同一個咁嘅後生坐埋一齊,食野都背脊骨落,小段都食得好尷尬。

食完野,同傾嘅時候,珍妮又真係坐開左,我見到咁終於鬆一口氣,細細聲講左一句:「為小女子與小人難養也。」小段都聽到我呢句,佢好同意咁點一點頭。

「呢個女仔其實做d咩架?點解可以咁得閒嘅?」我問小段。

「佢好似係果d幫人搵工嘅人,所以如果無客嘅時間,真係可以好得閒。」小段答。

接落去小段就詳細同我講解我所選擇嘅計劃,而我都好細心咁聽,話晒都係我係世間上最後一個大日子,雖然我唔會知道最後搞成點。





我地就咁傾左個半鐘,而珍妮就係附近坐左個半鐘,到我同小段傾完果陣,佢就坐返埋嚟。

「你地傾完拿?」珍妮問。

我同小段都點一點頭。

「咁阿伯你幾時出殯啊?」呢個問題同頭先佢問果個問題一樣咁摟屌!!!

「我講多次我只係想一早計劃好,我唔係就快死。」不過如果日日對住珍妮,應該好快會死。





珍妮聽到後,就點一點頭,「原來係咁啊……」

「係拿,我聽講妳係幫人搵工作,可唔可以幫我一個忙?」我問珍妮。

「阿伯,你都咁老好難搵到份工比你架wo。」呢個珍妮講野真係好直接。

「唔係我想搵,係我想幫個仔搵。」我答佢。

如果大家仲記得嘅話,我之前都講過我其實有個女同有個仔,個女就有家室唔駛我點理,但係至於個仔,三十歲幾人都渾渾噩噩做人,剩係返d散工點過得世,所以一直想幫佢搵份長工。





雖然我對眼前呢一位珍妮無咩好感,不過見佢係幫人搵工作嘅話,多個人搵都多一個機會。
已有 0 人追稿