[年齡無界限] 就係咁，我最近出席好多喪禮: ５１　多謝你，蔡老闆

走左一位好兄弟，我同阿然只係不停慨嘆人生嘅無常，結束左喪禮後，食埋解穢酒，阿然就叫細路祥送蔡老闆前妻同佢個仔返酒店休息下。

而我地兩個，就返左阿然嘅夜冷店度，日光日白，夜冷店未開門，而我地兩個就係裡面，係酒櫃上面拎左蔡老闆支存酒出黎。

呢支酒，係一支白酒，一支中國煮食用嘅白酒。

我地兩個都默不作聲，阿然拎左三個酒杯出黎，各自倒左半杯後，就拎起其中一個杯，「蔡老闆，敬你嘅。」佢無理係夜冷店嘅地板，將杯酒奠落地。

然後，再拎起佢面前果杯酒，向我面前果杯酒輕輕碰左一下。





我地兩個都飲左一啖酒，「就咁樣，三兄弟得返兩個。」阿然黯然咁講。

而我，只係點一點頭。

過左一陣，阿然又話：「果個小段，都安排得幾好，連解穢酒都安排晒，一條龍服務。」

「係架……」其實我而家嘅對答，大部分都無思考過就講左出黎，唔係因為接受唔到蔡老闆嘅死，而係因為我無諗過，係短時間內我身邊有兩個人走左。

第一個係福伯，而第二個係蔡老闆。





「你有無小段嘅卡片？」阿然問我。

「有啊，你問黎做咩事？」我問。

「我想睇下佢有咩野計劃，我年紀都唔細，係時候要諗諗。」阿然所講嘅野，正正同我而家所諗嘅野。

「我有佢電話，不如我直接比佢電話你，你問佢。」我答。

「好。」阿然點頭回答。





我拎起支酒，望一望酒上面貼住寫有「蔡老闆」三個字嘅紙，「你同蔡老闆飲左幾多支話？」

「十六支。」阿然答。

「呢個紀錄，就等我破左佢。」我一口氣飲晒剩低嘅白酒，飲嘅唔止有思念，仲有悲哀、痛。

係阿然果度留到好夜先走，係街上面漫無目的咁行，慢慢咁經過果朝早陪蔡老闆行過嘅路、佢叫我地唔駛送嘅街口、佢被撞嘅地方……然後，去到果一間茶餐廳。

無意識地行入左間店入面，「一位？」個侍應問我，而我向佢點一點頭。

唔知係未佢特登，定呢個世上真係有巧合，個侍應叫我坐果個位，係果日我同蔡老闆坐嘅位，我望住個位隔左一陣先回神，坐低後，個侍應就問我：「食咩？」

「……叉燒飯。」我不經思考講出左呢三個字。

……咁不如我請你食呢度嘅叉燒飯啦，我知道你最鐘意食叉燒飯……





蔡老闆，我記得你咁同我講過架。

侍應聽到後，就大聲問廚房仲有無，「阿伯你好彩，得返最後一客。」佢係張單度寫左個銀碼，就放低左張單話：「阿伯，因為我地就收，所以方唔方便比左錢先？」

我拎左個銀包出黎，打開不停搵，但係都湊唔夠碟叉燒飯嘅數，「阿伯你慢慢搵，我一陣先過黎同你收。」

個侍應行開後，我就繼續係我銀包搵，但係點都搵唔到，再望一望而家我有嘅數目，同張單上面嘅數目，相差五蚊。

正當我想打消食呢碟叉燒飯嘅念頭果陣，放左係銀包嘅吉儀跌左出黎，呢一封係蔡老闆嘅吉儀，入面有粒糖，一張紅紙，同埋一個五蚊銀……

個侍應又返過黎，見到我放係枱上嘅錢，收起後就話：「阿伯你等等，好快到。」

就同佢所講嘅一樣，佢好快就拎左碟叉燒飯放係我面前，我望住眼前呢一碟叉燒飯，拎左放係旁邊嘅匙羹，食左一啖叉燒飯後，就話：「多謝你，蔡老闆，你請我食嘅叉燒飯好好食。」





而家嘅我，就好似周星馳套食神入面，味公主食緊果碗叉燒飯一樣，一路食，一路流眼淚。

黯然……真係好黯然……