埋左單,同蔡老闆係街上面行,好多人都用不善嘅眼光望住蔡老闆同我,應該係話,好多人有白鴿眼望住蔡老闆。

而蔡老闆都感覺到其他人嘅目光,行到畏首畏尾,仲同我講:「不如你同我隔開d行,唔係d人都白鴿眼埋你啊。」

聽到蔡老闆咁講,心中一陣酸,因為令我諗起另一件事……

想當年……

「阿輝,做咩行路無嚟神氣啊。」果陣嘅蔡路闆,真係好有大將之風。





「……一陣我第一次同你去見客,我真係唔知講咩好啊。」我話。

「每個人都有第一次,唔駛驚,有我係度照住你。」蔡老闆話。

「……不過,我總係覺得我著西裝就好似著起龍袍唔似太子咁,同埋……我覺得有好多人笑緊我啊。」我無咩自信咁話。

「點會啊,企直d睇過。」蔡老闆拍一拍我個背隻,然後我成個人企到直一直,佢上下打量左我一下後,同我講:「無問題啊,係你自己多心姐。」

「唔係啊,我真係覺得四圍嘅人個心都笑緊我,你睇下佢地嘅白鴿眼。」我話。





而蔡老闆就好認真咁望住我講:「記住,可以睇唔起你嘅人只有你自己,如果你覺得其他人都笑緊你,白鴿眼緊你嘅時候,姐係你自己都笑緊自己,同我拎d自信出嚟,平時嘅阿輝唔會好似而家咁架,仲有,我地兩兄弟一直拼駁,如果你無自信,我又點會有自信,知唔知啊。」

我好記得蔡老闆果陣嘅呢一番話,不過而家,佢竟然怕佢自己嘅身世,令到四圍嘅人白鴿眼我。

「蔡老闆!」我拍一拍佢嘅背隻,然後話:「你無自信我又點會有自信啊。」

蔡老闆一比我咁樣一拍,一開始有少少呆左,不過佢慢慢記返起我所講過嘅呢句話後,笑左一下,「……係。」睇得出佢眼角有少少淚光,「自信。」

佢企直左個人,深呼吸左一口氣,「我地去搵阿然。」





然後,我同佢並肩而行,無再留意身邊嘅人點睇我地。
已有 0 人追稿