[年齡無界限] 就係咁，我最近出席好多喪禮: ３２　典型例子

望住阿然比我睇嘅資料，唔知點解，個頭慢慢開始發麻，每一張嘅債務數目，都係向上升，諗起果陣，公司嘅債務已經好多，但係，都唔及蔡老闆本身家庭嘅債務。

而呢Ｄ債務，好多都係因為投資失利，但係所有野蔡老闆都只係做擔保人，「……你頭先話呢Ｄ係蔡老闆家庭嘅債務，我想問，係來自邊個。」

阿然只係嘆左一口氣話：「係佢老婆。」

「……咁……咁而家佢老婆去左邊？」我問。

而阿然又嘆多一口氣，「夫妻本是同林鳥，大難臨頭舌各自飛。」簡單嘅一對詩，就講出左點解撞見左蔡老闆後，佢都無提起佢老婆。





「但係，果陣佢同老婆好恩愛……」呢一句講出嚟都覺得唏噓。

「無野架，蔡老闆嘅老婆擺到明就係有錢就恩愛，無錢就好行夾唔送。」阿然開始有少少火咁話：「我撞返蔡老闆之後，都有問過佢老婆係邊，但果陣佢只係話佢老婆唔見左，本來諗住瞞住佢搵人幫手搵佢老婆，但係估唔到搵下搵下，就搵左咁多野出嚟。」＼

「咁搵唔搵到佢老婆？」我問。

「搵到又點，佢果陣已經嫁左比個有錢佬，我去搵佢，佢見都唔見。」阿然話。

聽到呢度，我都嘆氣。





但無諗過，接落嚟聽嘅野，更加令人覺得唏噓，阿然再拎左一份公民袋出嚟，「今次又咩嚟？」

阿然無講野，只係叫我拆開睇，「保險？」公民袋入面係一份保單，上面寫住供款人係蔡老闆，「做咩無啦啦比蔡老闆份保單我睇？而你又可以拎到呢份野嘅？」

「我個仔佢做保險，果陣佢剛剛出嚟做嘅時候，蔡老闆話要幫下Ｄ世侄，所以就幫我個仔買左一份，亦都係你而家睇緊果一份。」阿然話。

「蔡老闆佢一個月都唔知搵到幾多，仲要供份保險？」我問。

「我果陣聽到蔡老闆咁講，都係咁話佢，但係佢好堅持要買呢一份保險，所以我最後都叫阿仔幫佢選擇一份最全面又最易供嘅一份。」阿然講完後，我再望一望份保單，係呢個時候阿然同我講：「你留意下受益人果一欄寫左邊個。」





我聽到佢咁講後，就望住受益欄上面兩個人名，「佢老婆！？」一個係佢老婆，阿然聽到我咁講後就點一點頭，而另一個人名，我未見過，「係蔡老闆個仔。」

蔡老闆個仔！？我從新望再果個名好幾次，「點解佢個仔唔係姓蔡？」我問。

而阿然只係嘆氣話：「佢老婆帶埋個仔跟佬走。」

蔡老闆，典型嘅財散家破嘅例子，電視就成日睇，但估唔到原來係我身邊，都會發生Ｄ同樣嘅野。