7.

「好好食呀...」

misa食住pizza,幸福地叫道


「你都幾識食喎...特登揀酒店buffef」我嘆氣道

「咁我地搵到錢嘛!緊係要食好d啦」misa繼續品嘗眼前美食:「何況,我..細個冇食過呢d野架,依家當然要食返夠本啦」






「你細個好窮既咩?」

講到呢度,misa望左我一眼


「你好想知咩?嘻」

「屌,無聊問下姐,邊得閒理你呀!」我繼續食野:「不過...唔聽見你講你屋企人既?」






「佢地走哂啦..」

misa接住再講:「中七年我老豆爛賭,輸到著埋草..剩低一大筆貴利比我同媽咪」

「哦...唔怪知得你冇讀大學啦」

眼濕濕既misa點頭:「我果陣一日返兩份工,好唔容易先還得清d債,但係...媽咪最後因為辛苦得濟...走左..」






「咁又幾慘既..唔怪之得你咁重視錢啦」我遞上紙巾:「咪住先,你唔係呃我架嘛?」

「邊個得閒呃你呀!真架!」misa怒視住我:「你試過差d比人捉去做雞未丫?我就試過啦」

咁聽落...misa都係好無辜


「總之..依家我地識偷野,咁就唔駛擔心錢方面既問題啦..」我道:「不過..我總無可能一直用放假呢個藉口掛」

「咁好易姐,我地每朝早照出去,夜晚先返黎咪得囉」

「唉..你唔明架啦,日日坐m記好辛苦架」我明,日日坐響度同班阿伯鬥坐,真係會痴撚線






「咁..最多我陪你周圍行啦,反正...你冇左我,都搵唔到錢架啦,呵呵」

「痴線,今日如果比我落多次手,一定得囉!」

misa:「不過我都估唔到你可以狠心落手喎」



唔通..我真係好似王生咁講,我已經可以毫無良心咁落手,盜走人地既財物?




砰!





「唔..唔好意思..」

「唔緊要」

響朝早既列車上,只要輕輕既一個碰撞,我就可以將身旁呢個西裝友既後褲袋既銀包取走


呢一個禮拜,我同misa不斷從實戰中學習

發現朝早既地鐵係最好既落手地點,一來車廂多人,二來朝早起身所有上班族都冇乜精神,根本冇人會留意到我地兩個

而我落手既時刻就多數揀落車前既三十秒,咁樣就可以容易走佬


當我越偷越多既時候,我直頭已經無哂內疚既感覺







「三千蚊..都唔錯丫」響油麻地站既月台上我用戴住手套既手將岩岩到手既銀包掉走

根據果本盜賊手冊,可以既話盡量只偷現金,唔好偷證件

當然,我自己都覺得要重新申請過d乜卡物卡好撚煩,呢個係我既最後底線


「呵呵,依家每日都賺成幾千,一個月做幾日都幾皮野lu」響我旁邊既misa道

「省d洗都ok既..咪住先,d錢點分先!」

misa笑笑口:「你d錢即係我d錢,我d錢即係我d錢啦!」





「你都痴撚線,比哂你好唔好呀?」我合起雙眼:「好攰呀,訓陣先..」


「係喎,尋晚我同伯母講左,我以後都會響你屋企住架啦,呵呵」

唔撚係下話..

「屌你,你依家咁有錢仲要住我果度?!!」


misa得意洋洋道:「日日返到去都有屋企飯食,又有得同小藍玩,不知幾好!我緊係唔搬啦..」

「唉...」



「你阿媽搵你!你阿爸搵你!你老婆搵你!...」


misa一臉厭惡:「好心你轉鈴聲啦,老土到死!」

「你識乜丫..」


「喂...」

「阿德,我係王生丫...」

王生...成個禮拜終於打黎


「做咩呀?」

「黎緊有新生意啦」王生吞吞口水:「你同misa依家上黎office啦,佢應該響你隔黎既,嘿嘿」

「..哦」

屌,依家連佢都知...


「點呀點呀,王生講d咩呀?!」misa拍拍我

「佢話,叫我地上去佢office度,話有新生意喎..」

「生意?」misa問:「唔係打劫銀行果d下話...」

「屌,去到咪知囉,你問我把撚咩..」



「咔!」

「黎左啦,哈哈,都估到你地兩個係一齊架啦..」王生既笑容都幾仆街


但響王生隔黎仲有一個人

一個瘦削既西裝中坑,大概同王生差唔多年紀


「阿偉,呢兩個就係你新收返黎既徒弟啦?OK咁喎」中坑先出聲

「緊係啦..我睇人好準架」王生再講:「同你地介紹先,呢個契弟叫林日發,係我d老死黎」

「契你老母咩!」中坑遞上一張卡片:「你地叫我發叔得架啦哈哈,我係隸屬國際情報機構International Intelligence Department,簡稱IID香港分部」


卡片上寫住「林日發 行動司司長」


「丫,你條友仔,又升左職既..」王生皺眉道

「哈哈每集升少少咁啦..」

International Intelligence Department..未聽過


「之所以黎搵你地,係因為想委托你地兩個去搶一樣野」

我問:「咩野呀?」


「一筆被稱為『聖人遺產』既一百億美金基金」

一講呢句,我地幾個人都定哂格


一..一百億...!?

發叔再講:「呢一筆基金係二十八年前,由十個來自美國同歐洲富豪成立既,目的係解決往後出現既世界性災難及危機」

「但呢十個富豪死左之後,依家就冇人知道筆基金既去向....經過我地IID既追查,黎緊既星期日,響西班牙既一個拍賣會中,將會拍賣岩岩過身既其中一個富豪:艾比度拿華斯既收藏品:比斯利的紅心,相信會有線索...」

「同時,一間表面上係私人保安公司,實質係做非法勾當既國際級公司迪拉斯,亦派人調查呢一百億美金」

「所以我就想派你地,去西班牙,儘快搶走呢一百億,以免落入不法份子既手上」


「真係?王生,呢個發叔係咪真係信得過架?」我問

「嗯,佢係我中學同學,點都唔會呃我地」王生道



「哈哈..緊係啦,睇住你咁多年係咁偷野我都冇舉報,緊係信得過啦」發叔再講:「仲有呀,你地兩個後生仔果日執解款車錢,我都用天眼系統見到架,咁樣都冇報串比差佬,就證明我信得過啦!」

咁講既話,佢又的確唔似呃我地既,只係我唔明點解國際情報機構既人都可以有卡片,唔會太危險咩


「不過...今次我唔會出手」王生道:「我呢d退休人士,去到只會阻手阻腳架咋,哈哈」

「但係我地兩個冇經驗架喎..」

發叔道:「放心,去到當地我會有個朋友幫你地,佢係西班牙IID分部既成員..」


「咁..我地都唔係義工黎架喎」misa醒目問:「事成之後我地分到幾多錢先?」

「唔洗擔心,到時兩位都可以收到一億港幣作報酬既」發叔笑道


「嘩,一億...要偷幾多個荷包先得呀...」misa叫嘆

「你地唔駛咁心急答我,不過最緊要快啦」發叔講

「機票就響度,後日9點半,你地如果想去既話,就打電話比我啦,我電話係21800000....」
已有 0 人追稿