[年齡無界限] 就係咁，我最近出席好多喪禮: ３４　理所當然

離開左阿然嘅夜冷店，心情有一種沉重，可能係因為發生係蔡老闆身上嘅事，家人呢兩個字，對一個老年人嚟講真係好重要，唔好話要兒孫滿堂，有時只係想返到屋企，見到有人係入面，無論果Ｄ人做緊Ｄ咩都好，關唔關你事都好，都想一入門口，見到家人。

因為當你知道屋企有家人等緊你，係遠遠比一個空無一人嘅家帶比你嘅嘅歸屬感更加大。

就算，果Ｄ家人唔緊張你都好。

就算，果Ｄ家人對你差都好。

起馬，一個間屋入面要有人先係一個家，如果一個人都無，點都係一個拎嚟炒到貴晒嘅單位。





講起家人，諗返起今日晏就珍妮比左Ｄ工作資料我，而我都影左ＳＤ比個仔，睇下佢有無覆我先，打開左個ＷＨＡＴＳＡＰＰ……兩個藍剔，已讀不回……

一種莫名嘅空虛感擁左上嚟。

有時上網，成日見到Ｄ後生出ＰＯＳＴ話自己嘅女神或者男神睇完自己嘅ＭＳＧ已讀不回，果一種煎熬，內心嘅空虛，其實，有無諗過當自己嘅父母ＳＤ　ＭＳＧ比你地果陣，都有會呢一種心情。

係因為已讀不回嘅人覺得理所當然，但係，愛情路上如果知道對方對你無興趣，直到有一日你都會放棄，但係為人父母，有點忍心放棄自己嘅仔女。

雖然我成日口口聲聲話自己個仔一無是處，但點都好，佢始終係我自己個仔。





可能，蔡老闆都係因為呢個諗法，所以就算自己幾辛苦都好，都好努力咁供果一份保險。

但係作為佢嘅朋友，佢咁多年兄弟，我真係睇唔過眼，蔡老闆嘅努力，其實係可以為自己帶嚟更好嘅生活，點解佢要為一個對自己無結果嘅目的去浪費自己嘅時間？

而且，時間對我地老人家嚟講係有限嘅野，勞力更甚，到左我地呢個年紀嘅老人家仲要出嚟做野，只有一個目的，就係想好好安排自己嘅死，駛我地人生最後一筆錢。

蔡老闆，點解你要咁樣做，點解你要將呢一筆為左自己嘅錢放棄，而轉交比一個早已經離你而去嘅人？

我訓係床上面，諗左成晚都諗唔通，直到入睡，我滿腦子都係充滿問號。