係福伯嘅喪禮上面,我見到果位做殯儀嘅小段,佢今日無再好似果日烚熟狗頭咁笑,佢表情嚴肅得嚟帶住點欣慰。

我行到佢旁邊坐低,而佢都會意到我坐左係佢身邊,佢望一望我點一點頭,而我都回應佢點一點頭後話:「福伯嘅喪禮,係你安排架?」

「係啊,不過真係估唔到,果日先同佢講完份計劃,第二日人就走左。」小段將本身望住福伯張相嘅目光移到我身上後,問我:「你會唔會覺得,係我當面提福伯要計劃身後事,所以福伯先會無啦啦走左啊?」

我聽到佢咁問,真係好出奇,「點會呢,呢D整定架嘛,有邊個會知。」

小段微笑左一下後話:「你咁深明大意就好,有D老人家唔鍾意提呢D架,佢地話唔講呢D就無事,一講呢D就好快應驗。」





我望住呢一刻嘅小段,佢仍然用一個好欣慰嘅眼神望住現場嘅一事一物。

「咁你做呢行未成日比人鬧?」我問,而小段又微笑左一下同我講:「有邊行做野唔會比人鬧架,做野就係咁架啦。」

估唔到呢個後生仔又幾成熟架WO。

「係呢,你有無睇我比你嘅計劃書啊?」小段問我,而我就答佢:「有睇,但我而家有D驚。」

「驚咩?」小段不解咁問我。





「驚我就快去。」我講笑咁講,而佢都回應我呢個冷笑話笑左一下,就當,係呢個喪禮入面嘅黑色幽默。

我地兩個坐埋一齊係度折元寶,而折折下小段就話:「伯伯,你知唔知點解要將D金銀紙折成元寶?」

「因為易燒D?」我亂答。

「都算係嘅,不過最主要係因為折元寶果一刻,會將你對往生嘅人嘅思念都傳入個元寶到,咁往生左嘅人用果陣,都會知道你地嘅心意。」我地將一個又一個元寶放人一個白色嘅紙袋入面,而呢一刻,係我正前方坐左一個女仔,果個女仔目無表情咁發呆望住前面,而手就不停折緊元寶,我就問小段:「咁如果好似果個女仔咁款折,應該唔會有思念傳到入元寶入面。」

小段聽到我嘅說話後,就望一望我所講嘅女仔,「又係佢?」然後,佢就企左起身話:「伯伯,我行開一陣。」





「唔好叫我伯伯,我叫輝爺。」我向佢介紹自己。

「你好,輝爺,我行開一陣先,你自便。」佢答我。
已有 0 人追稿