[年齡無界限] 就係咁，我最近出席好多喪禮: ６０　校刊的最後一頁

行出醫院，心仍然好佩服志威果種決心，但係我依然唔明白佢係出於咩野原因求死，無錯，就同珍妮同小段嘅說話一樣，我都覺得志威你一個最有資格選擇安樂死嘅人，但係，佢求死嘅真正原因係Ｄ咩呢？

到而家呢一刻，我真係唔知。

我、小段同珍妮三個並肩而行，小慧就留係醫院繼續陪志威，不竟志威已經時日無多，留多Ｄ佢地兩個相處嘅時間比佢地會好Ｄ。

「輝爺，我睇得出契老豆見返你，佢真係好開心。」珍妮話：「但係點解契老豆會同你講對唔住？」

我沉默左一下，「呢件事係我地讀書嘅時候嘅事，不過，最應該講對唔住果個人，其實係我。」





而小段，就係旁邊用一個寬容嘅話氣講：「唔好介懐咁多啦，隔左咁多年後都可以見返，就無謂為左已經過去左嘅事影響寶貴嘅相遇。」

「係啊，輝爺，你都多Ｄ黎睇契老豆啦，佢時日無多，都想見下身邊Ｄ朋友。」珍妮話。

「好。」我微微咁點一點頭。

返到屋企後，我係個櫃度搵左好耐，搵左成個鐘終於搵得返，係我讀書果陣嘅校刊。

可能太耐無拎出黎，又或者放嘅位置唔係幾好，本校刊已經泛黃，有少少破爛，但係仲睇到校刊入面嘅內容。





一頁，一頁咁睇，回顧返以前讀書嘅時期。

有一頁，係講我同志威校內運動會比賽，佢拎左全場總冠軍，而我就係亞冠。

有一頁，係水運會，呢次我就威返次，贏左佢拎左全場總冠軍。

有一頁，係我地兩個一齊參加學校嘅壁報比賽，又係我地拎左冠軍。

有一頁，係我地兩個打校隊入左最後決賽，比賽前嘅隊相，我好記得果年，我地拎左學界冠軍，佢仲係全場ＭＶＰ。





志威係一個硬頸嘅人，但係佢嘅硬頸，係用係自己鐘意嘅事上面，佢總要做到自己認為最好嘅地步先會心息。

去到班相果一頁，先見到嘅，係小慧果一班。

果陣我同志威係同班，不過小慧就係隔離班，雖然唔同班，但我地三個係好好朋友，只不過，佢對志威嘅感情，係多我少少。

睇到自己班相，我同志威係企係一齊，相睇落好似好正經，但果陣我地隻腳不停咁踩緊大家。

去到最後一頁，呢一頁，係屬於我最獨特嘅最後一頁。

因為果陣我地三個人，都係對返嘅校刊最後一頁寫左祝福嘅字。

但係……果陣……我係小慧最後一頁校刊見到志威所寫果句後，我果陣決定寫上……