仲入左一間類似辦公室,牆上面仲貼曬剪報。突然間,手機個電筒熄左,仲有把聲同我講野……

【我每星期都會去摩星嶺同佢啪啪啪 - 十五】
「終於嚟啦……等左你好耐啦!」
我下意識四圍望下,當然係會好on9咁發現根本就係黑到乜都睇唔到。
「你……你係邊個?」
我一路講,就一路慢慢逐步退後,企圖貼住後面幅牆(安全感會大啲)。退左幾步之後,我就停低左唔敢再行,因為我feel到,我嘅左後方好似有啲嘢喺度郁緊……
「唔好意思,我唔係想嚇你,不過你部電話嘅光實在太勁,我要用好多energy先抵抗到……」
呢把聲又一次出現,而且我好肯定,佢就企左喺我後面(偏左)嘅位置。



呼~
呼~~
就算佢一路喺我耳邊講野,但係呢一刻我聽到嘅,就只有自己嘅氣喘聲。喺呢個絕對漆黑嘅環境入面,部電話又點㩒都唔著,又冇帶電筒或者其它會發光嘅野。就算我冇俾人用槍篤住我個死人頭唔俾我郁,我都睇唔到出路,真係完全唔知點應對。

我好慢好慢咁伸隻左手入褲袋,企圖將預先擺入去諗住以防萬一嘅刀拎出嚟。
卡套……
八達通……
紙巾……
妖,咁把cutter死L左去邊呀?


「你喺個褲袋度摷啲咩呀?」
聽到後面嗰條友突然間咁講,我俾佢嚇左一嚇,即刻伸返隻手出嚟。
噼啪~我feel到,有啲嘢由褲袋度跌左落地下。我都仲未俾到任何反應,後面嗰條友就出左聲……
「你……竟然……我仲以為你會嚟揾我即係代表你信我,睇黎我都係諗多左。」
佢講完之後,間房慢慢變光返小小。睇到周圍嘅環境之後,我即刻走左去房嘅另一邊,諗住有咩事嘅話可以即刻走。但係我再望返嗰條友,佢好熟口面

--係Alex……
而佢前面--即係我原本企緊嘅位置,就有把cutter喺地下。

文:「係你--Alex?!」


佢點左下頭。
文:「我……我唔知邊個企左喺我後面,而且啱啱間房又黑到乜都睇唔到……」
Alex:「一句講曬,你信唔信我?」
我都未講完,佢就突然間咁問,我都唔知點答佢……
文:「而家唔係我信唔信你嘅問題呀,而係……成件事嚟得太突然太唔make sense啦!我真係好懷疑自己係咪發緊夢……」
Alex聽完我咁講就執起把刀,向住我行過嚟……
文:「喂……」
文:「你想點呀?」
Alex冇理我,繼續行埋嚟……
文:「你又話自己係咩靈界嘅警察,咁你而家拎住把cutter對住我算點呀?」
文:「喂!你再行……」
Alex:「唔好郁!」
佢突然間好大聲咁喝住我,我俾佢嚇到成個人窒左唔識郁,而正正喺我仲未反應過嚟嘅時候,Alex用把cutter一劃就左落我手臂度。
文:「妖!你做乜L野呀?」
雖然個傷口唔係好深,但係隻手都喺度流緊血。


Alex:「痛呀!證明你唔係發夢呀白痴!」
佢講完之後,雙手舉高把刀,一野向住自己心臟嘅位置插落去……
已有 0 人追稿