[年齡無界限] 就係咁，我最近出席好多喪禮: ４８　你唔會明㗎

如果唔係親身處理過身後事，我真係唔知喪禮通常會開兩日，第一日係晏就到夜晚，等Ｄ人可以黎鞠個躬，而另一日係朝早，係等Ｄ第一晚黎唔到嘅人，都可以第二日黎，然後就蓋棺上山。

就快完第一晚，本身頭先行開左嘅珍妮，剛剛又再出現。

「以為妳走左添。」我行到佢身邊坐低話。

而佢一副好平常嘅語氣同我講：「無走啊，我頭先係去晒呢度嘅喪禮姐。」

……係ＷＯ，都唔記得呢個珍妮係有一個咁怪嘅興趣。





佢將手上面拎住嘅所有吉儀放左入袋，講真，我真係未見過一個人可以拎住咁多吉儀，而佢係呢個時候嘆一嘆氣。

「咩事啊？」我問佢。

「人真係好化學。」佢突然慨嘆起黎。

「係啊，人真係好化學。」我認同地從複左佢嘅說話。

「點解呢？點解人要堅強嘅？」佢突然咁問，我都唔知點答佢。





「雖然我唔識蔡老闆，但如果一個咁老嘅人都想搵一份野做嘅話，我覺得，佢係一個會為生命好堅強咁生活下去嘅人，真係唔明佢點解要死。」珍妮，而家嘅眼係放空。

「咁蔡老闆嘅死係因為……」「……我究竟幾時會死？」我句話都未講完，珍妮已經彈左呢一句出黎，聽到佢咁講真係嚇左一跳，「妳仲咁後生，做咩無啦啦講呢Ｄ野啊。」

「輝爺，你唔會明㗎。」佢講完呢一句後，就完全靜默。

「妳唔講，我又點會明。」就算我講左呢句後，佢都無諗過話我知。

直到，小段行埋黎，「輝爺，今晚嘅儀式著唔多完成，你可以先收拾下Ｄ野，一陣就可以返去休息。」





「好。」我答左後望一望仍然放空嘅珍妮，然後再望一望小段，「你陪下佢，唔知佢發生咩野事。」

當我起身行左幾步後，我聽到身後嘅小段問佢：「今次都係搵唔到？」

我聽到佢咁問後，轉過頭望住佢地，只見到珍妮搖一搖頭，手上面拎住左一個好爛嘅公仔。