蔡老闆無咩親人朋友,所以黎嘅人都只係得小貓三四隻……可以話基本上係無,我地幾個坐係靈堂入面,折緊金元寶。

「有客到,請留步。」聽到呢一句話後,我地望向門口,見到嘅係細路祥,因為佢今日要返公司整蔡老闆保險嘅野,所以朝早無同我地一整黎。

鞠過躬,上過香,細路祥坐左過阿然旁邊,「搞好拿?」阿然問,而細路祥就點一點頭,「等過左喪禮先再同佢地講啦。」阿然又話,而細路祥都係點一點頭。

小段就係呢個時候行左過黎同細路祥自我介紹,當然珍妮都係一樣。

不過呢D唔係我最在意,我最在意嘅,係旁邊果D唔知應該叫喃嘸佬定係師父嘅人,佢地不停口嗡嗡,講一D有時聽得明,有時又聽唔明嘅野。





知佢地係念緊經,但唔知佢係念緊咩野經,可以話佢地專業,但聽佢地又講得好HEA。

直到呢班人擺左個陣,有幾塊瓦片,一個火盆,阿然見到咁嘅陣像,就望向我問:「係未開始拿?」

我只係用一個唔知嘅眼神望住佢,然後問小段,「破地獄?」

小段點一點頭,而我又問佢:「點解上次我去福伯嘅喪禮唔駛,但係蔡老闆又有要嘅,係未你地唔同嘅計劃有唔同儀式架?」

小段聽到我嘅問題後,搖一搖頭同我講:「唔關計劃嘅事,而係死於非命嘅人,行道教儀式嘅都會有破地獄儀式。」





「死於非命?」我問。

「相傳死於非命,不得善終者,怕佢地死後係地獄下面搵到路,就要破地獄幫佢地帶路,等佢地可以盡早再入輪迴投胎,所以上次福伯嘅喪體係笑喪,唔駛破地獄,但蔡伯伯佢死於意外,所以就要做。」小段解釋得頭頭是道。

「估唔到你呢位後生仔都識幾多野WO。」阿然話。

「咁我地做得呢一行,唔多唔少都要知呢D野。」小段講完後,我地所有人都繼續睇住D師父不停係到走黎走去。

講真,雖然破地獄好多人都覺得係喪禮終嘅餘慶節目,但係當喪禮嘅主角係你至親嘅人果陣,可能,你唔會有呢一種想法。





因為,我睇得出蔡老闆前妻前佢個仔都好專心咁化寶,聽住D師父嘅講法做,就算望住其他人都話會睇到差D拍手掌嘅破地獄,佢地臉上面都只係掛住悲痛嘅思念。

火光熊熊,但係淚影蹤蹤。
已有 0 人追稿